Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 TOKO FAHA-14

Manaova ty Marina amy Kila Raha Iaby

Manaova ty Marina amy Kila Raha Iaby

‘Ta hanao ty marina amy kila raha iaby zahay.’ —HEBREO 13:18.

1, 2. Manino ro mahafalifaly Jehovah ty mahita antsika miezaky hanao ty marina? Hazavao amy ohatsy.

NIRAHIN-DRENINY hivily labozỳ Fidy. Lafa niavy bakany ie, le nameany an-dreniny ty lamonè sady nisahiny. Nitotsy tampoky ie sady taitsy marè. Nanino? Nandilatsy lamonè iny. Nalahelo ie, fe nihazavanin-dreniny taminy fa mbo afaky mimpoly amy mpamarotsy iny any ndraiky ie, mba hampimpoly drala mandilatsy io sady hanao azafady. Falifaly mama Fidy sady mirehareha. Manino?

2 Mahafaly ty baba noho reny ty mahita hoe vatan-draha amy ty anany ty manao ty marina. Falifaly koa ty Babantsika an-danitsy any, azy “Ndranahary ty fahamarina” iny, lafa mahita antsika mihamatotsy ka miezaky manao ty marina. (Salamo 31:5) Teantsika ty hampifaly azy noho tsy hiala amy ty fitiavany. “Ta hanao ty marina amy kila raha iaby” koa tsika, manahaky apostoly Paoly. (Hebreo 13:18) Misy raha efatsy ahità hoe mety ho sarotsy ty manao raha zay. Hodinintsika hoe ino iaby raha rezay, sady horesahintsika ty sisany amy ty raha soa ho azo laha manao ty marina tsika.

AMY TY VATANTSIKA

3-5. a) Manao akory ty ampitandrema ty Baiboly antsika mba tsy hamita-bata? b) Ino ty hanampy antsika hahay ty tena toetsintsika?

3 Tsy lavorary tsika ka mora mamita-bata. Sarotsy amy  zay ty miezaky hanao ty marina, laha amy ty vatantsika avao ro anaova azy fa tsy amy ty hafa. Hangalaky ohatsy hanazavà raha zay tsika: Nieritseritsy ty Kristiana ta Laodikia tany hoe manan-kanana rozy. Fe ‘nahantra noho jiky sady nihalo’ ara-panahy rozy araky ty fanentea Jesosy azy. Mampalahelo vatany raha zay! (Apokalypsy 3:17) Nampanjeky raha zay ty eritseritsy diso nananan-drozy.

4 Tiaronao koa vasa ty safà Jakoba mpianatsy hoe: “Laha misy olo mieritseritsy ty vatany ho mpivavaky fe tsy mamehy lamboridy amy ty lelany, fa mbo mamitaky ty fony avao ie, le fahatany ty fivavaha arahin’olo zay.” (Jakoba 1:26) Tsika avao ro mamitaky ty fontsika, laha mieritseritsy fa ekè Jehovah avao ty fanompoantsika ndre mampiasa ty lelantsika amy fomba raty tsika. Tsy hisy dikany ty fanompoantsika Jehovah, sady fahatany. Manao akory ty hialà amy raha zay?

5 Ampitovizy Jakoba amy fitaratsy ty fahamarina amy Safà Ndranahary ao. Ampanenteany soa ty lalàna tsy misy handra tsika, le ampanareniny ze tokony hareny. (Vakio ty Jakoba 1:23-25.) Afaky manampy antsika hahay ty tena toetsintsika noho hahita ze tokony hasoavy ty Baiboly. (Fitomaniana 3:40; Hagay 1:5) Afaky mivavaky amy Jehovah koa tsika mba handinihany antsika, noho hanampeany antsika mba ho hitantsika noho harenintsika ty fahalemea bevata mety hananantsika. (Salamo 139:23, 24) Mety tsy ho arakintsika hoe fa mamita-bata tsika. Fe mila manahaky ty hevitsy Jehovah mikasiky fahalemea zay tsika. Hoy ty Ohabolana 3:32, mikasiky ty olo ho zay: “Mampangaroharo Jehovah ty olo mahihitsihitsy, fa ty olo-mahity ro mana fifandrambesa marìny aminy.” Afaky manampy antsika hanahaky ty hevitsiny noho hahita ty vatantsika manahaky ty ahitàny antsika Babantsika an-danitsy any iny. Tiarovo fa nivola Paoly hoe: ‘Ta hanao ty marina amy kila raha iaby zahay.’ Tsy ho afaky ho lavorary tsika henanizao, fe maniry sady miezaky marè hanao ty marina.

