Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

“Mijanòna amy Fitiava Ndranahary Ao”

 TOKO 1

“Ho Zao Fitiava a Ndranahary Zao“

“Ho Zao Fitiava a Ndranahary Zao“

“Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.” —1 JAONA 5:3.

1, 2. Ino ty mahavy anao ho tea Jehovah Ndranahary?

TEANAO va Ndranahary? Laha fa nanoka ty vatanao ho azy iha, le azo antoky fa hamaly hoe: “Eka, teako ie.” Marina ty ahinao! Ara-dalàna laha teantsika Jehovah. Tsy raha ino moa fitiavantsika a Ndranahary io fa ty valy ty fitiavany antsika avao. Ho zao ty ivolana ty Baiboly azy: “Tsika tea, satria [Jehovah] ro nitea antsika voalohany.”—1 Jaona 4:19.

2 Jehovah ro nanao raha voalohany mba hampisehoany ty fitiavany antsika. Nameany tany soasoa toy tsika hipetrahantsika. Manome antsika ty raha ilàntsika koa ie. (Matio 5:43-48) Ty vatan-draha marè, le manampy antsika mba hifandramby soa aminy koa ie. Nameany antsika ty Safàny, ty Baiboly zay. Tsy vitany zay, fa mbo manasa antsika hivavaky aminy koa ie, sady mampitamà fa hijanjy antsika noho hanome ty fanahiny mba hanampy antsika. (Salamo 65:2; Lioka 11:13) Fa mbo mandilatsy raha iaby rezay, le nirahiny hanafaky antsika amy ota noho fahafatesa, azy Anany teany marè iny. Bevata vatany ty fitiava Ndranahary antsika!—Vakio ty Jaona 3:16; Romanina 5:8.

3. a) Ino ty raha mila ataontsika mba tsy hialà amy fitiava Ndranahary ao? b) Ino ty fanontanea bevata mila eritseretintsika, le aia ty misy ty valiny?

 3 Tea Jehovah handramby hasoava zisiky farany baka amy ty fitiavany tsika. Fe mianky amintsika avao raha zay. Mampirisiky antsika ho zao ty Safà Ndranahary: “Mijanòna amy fitiava Ndranahary ao ... sady mijilo ty fiaina zisiky farany.” (Joda 21) Ty safà hoe “mijanòna” le midika fa misy raha mila ataontsika mba tsy hialà amy fitiava Ndranahary ao. Tokony ho hita soa hoe mamaly ty fitiavany antsika tsika. Ka mila eritseretintsika fanontanea bevata toy, hoe: ‘Manao akory ty hampisehoako fa tea a  Ndranahary aho?’ Mamaly raha zay ty safà apostoly Jaona hoe: “Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.” (1 Jaona 5:3) Mila dinihintsika soa ty dika safà reo, satria teantsika hatoro a Ndranahary fa le vatany tea azy tsika.

“HO ZAO FITIAVA A NDRANAHARY ZAO”

4, 5. a) Ino ty teany hovolany amy hoe “fitiava a Ndranahary”? b) Nombia ro nanomboky nitiry tam-ponao tao ty fitiava a Ndranahary? Tantarao.

4 Ino ty tea Jaona hovolany amy hoe “fitiava a Ndranahary”? Tsy ty fitiava Ndranahary antsika ro nivolaniny eo, fa ty fitiavantsika azy. Tiaronao va hoe nombia ro nanomboky nitiry tam-ponao tao ty fitiava a Ndranahary?

Lafa baka nanoka ty vatanao ho ahy Jehovah noho natao batisa iha, le hanoriky ty safàny avao amy ty fiainanao

5 Tiarovo tse moa fa tamy iha vo nianatsy ty marina mikasiky Jehovah noho ty raha teany hatao, le nanomboky nino azy iha. Nanjary nihainao fa laha vo nateraky iha, le fa mpanota tafasaraky amy Ndranahary. Fe nihainao koa fa nirahy Jehovah, Kristy, mba hahafahanao ho velo zisiky farany, sady ho lavorary ndraiky manahaky Adama. (Matio 20:28; Romanina 5:12, 18) Nihanazava taminao fa nanao soro bevata Jehovah lafa naniraky ty Anany teany marè mba ho maty ho ahinao. Nidosiky ty fonao raha zay, ka le nanomboky nitea a Ndranahary, azy nampiseho fitiava bevata zay taminao iny iha.—Vakio ty 1 Jaona 4:9, 10.

6. Manao akory ty ahaiza hoe teantena vatany ty olo raiky? Nahavy anao hanao ino ty fitiavanao a Ndranahary?

6 Fe mbo fanomboha ty fitiava vatany a Ndranahary avao fihetseham-po zay. Tsy raha vitany fihetseham-po avao fitiava zao. Tsy ampy koa ty mivola hoe: “Teako Jehovah.” Manahaky ty finoa ty fitiava vatany, ka mila porofoe noho atoro amy atao. (Jakoba 2:26) Laha teantena ty olo raiky, le ataontena ze hahafalifaly azy. Ka lafa  namahatsy tam-ponao tao ty fitiava Jehovah, le nataonao ze hahafalifaly Babanao an-danitsy any iny. Vavolombelo Jehovah vita batisa va iha? Tea a Ndranahary vatany iha sady mivahatsy aminy, kanao nandramby fanapahan-kevitsy farany ze bevata zay. