Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 FANAZAVÀ FANAMPINY

Fisaraham-panambalea Noho Fifehea Tezitsy

Fisaraham-panambalea Noho Fifehea Tezitsy

Tea Jehovah hanaja ty voadim-panambaleany ty olo manambaly. Ho zao ty safàny lafa naharony raiky ty lahilahy noho ampela voalohany: ‘Ty lahilahy hitambatsy amy valiny, le ho nofotsy raiky avao rozy.’ Nampoly Jesosy ndraiky raha zay tafara tatoy, le nitohizany hoe: “Ka, ao ze naharo Ndranahary bao, tsy hosarahin’olo.” (Genesisy 2:24; Matio 19:3-6) Hita baka amy safà reo fa fehy andesy zisiky maty ty  fanambalea, amy Jehovah noho Jesosy. (1 Korintianina 7:39) Masy ty fanambalea ka tsy tokony hataotao fahatany ty fisaraham-panambalea. Hala Jehovah mihintsy aza raha zay, laha tsy misy antony araky ty Soratsy Masy.—Malakia 2:15, 16.

Ino antony araky ty Soratsy Masy io? Haintsika hoe hala Jehovah ty fandrantòva noho ty fijangajangà. (Genesisy 39:9; 2 Samoela 11:26, 27; Salamo 51:4) Mampangaroharo azy vatany ty fijangajangà, ka nataony antony azo isaraha. (Nihazavàny tamy Toko faha-9, amy fehintsoratsy 7 ao, ty atao hoe fijangajangà.) Amea Jehovah zo hanapa-kevitsy azy valy tsy nanao hadisoa iny laha mbo hijano amy valy nijangajanga io ie, na hangataky fisaraham-panambalea. (Matio 19:9) Tsy hala Jehovah fisaraham-panambalea iny, laha zay. Fe tsy mampirisiky ndre ia ndre ia hisara-baly ty fiangona. Ty ilany aza mety hanapa-kevitsy hoe hijano amy valy nijangajanga iny, sandraky moa laha nibebaky valiny io. Fe ndre maro ty resaky, le anjara azy valy tsy nanao hadisoa iny ty manapa-kevitsy laha hangataky fisaraham-panambalea ie, ndre tsy hanao any zay. Ie avao koa ro hizaka ty vokany.—Galatianina 6:5.

Mety hisy karazan-draha sarotsy marè mahavy ty Kristiana hanapa-kevitsy tsy hiharo trano amy valiny na hisara-panambalea, ndre tsy nijangajanga aza valiny io. Mivola ty Baiboly fa “soa laha mijano tsy manambaly [ie,] laha tsy zay moly amy valiny.” (1 Korintianina 7:11) Tsy afaky miaraky amin’olo hafa noho manambaly ndraiky ie. (Matio 5:32) Retoa misy raha tsy mahazatsy vitsivitsy rambesy ty olo sisany ho antony hialà an-trano na hifehea:

Kinahiny tsy mamelo. Mety hanjary mahantra marè ty fianakavia raiky, na tsy hana ze raha tena ilàny, satria tsy mamelo an-drozy ty nahodan-drozy ao, kanefa afaky manao raha zay. Hoy ty Baiboly: “Laha misy tsy manome ze ilà ty olo ... trano raiky aminy, le fa nandà ty finoa ie ka raty  mandilatsy ty tsy mino.” (1 Timoty 5:8) Laha tsy mety miova lahilahy iny, le mety hanapa-kevitsy hangataky fifehea ara-dalàna amy ze manam-pahefà ahazoany raha zay ampela iny, mba hahasoa an-drozy moroanaky. Fa laha misy Kristiana voainjy hoe tsy mety mamelo ty trano raiky aminy, le tokony handiniky any zay soa ty anti-panahy, satria mety hahavoaroaky azy raha zay.

Satà marè. Mety ho satà marè amy ty valiny ty olo raiky, ka atahora hikai-doza amy ty fahasalamàny na ty ainy mihintsy. Tokony hanarahara soa ty anti-panahy, laha Kristiana ty nanao raha zay. Mahavoaroaky ty fahazara mampiasa hasatà noho ty fanjekea heloky matetitetiky.—Galatianina 5:19-21.

Manaka tanteraky ty valiny tsy hifandramby amy Ndranahary. Mety hisy olo miezaky manaka ty valiny tsy hanaraky ty fivavaha marina, na manery azy handika ty didy Ndranahary mihintsy. Mety hangataky fifehea ara-dalàna valiny iny, laha zay avao ro ahafahany ‘manoriky ty safà Ndranahary, fa tsy olo.’—Asan’ny Apostoly 5:29.

Amy raha sarotsy marè iaby reo, le tsy tokony hampirisihy hisaraky na hijano amy valiny, azy valy tsy nanao hadisoa iny. Marina fa mety hanampy na hanome torohevitsy baka amy Baiboly ty nama matotsy noho ty anti-panahy. Fe tsy fonga ho hain-drozy iaby ty raha malinidiniky amy ty fiaina ty mpivaly. Jehovah avao ro mahay any zay. Tsy manaja a Ndranahary noho ty fanambaleany koa ty Kristiana, laha mampitombo ty raha manahira an-drozy morovaly, satria ta hisaraky amy valiny avao ie. Hita Jehovah ty tetiky iaby ilàn’olo fisaraha, ndre le avòny manao akory aza. “Mihalo noho mizela [vatany] ty raha iaby, amaso azy hanody antsika iny.” (Hebreo 4:13) Fe laha mihamanjeky avao ty fahasahiràna mikai-doza, ka ty fisaraha pilasy avao ro hevitsy farany hita ty Kristiana raiky, le tsy misy tokony hikinokino azy. “Samby hitsanga aloha ty fitsarà Ndranahary eo tsika iaby.”—Romanina 14:10-12.