 AN-TRANO AO

Misaka antsika tsy hanao raty ty fanaova ty marina

6. Ino ty antony mahavy ty mpivaly tokony hifampivola ty marina? Ino ty loza tsy hahazo an-drozy laha manao raha zay rozy?

6 Tokony hampiavaky ty fianakavia Kristiana ty fanaova ty marina. Zay ty antony mahavy ty mpivaly tsy tokony hifanetaky raha, fa hifampivola ty marina avao. Tsy tokony hisy Kristiana manambaly fe mbo manadaladala olo hafa na maneky hadalany, na mangalatsy mifandramby amin’olo hafa amy internet, na koa mijanjy na manenty na mamaky raha tiva, satria fahazara maloto raha reo, sady mampandratsy fo. Fa nisy Kristiana nanao raha raty reo, sady nanetaky raha zay tamy valiny. Tsy manao ty marina ty olo manahaky zay. Henteo moa safà Davida mpanjaka tsy nivaliky toy: “Tsy miaraky mipetraky amin’olo tsy marina aho, sady tsy mifandramby amy ze manetaky ty maha ie azy.” (Salamo 26:4) Falio ty manao raha mety hahavy anao hanetaky amy ty valinao hoe olo manao akory marina iha.

7, 8. Ino ty ohatsy azo ampiasà mba hampianara ty ajà hoe vatan-draha ty manao ty marina?

7 Hendry ty Baba noho reny laha mampiasa ohatsy baka amy Baiboly ao, lafa mampianatsy ty anany hoe vatan-draha ty manao ty marina. Raty, ohatsy, ty natao Akana satria nangalatsy ie sady nanetaky ty nataony. Manahaky zay koa Gehazy, satria navandy ie mba hahazoan-drala. Nangalatsy sady navandy koa Jodasy, mba hampanday fahavoaza any Jesosy.—Josoa  6:17-19; 7:11-25; 2 Mpanjaka 5:14-16, 20-27; Matio 26:14, 15; Jaona 12:6.

8 Misy olo azo alà tahaky koa, manahaky Jakoba zao nampirisiky ty anany hampimpoly drala nihitan-drozy tanaty kitapon-drozy tao. Satria nieritseritsy ie hoe nety ho nisy hadisoa. Teo koa Jefta noho ty anakampelany, satria nanefa ty voady babany ie ndre sarotsy taminy raha zay. Tsy natahotsy nivola tamy vahoaky romotsy koa Jesosy hoe ie ilàn-drozy io. Ta hanatanteraky ty faminania amy Baiboly ao sady ta hiaro ty mpianatsiny ie, le zay ty nahavy azy nivola raha zay. (Genesisy 43:12; Mpitsara 11:30-40; Jaona 18:3-11) Ohatsy vitsivitsy avao reo, fe ahità ty Baba noho reny hevitsy tena soa, mba hanampea ty anany ho tea manao ty marina noho hihevitsy raha zay ho vatan-draha.

