Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 TOKO FAHA-16

Tohero ty Devoly Noho ty Teti-dratiny

Tohero ty Devoly Noho ty Teti-dratiny

“Tohero ty Devoly, le hilay anareo ie.”—JAKOBA 4:7.

1, 2. Ia iaby ty falifaly lafa misy atao batisa?

LAHA fa tao maromaro iha zay ro nanompo any Jehovah, le azo antoky fa maromaro koa zay ty lahateny batisa fa nirenao tamy fivoriambe tany. Fe, ndre fa impiry iha nanatriky fotoa bevata io, le mety mbo mihetsi-po avao saky mitsanga azy hatao batisa aloha eny rey. Taitaitsy marè avao ty mpanatriky, bakeo mandrombo marè. Mety ho latsaky mihintsy ty ranomasonao mahita hoe mitombo ndraiky ty olo lafovily mifily hanompo Jehovah. Hafalea lahy zao!

2 Mety ho in-droe na in-telo santao avao tsika ro mahita olo atao batisa, fa ty anjely mahita imaro. Mba eritsereto moa ty “hafalea” anjely reo “an-danitsy any”! Olo an’arivony sankerinandro ro militsy amy fandamina Jehovah hita maso. (Lioka 15:7, 10) Azo antoky hoe falifaly biby ty anjely mahita fitomboa zay!—Hagay 2:7.

“MIRIORIO MANAHAKY LIONA MIERONERO” TY DEVOLY

3. Manino Satana ro miriorio “manahaky liona mieronero” io, le ino ty teany hatao?

3 Fe misy anjely meloky marè lafa mahita olo atao batisa. Romotsy biby Satana noho ty demonia mahita olo an’arivony miala amy tontolo raty toy. Sady fa nirengirengy marè Satana nivola hoe tsy misy olo manompo Jehovah  amy fitiava, fa hivaliky iaby hoasany tsika lafa tojiky fitsapà marerè. (Vakio ty Joba 2:4, 5.) Saky misy olo tapa-kevitsy amy fo hanoka ty vatany ho ahy Jehovah, le voaporofo fa diso Satana. Sahala voavango tampify an’arivony Satana sankerinandro sankerinandro. Tsy mahatseriky laha “miriorio manahaky liona mieronero mila olo hakapany io” ie! (1 Petera 5:8) Fa ta hampikapaky antsika marè “liona” io, na hoe teany ho simba na ho tampaky mihintsy ty fifandrambesantsika amy Jehovah.—Salamo 7:1, 2; 2 Timoty 3:12.

Saky misy olo manoka ty vatany ho ahy Jehovah noho atao batisa, le voaporofo hoe diso Satana

4, 5. a) Ino ty antony roe bevata mahavy antsika mivola fa natao Jehovah misy farany ty hery Satana? b) Ino ty toky anana ty Kristiana?

4 Tsy misy antony tokony havakàntsika, ndre masiaky  marè aza ty fahavalontsika. Fa manino? Satria fa natao Jehovah misy farany ty hery “liona mieronero” io. Manino tsika ro mivola any zay? Voalohany, fa nivola Jehovah fa hisy “vahoaky be” ho tafaboaky velo amy “fijalea bevata.” (Apokalypsy 7:9, 14) Tsy maintsy tanteraky avao ty faminania Ndranahary. Ka ndre Satana aza fa mahay hoe tsy hovoafitakiny mihintsy ty vahoaky Ndranahary iaby.

5 Hitantsika amy safà Azaria mpaminany tsy nivaliky ty antony faharoe. Nivola tamy Asa mpanjaka Azaria hoe: “Miaraky aminareo avao Jehovah laha miaraky aminy nareo.” (2 Tantara 15:2; vakio ty 1 Korintianina 10:13.) Fa maro ty tantara ahità hoe tsy nivita Satana mihintsy ty hampikapaky ze nifandramby marìny tamy Ndranahary. (Hebreo 11:4-40) Ho afaky hanohitsy noho handresy any Satana mihintsy ty Kristiana, laha mifandramby marìny amy Ndranahary. Manome toky antsika ty safàny hoe: “Tohero ty Devoly, le hilay anareo ie.”—Jakoba 4:7.

‘MIALY AMY ANJELY RATY TSIKA’

6. Ino ty atao Satana mba hahafahany hampikapaky antsika?

6 Tsy haharesy ty vahoaky Ndranahary iaby mihintsy Satana, fe mety hisy ho voany avao laha tsy miamby soa. Hay Satana fa afaky mampikapaky antsika ie laha vitany ty mampihena ty fifandrambesantsika amy Jehovah. Ino ty ataony? Mamango marè ie. Ty olo kiraidraiky ro asiany sady verevereny. Hodinihintsika tetiky tena fampiasàny reo.

