Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 FANAZAVÀ FANAMPINY

Fomba Andaisa ty Voaroaky

Fomba Andaisa ty Voaroaky

Malahelo biby tsika, lafa misy longo na nama nanota fe tsy nibebaky, ka voaroaky tsy hiharo amy fiangona. Manome tari-dala mikasiky raha zay ty Baiboly, ka arakaraky ty fanorihantsika tari-dala rey ro ahità laha tea a Ndranahary vatany tsika sady tsy mivaliky aminy. * Ndretoa misy fanontanea mifandramby amy zay.

Manao akory ty tokony handaisantsika ty voaroaky? Mivola ty Baiboly hoe: ‘Ka mifandramby sasy amy ze kaihy hoe rahalahy kanefa mpijangajanga, na mana faniria tsy mety afa-po na mpanompo sampy, na mpanevateva, na mpimamo, na mpandrava, sady mba tsy hiaraky mihina aminy iaby aza.’ (1 Korintianina 5:11) Ho zao koa ty resahiny mikasiky ty olo “tsy mijano amy ty fampianara Kristy”: “Ka mampilitsy azy an-trano na miarahaba azy. Satria miharo asa raty aminy ze miarahaba azy.” (2 Jaona 9-11) Tsy mifandramby amy voaroaky tsika, na miresaky aminy mikasiky ty raha ara-panahy. Ho zao ty volany ty Tilikambo Fiambenana 1 Avrily 1982, pejy 23: ‘Ty fivolana hoe “akory” avao le mety ho fandingana voalohany ho amy resaky, sady mety ho amy finamà mihintsy aza. Ho teantsika va ty hanao fandingana voalohany zay amin’olo voaroaky?’

Tsy tokony hifandramby aminy mihintsy va tsika? Eka, retoa misy antony maromaro. Voalohany, zay ro anaporofoantsika fa tsy mivaliky amy Ndranahary noho ty Safàny tsika. Manoriky ty safàny avao tsika, ndre mora raha zay ndre sarotsy. Tea azy tsika ka manoriky ty didiny iaby, sady haintsika fa manao ty rariny noho be fitiava ie, sady mahasoa antsika ty lalànany. (Isaia 48:17; 1 Jaona 5:3) Faharoe, miaro antsika noho ty fiangona raha zay. Voaro ty fifandrambesantsika amy Jehovah, sady tsy voatariky hanao raha raty tsika. Tsy  simba koa ty laza soa ty fiangona. (1 Korintianina 5:6, 7) Fahatelo, ndre azy voaroaky iny koa aza mety handramby hasoava, laha manaraky soa ty torolala amy Baiboly ao tsika. Marina fa tsy nisy vokany taminy ty fanampea ty anti-panahy kanao ie voaroaky. Fe, mety hidosiky ty fony ty fanohanantsika ty fanapahan-kevitsy ty komitim-pitsarà. Mety ‘hitoliky ty sainy’, lafa tsy afaky mifandramby amy azy marìny ty fony reo. Mety ho takatsiny fa raty vatany ty raha nataony, ka hiezaky himpoly amy Jehovah ie.—Lioka 15:17.

Manao akory laha misy longonao voaroaky? Mety ho sarotsy ty tsy hivaliky amy fotoa zay, satria mifandramby am-po marè ty mpilongo. Ka hatao akory azy voaroaky iny? Tsy ho voaresaky etoa iaby ty raha mety hiseho, ka roe avao ro hohenteantsika soa.

Manao akory laha ty trano raiky amintsika ro misy voaroaky? Tsy hoe lafa voaroaky ie, le fa tsy anaty ty fianakaviantsika sasy. Ka tsy voatery hiova ty raha fatao ty fianakavia noho ty fifandrambesan-drozy andavanandro. Fe, azo volany hoe tsy ta hiaraky amy ty fianakaviany hanompo any Jehovah sasy azy voaroaky iny, ka tsy hanenga azy handramby anjara amy raha zay ty fianakavia tsy mivaliky. Laha eo, ohatsy, ie amy fotoa fivavaha ty fianakavia, le tsy handramby anjara. Fe, laha tsy ampy tao azy voaroaky iny, le mbo andraikitsy ty baba noho reniny ty miteza azy noho mananatsy azy. Zay ro mety hahavy ty baba noho reny tea anaky hampianatsy Baiboly anan-drozy io. *Ohabolana 6:20-22; 29:17.

Ka manao akory laha longo tsy miharo trano aminao ro voaroaky? Mety hisy antony manoka, ka voatery mifandramby aminy avao iha, mba hikarakarà raha mikasiky ty fianakavia. Fe ndre eo zay, le tokony hefera ho kelikely araky ze azo atao fifandrambesa io. Tsy mila hiriky hiaraha amy  ty longony voaroaky tsy miharo trano aminy ty Kristiana tsy mivaliky. Tsy mivaliky amy Jehovah noho ty fandaminany rozy, ka aleon-drozy manaraky ty fitsipiky ty Soratsy Masy mikasiky ty voaroaky. Hahasoa azy nanota iny vatany ty tsy fivalihan-drozy, sady mety hanampy azy handramby hasoava baka amy famolaha iny. *Hebreo 12:11.

^ feh. 1 Miasa amy azy niala an-tsitrapo tsy hiharo amy fiangona rey koa ty torolala amy Baiboly ao mikasiky ty voaroaky.

^ feh. 2 Laha teanao ty hahazo fanazavà misimisy mikasiky ty ajà tsy ampy tao voaroaky mbo mipetraky an-trano ao, le henteo ty Tilikambo Fiambenana 15 Janoary 2007, pejy 20, noho 1 Oktobra 2001, pejy 16-17.

^ feh. 3 Laha teanao ty hahazo fanazavà misimisy mikasiky ty fomba andaisa ty voaroaky, le henteo ty torohevitsy baka amy Baiboly amy Fanompoantsika Ilay Fanjakana Aogositra 2002, pejy 3-4.