9. Ino ty tsy tokony hatao ty baba noho reny? Manino ie ro tokony ho modely vatany?

9 Midika raha zay fa mana andraikitsy bevata ty baba noho reny. Hoy Paoly: “Iha azy mampianatsy ty sisany io, mba mampianatsy ty vatanao va iha? Iha azy mitory hoe: ‘Ka mangalatsy’, mangalatsy avao va iha?” (Romanina 2:21) Misy olo mampianatsy ty anany hanao ty marina, kanefa ndre ty vatany tsy manao raha zay. Manjary tsy hita ty ajà ze hatao. Mety hangalangalatsy ohatsy ty baba noho reny am-piasàny any, sady hanamarina ty vatany hoe: “Fa hay ty sefonay anè hoe hisy hangalaky raha rey!” Na havandy ie, le bakeo hivola hoe: “Vandy kelikely tsy misy dikany iny va!” Fe lafa halatsy, le halatsy, ndre be ndre kely ty raha nangalary. Lafa vandy koa le vandy, ndre mikasiky ino zay ndre mikasiky ino. * (Vakio ty Lioka 16:10.) Tsy azo fitahy ty ajà. Mety hanimba azy ty mahita ty baba noho reniny manao kisary marina. (Efesianina 6:4) Fa laha ty  Baba noho reny ro modely, le mety hanjary ho mpanao ty marina koa rozy lafa be, ka hanome voninahitsy Jehovah amy tontolo tsy manao ty marina toy etoa.—Ohabolana 22:6.

AMY FIANGONA EO

10. Ino ty raha tokony hambenantsika avao lafa miresaky amy ty finoa raiky amintsika tsika?

10 Afaky miezaky hanao ty marina tsika lafa mifampihao amy Kristiana hafa. Hitantsika tamy Toko faha-12 fa fanomeza ty fahafaha mivola, ka mila miamby soa tsika mba hampiasa raha zay amy fomba soa, sirtò lafa miaraky amy ty finoa raiky amintsika. Tsy ela avao, le mety hivaliky ho tsikotsiko na fandratiratia mihintsy ty resadresaky. Mety ho tafilitsy amy ty olo mampiparitaky vandy tsika, laha mitantara raha tsy azo antoky hoe marina. Soa laha mitanjaky ty vavantsika tsika. (Ohabolana 10:19) Fe ndre marina ty raha haintsika, le tsy voatery hovolany. Mety tsy tokony hilirantsika, ohatsy, raha iny, na tsy ho soa fanahy tsika laha mivola azy. (1 Tesalonianiana 4:11) Misy koa olo manao safà mivantambanta, fa nao mivola ty marina zao hoy ie. Tsy manahaky any zay tsika fa tokony ho safà soa noho feno hasoam-panahy avao ro volanintsika.—Vakio Kolosianina 4:6.

11, 12. a) Ino ty raha mampitombo ty fahadisoa ty olo sisany? b) Ino ty vandy Satana mikasiky ty fahotà bevata, le ino ty hanampy antsika tsy hino raha zay? d) Akory ty hampisehoantsika fa mivola ty marina amy fandamina Jehovah tsika?

 11 Vatan-draha vatany ty hoe mivola ty marina amy azy mitariky amy fiangona eo reo. Misy olo manao fahotà bevata sady vomaiky manampy any raha zay, satria manetaky ty fahotàny sady mavandy amy anti-panahy ie lafa anontanea. Soavolamanatriky iaby aza rozy, le manao kisary manompo any Jehovah kanefa zatsy manao fahotà bevata. Limbofany vandy ty androm-piainany iaby. (Salamo 12:2) Misy koa mivola ty marina avao, fe tsy volaniny ty vatan-draha marè. (Asan’ny Apostoly 5:1-11) Manao ho zay koa ty olo matetiky satria mino ty vandy Satana.—Henteo ty efajoro hoe “ Ty Vandy Satana Mikasiky ty Fahotà Bevata.”

12 Vatan-draha koa ty manao ty marina amy fandamina Jehovah, lafa mameno taratasy. Mila mitandrina, ohatsy, tsika mba tsy hanova ty tena nivitantsika tamy fanompoa eny, lafa mameno tatitsy mikasiky fanompoa. Mbo ho zay avao koa lafa mameno fangataha hahazo tombontsoam-panompoa: Tsy tokony havandy tsika lafa mivola ty fahasalamantsika na ty raha hafa mikasiky antsika.—Vakio ty Ohabolana 6:16-19.