7. Manino Satana ro mamango marè ty vahoaky Jehovah?

7 Mamango marè ie. Mivola ho zao ty apostoly Jaona: ‘Ambany fahefà azy raty iny zao tontolo zao iaby.’ (1 Jaona 5:19) Fampitandrema ho ahy ty Kristiana iaby safà zay. Fa ahy Satana ty raty fanahy amy tontolo toy eto, ka ze mbo tsy azony ro manahira ty sainy sady asiany marè. Tsy  ia zay fa ty vahoaky Jehovah. (Mika 4:1; Jaona 15:19; Apokalypsy 12:12, 17) Meloky marè ie satria hainy fa kelikely ty fotoa ananany. Vomaiky aza tsika tereny hivaliky. Mialy ay faramparany ie henanizao, sady mandravarava.

8. Ino ty dika safà Paoly hoe “mialy” amy fanahy raty?

8 Mialy amy ty kiraidraiky ie. Nampitandrina Apostoly Paoly hoe: ‘Mialy amy ty fanahy raty amy faritsy ty lanitsy any tsika.’ (Efesianina 6:12) Nanino Paoly ro nampiasa ty safà hoe “mialy”? Ta hivola olo roe mifampitanjaky manahaky manao ringa io Paoly. Dikany zay, marìny fahavalo iny. Ty kiraidraiky mihintsy ro mila mialy amy fanahy raty. Ndre tsy inoa ty olo amy tany misy antsika hoe misy ty fanahy raty, ndre inoany, le tsy tokony hohalinontsika mihintsy fa sahala militsy amy aly io tsika lafa manokam-bata ho ahy Jehovah. Tsy afaky miala amy aly io ty Kristiana kiraidraiky, sirtò lafa nanoka ty vatany ho ahy Ndranahary. Tsy mahatseriky ndre intelo mihintsy Paoly ro nampirisiky ty Efesianina mba “hamahatsy soa”!—Efesianina 6:11, 13, 14.

9. a) Manino Satana noho ty demonia ro mampiasa “teti-draty” maro? b) Manino Satana ro miezaky manimba ty eritseritsintsika, le manao akory ty hahafantsika manohitsy raha zay? (Henteo ty efajoro “ Ao Tsy ho Verèverè Satana!”) d) Ino ty teti-draty hodinihintsika?

9 Mamerivery ie. Nampirisiky ty Kristiana mba hamahatsy soa noho hanohitsy ty “teti-draty” Satana Paoly. (Efesianina 6:11) Safà manondro raha maro ty nampiasà Paoly teo. Dikany zay, tsy tetiky raiky avao ro ampiasà fanahy raty reo, fa maro. Misy olo nahatohitsy karazam-pitsapà sisany, fe nahavoa azy ty fitsapà hafa lafa nandeha ty fotoa. Laha hentea zay, le dinihy ty Devoly noho ty demonia soa ty fihetsikintsika kiraidraiky, mba hahitàny ty fahalemeantsika. Hararaotiny amy zay raha zay mba hanimba ty fifandrambesantsika amy Ndranahary. Soa avao fa haintsika ty ankamaroa ty tetiky ty Devoly, satria volany amy  Baiboly ao. (2 Korintianina 2:11) Fa nihitantsika taloha tany ty hafetsea sisany ampiasàny, ohatsy hoe, ty fitiavan-kanana, ty naman-draty, noho ty fandaisam-bata raty. Hodinihintsika koa henanizao ty teti-draty hafa ampiasà Satana, le ty fifandrambesa amy ty fanahy raty.

MPAMADIKY ZE MAMPIASA HERY TY FANAHY RATY

10. a) Ino iaby fampiasà hery ty fanahy raty zao? b) Akory ty fahità Jehovah ty fampiasà hery ty fanahy raty, le akory ty fahitànao raha io?

10 Fifandrambesa mivanta amy fanahy raty ty fampiasà hery ty fanahy raty, ohatsy hoe, ty sikily, fisà aoly, fivolana ozo mamoriky, fanontanea amy ty maty. Fa haintsika soa fa “mampangaroharo” Jehovah ty fampiasà hery ty fanahy raty. (Deoteronomia 18:10-12; Apokalypsy 21:8) Tsy tsika mihintsy aloha ro hiezaky hifandramby amy fanahy raty, satria tsy maintsy ‘malay ty raty’ tsika. (Romanina 12:9) Mivaliky amy Jehovah Babantsika an-danitsy any iny tsika laha manao raha mampangaroharo rezay!

