Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 FANAZAVÀ FANAMPINY

Ialao Fahazara Raty Io

Ialao Fahazara Raty Io

Misy olo zatsy mihisahisa ty mahalahilahy na ty mahampela azy. Safosafoeny raha iny na kosekosehiny, le avy amy ty faratampony amy ty fahafinareta ty nofotsy ie. Tsy tea Ndranahary fahazara io, sady mahavy ty olo tsy hieritseritsy laha tsy ze hahafa-po ty vatany avao. Mandoto say koa raha zay. Mety hanjary hieritseritsy ty hafa ho sahala amy fitaova fanaova firaisa ty olo zatsy manao raha zay. Aminy, ty firaisa le tsy fanehoam-pitiava amin’olo roe, fa raha atao laha vo ta hahazo fahafinareta tselatsela noho fahafaham-po amy filà ty nofotsy. Fe, mandalo avao fahafaham-po zay. Tsy mamono “ty fijangajangà, ty fahalotoa, ty filà ty nofotsy” na hoe ty faniria raty amy ty rantsam-batany ao, ty olo mana fahazara io, fa vomaiky manaitsy azy.—Kolosianina 3:5.

Zao ty nisoraty apostoly Paoly: “Ry longo, soa laha ataontsika malio ty vatantsika ho afaky amy ty raha iaby mandoto ty nofotsy noho ty say, ka hanao ze haha faratampony ty fahamasìna amy fahatahora a Ndranahary.” (2 Korintianina 7:1) Ka kivy iha, laha fa mialy ay mba hanoriha safà reo. “Parè hanenga hadisoa” noho hanampy avao Jehovah. (Salamo 86:5; Lioka 11:9-13) Fa soa aloha laha manome tsiny anao ty fonao, sady miezaky hiala amy fahazara raty iny iha, ndre tsy maharesy aza iha kindraiky. Tiarovo  koa fa “bevata mandilatsy ty fontsika Ndranahary, sady mahay ty raha iaby.” (1 Jaona 3:20) Tsy ty fahotàntsika avao ro hita Jehovah, fa ty maha tsika antsika mihintsy. Zay ro mahavy azy hahaferinay antsika lafa misoloho ty famindram-pony tsika. Le ka vozaky mihintsy, sady miambany no misoloho aminy, manahaky ty asa ajà mamonjy ty babany lafa misy raha manahira azy rey. Hanampy anao hana feo ty fieritsereta malio Jehovah. (Salamo 51:1-12, 17; Isaia 1:18) Mila manao raha mifanaraky amy ty vavaky ataonao koa iha. Hiezaky, ohatsy, iha tsy hijanjy na hanenty na hamaky raha tiva, sady tsy hiaraky amy ty nama raty. *

Laha tsy resinao fahazaran-draty iny, le miresaha amy babanao na reninao kristiana, na nama matotsy noho soa fanahy. *Ohabolana 1:8, 9; 1 Tesalonianina 5:14; Titosy 2:3-5.

^ feh. 2 Fianakavia maro ro mametraky ty ordinaterany amy pilasy mora hita, mba ho voaara-maso ty fampiasà azy. Eo koa ty mivily programan’ordinatera mangalaky hoazy ty raha raty. Ndre zay, le tsy misy amy programa rey atao hoe azo antoky tanteraky.

^ feh. 1 Misy soso-kevitsy azo orihy amy lahatsoratsy hoe “Manontany ny Tanora hoe... Ahoana no Hialako Amin’io Fahazarana Io?”, amy Mifohaza! Novambra 2006 noho amy boky Manontany ny Tanora—Torohevitra Mahasoa, Boky Voalohany, pejy 178-182.