13. Manao akory ty hanaova ty marina laha mampiasa Kristiana tsika, na miasa aminy?

13 Manao ty marina amy finoa raiky amintsika koa tsika, amy resaky varotsy noho asa. Fe mila miamby soa tsika mba tsy hiresaky mikasiky raha zay lafa amy Efitrano Fanjakà any, na lafa manompo, satria tsy tokony hafangaro amy fivavaha raha zay. Mila miamby soa koa tsika mba hanao ty marina amy ty Kristiana miasa amintsika ao: Tokony hamea ara-potoa ty karamany nifanaraha, noho ze tombontsoa takỳ ty lalàna. (1 Timoty 5:18; Jakoba 5:1-4) Fa laha tsika koa ro miasa amy rahalahy na anabavy, le  ataontsika soa ty asa mifanandrify amy ty karamantsika. (2 Tesalonianina 3:10) Tsy hoe satria mpiara-manompo ty mpampiasa le hitamà tsika hoe hiangarany, ka tsy maintsy hameany fotoa tsy iasà, na tombotsoa hafa tsy ameany ty mpiasa hafa.—Efesianina 6:5-8

14. Ino ty tokony hatao lafa miaraky miharo asa amy varotsy? Ino ty antony?

14 Manao akory laha misy Kristiana miharo asa amy varotsy na mifampitrosa? Toy misy torolala bevata noho mahasoa amea ty Baiboly: Ataovo an-tsoratsy ty raha iaby! Lafa nivily tany, ohatsy, Jeremia, le nampanoviny an-tsoratsy noho natao dika mitovy sady nasiany vavolombelo ty fifanaraha. Najariny soa taratasy iny mba ho azo hentea lafa afara any. (Jeremia 32:9-12; henteo koa ty Genesisy 23:16-20.) Dikany zay, sorato soa ty raha iaby, lafa manao fifanaraha amy mpiara-manompo iha. Tokony hisy sonia noho vavolombelo roe koa taratasy iny. Tsy midika raha zay hoe tsy matoky azy iha. Fa atao raha zay mba hialà amy tsy fifankahazoan-dresaky, noho fahadisoam-panantenà voho tsy fitovian-kevitsy mety hiteraky tsy fifanaraha. Mila tiarovy ty Kristiana fa tsy tokony hengà hanimba ty fiharoa noho filongoa amy fiangona eo mihintsy ty resaky varotsy. *1 Korintianina 6:1-8.

AMY TONTOLO TOY ETOA

15. Manao akory ty fahità Jehovah ty raha atao ty mpivarotsy tsy manao ty marina? Ka ino ty atao ty Kristiana?

15 Tsy amy fiangona eo avao tsika ro tokony hanao ty marina. Hoy Paoly: ‘Ta hanao ty marina amy kila raha iaby zahay.’ (Hebreo 13:18) Tea ty Mpamoro hanao ty marina koa tsika lafa mila drala. Amy boky Ohabolana ao avao, le fa ampolimpoliny inefatsy ty tokony hanana balansy marina.  (Ohabolana 11:1; 16:11; 20:10, 23) Nampiasa balansy noho vatobalansy ty olo taloha lafa nivily na namarotsy. Nilanjà ty raha nivilỳ noho ty drala nivilia azy. Tsy nanao ty marina ty mpamarotsy sisany, satria nampiasa vatobalansy roe karaza noho balansy tsy marina, mba hamitaha noho hameriverea olo. * Hala Jehovah raha zay! Mila mihalavitsy ty kila fahazara manahaky zay tsika, mba tsy hiala amy ty fitiavany.

16, 17. Ino ty raha atao ty olo manao ty tsy marina amy tontolo toy eto? Fe tapa-kevitsy hanao akory ty Kristiana marina?