11. Manino ro mahazo fandresea bevata Satana laha mahatariky antsika hampiasa hery ty fanahy raty? Hazavao amy ohatsy.

11 Tapa-kevitsy hitao ty sisany amintsika Satana, satria hainy fa mivaliky amy Jehovah ze mampiasa hery ty fanahy raty. Mandresy ie saky mahatao Kristiana raiky hifandramby amy demonia. Ino ty antony? Laha voatao hiala, ohatsy, ty maramila raiky, ka lasa mamadiky ty tafiky misy azy, le tsy maintsy ho falifaly ty sefo fahavalo rey. Mety hazelazelany manahaky loka rey azy mpamadiky iny, mba hangala baraka azy sefony taloha iny. Laha misy koa Kristiana manjary mampiasa hery ty fanahy raty, le kinahiny azy ty miala amy Jehovah noho manoka ty vatany ahy Satana, sady fa hainy raha zay. Mba eritsereto ty hafalea Satana lafa azelazelany manahaky loka  io mpamadiky iny! Misy amintsika va ta hanome fandresea manahaky any zay ho ahy Satana? Mazava ho azy fa tsy misy! Tsy mpamadiky tsika.

ATAONY ZE HAMPISALASALA ANTSIKA

12. Ino ty tetiky ampiasà Satana mba hampiova ty fahitantsika ty hery ty fanahy raty?

12 Laha mbo malay ty hery ty fanahy raty tsika, le tsy hahatao antsika amy raha zay mihintsy Satana. Fe fa hainy hoe tsy maintsy manova ty eritseritsintsika ie, laha ta hahavita any zay. Amy fomba akory? Ataony ze hahavy ty Kristiana hieritseritsy ty ‘soa hoe raty noho ty raty hoe soa.’ (Isaia 5:20) Tetiky mandaitsy fa liany ela ro ampiasàny. Ataony ze hampisalasala antsika.

13. Nanao akory ty nampiasà Satana ty fisalasalà?

13 Arakinao va ty fa nampiasàny raha io taloha tany? Nanontaniany ho zao Eva ta Edena tao: “Marina va fa nivola taminareo Ndranahary hoe tsy mahazo mihina amy voany hazo iaby amy zariday toy ato nareo?” Lafa nivory koa ty anjely tan-danitsy tany, tamy andro Joba, le mbo nivola ie hoe: “Hatahotsy Ndranahary va Joba laha tsy misy raha soa azony ty ao?” Lafa nanomboky ty fanompoany tan-tany tetoy Jesosy, le nivolana Satana hoe: “Laha anaky Ndranahary iha, le volano vato retoa hanjary mofo.” Nahasaky vatany Satana! Ataho raha ta hivola ie hoe diso ty raha nivolany Jehovah, vola raiky talohany zay, hoe: “Toy ro Anako teako sady ekèko.”—Genesisy 3:1; Joba 1:9; Matio 3:17; 4:3.

14. a) Manao akory ty ampiasà Satana ty fisalasalà, mikasiky ty hery ty fanahy raty? b) Ino ty hodinihintsika henanizao?

14 Mbo tetiky manahaky an’io avao ro ampiasà ty Devoly henanizao. Ataony, ohatsy, ze hampisalasala ty olo hoe raty vatany va ty mampiasa hery ty fanahy raty. Mampalahelo fa mahavoatariky Kristiana sisany ie, le manjary  misalasala rozy hoe mahavoan-doza vatany va raha zay. Sahala mieritseritsy rozy hoe: ‘Marina vatany va zao?’ (2 Korintiana 11:3) Akory ty hanampeantsika ty olo mana eritseritsy manahaky any zay? Ino ty hatao mba ho azo antoky fa tsy hisy vokany amintsika ty tetiky Satana? Mba hamalea fanontanea rezay, le hodinihintsika ty fialam-boly noho ty fitsaboa. Vita Satana ty mampiharo raha reo amy ty hery ty fanahy raty satria mahay mamerivery biby ie.

HARARAOTINY TY RAHA ARA-DALÀNA IRINTSIKA NOHO ILÀNTSIKA

15. a) Manao akory ty fahità ty olo maro amy tany andrefa rey any ty hery ty fanahy raty? b) Nifindra tamy ty Kristiana va ty eritseritsy tontolo toy?

15 Eritseretin’olo hoe tsy mampidi-doza ty hery ty fanahy raty, noho ty fisà aoly, voho ty raha manahaky reo, sirtò amy tany andrefa rey any. Mihamaro koa ty filma, boky, fandahara amy tele, noho ty fisà video ahità fifandrambesa amy demonia. Aboakiny ao hoe soasoa, mampiseho fahaiza, na tsy mampanino raha rey. Lasa maro mpitea vatany ty filma noho ty boky sisany manahaky any rey, ka namoro fikambana mihintsy ty olo tea raha rey. Hita soa hoe vita ty demonia ty mahavy ty olo hino hoe tsy mampanino loatsy ty hery ty fanahy raty. Nifindra tamy ty Kristiana va eritseritsy zay? Zay vatany. Nivola ho zao, ohatsy, Kristiana raiky toy lafa baka nanenty filma miresaky hery ty fanahy raty: “Nihenteako avao filma iny, fa tsy nanao raha mifandramby amy hery ty fanahy raty aho.” Manino ro manimba ty eritseritsy manahaky any zay?

16. Manino ro mahavoan-doza ty mifily fialam-boly mampiseho miavaky ty hery ty fanahy raty?

16 Marina fa tsy mitovy ty hoe mampiasa hery ty fanahy  raty noho ty manenty raha zay. Fe ndre ty manenty avao le fa mahavoan-doza. Fa manino? Eritsereto moa toy: Hita amy Baiboly ao fa tsy mahay mamantatsy ty eritseritsintsika ndre Satana ndre ty demonia. * Ka mba hahaizany ty raha an’eritserintsika ao noho hahitàny ty fahalemeantsika, le dinihiny soa ty raha ataontsika, anatiny zay ty fialam-boly filìntsika. Ka le sahala mandefa hafatsy amy ty demonia ty Kristiana raiky laha hita hoe tea filma na boky misy tantara misy mpamoha angatsy rey, na mpamosavy, na olo misy demonia, na ty raha manahaky any reo. Ie mihintsy amy zay ro mampitoro ty fahalemeany! Hararaoty demonia reo fahalemeany zay, le ataon-drozy marerè ty aly aminy, zisiky maha resin-drozy azy vatany. Nanjary nampiasa hery ty fanahy raty mihintsy ty olo sisany, satria nanao fialam-boly mampiseho miavaky ty hery ty fanahy raty, ka nanjary koko amy raha zay.—Vakio ty Galatianina 6:7.

Mangataha fanampea amy Jehovah lafa marary iha

17. Ino ty teti-draty ampiasà Satana mba hanararaota ty Kristiana marary?

17 Tsy ty faniriantsika hiala voly avao ro hararaoty Satana fa ty faniriantsika ho salama koa. Ino ty raha ataony? Mety ho kivy, ohatsy, ty Kristiana raiky laha fa nanao ezaky maro fe mbo tsy mety janga avao. (Marka 5:25, 26) Mety hanararaotsy raha zay Satana noho ty demonia. Hain-drozy soa fa tsy tokony hila fanampea amy ty “hery ty fanahy raty”, na amy fifandrambesa amy fanahy raty. (Isaia 1:13) Hanimba ty fifandrambesa Kristiana iny amy Jehovah teti-dratiny io, laha mahavoa. Amy fomba akory?

18. Ino iaby ty fitsaboa tsy ekè ty Kristiana, le ino ty antony?

 18 Lafa nila fanampea tamy ty “hery ty fanahy raty” Israelita reo, le namepetsy an-drozy ho zao Jehovah: “Lafa mamelatsy ty tananareo nareo, le tampenako tsy hanenty anareo ty masoko. Ndre manao vavaky maro aza nareo le tsy hijanjy aho.” (Isaia 1:15) Tsy teantsika mihintsy ty hanao raha mety hanaka ty vavaky ataontsika, na hampihena ty fanampea Jehovah antsika, sandraky moa lafa marary tsika. (Salamo 41:3) Ka laha fa hay hoe misy fifandrambesany amy hery ty fanahy raty ty fomba fanentea arety na fomba fitsaboa raiky, le tsy tokony haneky raha zay ty Kristiana. * (Matio 6:13) Ho azony antoky amy zay fa hanampy azy avao Jehovah.—Henteo ty efajoro hoe “ Hery ty Fanahy Raty Vatany va Zay?

MARO BIBY TY TANTARA MIKASIKY DEMONIA

19. a) Manao akory ty fieritseretan’olo maro ty hery ty Devoly? b) Ino ty raha tsy tokony hotantarany ty Kristiana?