16 Satana ro mpanday tontolo toy, ka tsy tseriky tsika laha ty fanaova ty tsy marina ro manjaka. Miatriky fakam-panahy hanao ty tsy marina avao koa tsika sanandro. Fa fahazara ty olo ohatsy ty mavandy na mampitombo lafa mameno taratasy fangataha asa. Misy manao azy ho mana diploma na fahaiza tsy ananany mihintsy. Matetiky ty olo ro manome valin-teny diso, lafa mameno taratasy mikasiky fifindra tanà ipetraha, na hetra, na fiantoha noho ty raha manahaky zay, mba hahazahoany ty raha ilàny. Maro ty mpianatsy mangala-tahaky amy fanadina. Lafa ampamorony lahatsoratsy na ampanaovy fikaroha ty olo sisany, le mangalaky ze hitany amy internet ao, bakeo ataony hoe ie ro nanoratsy raha iny. Matetiky koa ty olo ro manao kolikoly lafa manao fifanaraha amin’olo mana fahefà, mba hahazoa ty raha ilàny. Tsy mahatseriky raha zay, satria maro ty ‘tea tena noho tea drala sady tsy tea ty soa’, amy tontolo toy etoa.—2 Timoty 3:1-5.

17 Tapa-kevitsy tsy hanao raha zay ty Kristiana marina. Fe sarotsy raha zay ndraindraiky, satria atao ho raha metimety ty fiainan’olo manao raha tsy marina, sady ataho  raha tafavoaky mihintsy. (Salamo 73:1-8) Ty Kristiana amy zay, sahintsahira marè satria ta hanao ty marina “amy ty raha iaby.” Tsy voa mafy va tsika laha zay ie? Tsy zay mihintsy! Ino ty raha soa azo ty olo manao ty marina?

FITAHIA AZO TY OLO MANAO TY MARINA

18. Manino ro tsy misy raha soa mandilatsy ty hoe malaza ho manao ty marina?

18 Tsy misy raha soa mandilatsy ty hoe malaza ho manao ty marina noho azo atokisa. Sady afaky hanahaky zay iaby ty olo iaby! Tsy mianky amy fahaiza raha zay, na hanana, na hasoa tarehy, na ty raha hafa tsy ho vitanao. Fe ndre zay, vitsy mpana laza soa io. (Mika 7:2) Mety hokizahin’olo iha lafa manao ty marina. Fe hisy avao koa ty tea raha zay, ka hanjary hatòky noho hanaja anao. Vavolombelo Jehovah maro ro nahita fa nahasoa azy ty fanaova ty marina. Maharitsy amy ty asany ohatsy ie, fa tsy voaroaky manahaky ty mpiasa tsy manao ty marina. Nisy koa nahita asa satria mpiasa manao ty marina ro tena ilà ty mampiasa.—Henteo ty efajoro hoe “ Manao ty Marina Avao va Aho?

19. Hanao akory ty feo ty fieritseretantsika noho ty fifandrambesantsika amy Jehovah, laha manao ty marina avao tsika?

19 Ndre zay ndre tsy zay, le ho hitanao fa mandramby kadò bevata, iha laha manao ty marina. Tsy hiany ty eritserianao, ohatsy, iha. Hoy ty asa Paoly: ‘Matoky zahay fa mana feo ty fieritsereta soa.’ (Hebreo 13:18) Tsy maintsy ho araky Babantsika be fitiava iny ty lazanao, satria teany ty olo manao ty marina. (Vakio ty Salamo 15:1, 2; Ohabolana 22:1.) Tsy hiala amy fitiavany iha, laha manao ty marina. Misy raha bevata mandilatsy any zay koa va? Hodinihintsika henanizao ty raha raiky mifandramby amy zay: Ty fahità Jehovah ty asa.

^ feh. 9 Mety hananga komitim-pitsarà ty anti-panahy amy fiangona ao laha misy Kristiana zatsy mavandy marè, sady hita hoe manao raha zay mba handay fahavoaza ho ahy ty hafa.

^ feh. 14 Henteo ty Fanazavà Fanampiny hoe “Fandamina Tsy Fifankahazoa amy Resaky Varotsy”, mikasiky ty tokony hatao lafa misy raha manahira amy resaky varotsy.

^ feh. 15 Nampiasàn-drozy hivilia ty karaza vato balansy raiky, le ty raiky hamarota. Nataon-drozy hahazoa tombony raha reo. Mety ho nataon-drozy lavalava na somary mavesabesatsy koa ty tanany raiky amy balansy iny, amy zay ho voan-drozy ty mpivily.