19 Tsy de mino ty hery Satana loatsy ty olo baka amy tany andrefa rey any. Fa mifanohitsy amy zay ty olo hafa. Maro ty voafitaky Satana ka  mieritseritsy azy ho mana hery mandilatsy ty tena ananany. Matahotsy fanahy raty rozy, ndre mihina, ndre miasa, ndre miroro. Maro biby koa ty tantara mikasiky ty hery ty demonia. Manitranitra ty olo lafa mitantara raha rey. Ty ilany moa le ta hijanjy marè. Tokony hitantara raha manahaky zay va tsika? Aha. Misy antony roe tsy anaovantsika raha zay.

20. Manao akory ty mety hahavy olo raiky hanao propagandy ho ahy Satana, ndre tsy asany azy?

20 Voalohany, manampy any Satana tsika laha mampiparitaky tantara mikasiky ty raha vita ty demonia. Manao akory zao? Marina fa mivola ty Safà Ndranahary hoe mahavita fahagagà Satana, fe volaniny avao koa fa mampiasa ‘famantara mavandy’ noho “famitaha” ie. (2 Tesalonianina 2:9, 10) Mpamitaky farany ze mahay Satana, ka hainy ty mitariky ty say ty olo teatea resaky hery ty fanahy raty.  Hainy koa ty manao ze hinoan-drozy raha tsy marina. Farany, mety hino olo rey hoe nahita noho naharè raha vatany, ka hitantara raha zay. Mitombo amy zay raha iny lafa mandeha ty resaky. Ka laha mitantara raha manahaky zay ty Kristiana, le manao ty sitrapo ty Devoly, satria ie ro “baba ty vandy.” Sahala manao propagandy ho ahy Satana ie amy zay.—Jaona 8:44; 2 Timoty 2:16.

21. Tsy tokony hiala amin’ino ty resaky ataontsika?

21 Faharoe, ndre fa nahita raha mikasiky fanahy raty vatany ty Kristiana raiky, le tsy hitantara raha zay amy mpiara-manompo. Fa manino? Mananatsy antsika ho zao ty Hebreo 12:2 hoe: ‘Henteo soa azy Mpitariky Bevata Marè noho Mpandavorary ty finoantsika iny, tsy ia zay fa Jesosy.’ Mila mifantoky amy Kristy vatany tsika, fa tsy amy Satana. Soa ho tiarovy fa tsy nivolambola tantara maro mikasiky ty fanahy raty Jesosy tamy ie tan-tany etoy, ndre nimaro aza ty raha niazony resahy mikasiky any Satana. Nifantoky tamy ty hafatsy mikasiky Fanjakà Ndranahary ie. Ka mba hanahafantsika any Jesosy noho ty apostoly, le tsy miala amy “ty asa bevata natao Ndranahary” ty resaky ataontsika.—Asan’ny Apostoly 2:11; Lioka 8:1; Romanina 1:11, 12.

22. Ino ty azontsika atao mba hisy “hafalea” avao ty “an-danitsy any”?

22 Maro ty teti-draty ampiasà Satana, mba hahavy antsika tsy hifandramby amy Jehovah. Anatiny zay ty fifandrambesa amy fanahy raty. Fa ataontsika faly antsika raha zay, ndre ino ndre ino karazany. Fe, laha malay ty raty noho mivahatsy amy ty soa tsika, le tsy manome lala ty Devoly mba hanova eritserintsika mihintsy. (Vakio ty Efesianina 4:27.) Hisy “hafaleam-be” vatany ty “an-danitsy any”, laha miezaky avao tsika ‘hanohitsy ty teti-draty ty Devoly’ zisiky handripaha azy!—Efesianina 6:11.

^ feh. 16 Ndre kaihy hoe Mpanohitsy, Mpanarasara, Mpamitaky, Mpampilitsy fakam-panahy, noho Mpavandy aza Satana, le tsy midika raha zay hoe mahay mandiniky ty fo noho ty saintsika ie. Jehovah ro fa nivolany hoe “mpandiniky ty fo”, le Jesosy ro “mandiniky ty voa noho ty fo.”—Ohabolana 17:3; Apokalypsy 2:23.

^ feh. 18 Laha ta hahazo fanazavà misimisy iha, le henteo ty lahatsoratsy hoe “Fizaham-pahasalamana Iray ho Anao Ve?”, amy Tilikambo Fiambenana 15 Desambra 1994, pejy 19-22, noho ty hoe “Ny Fiheveran’ny Baiboly—Zava-dehibe ve ny Fitsaboana Fidinao?”, amy Mifohaza! 8 Janoary 2001.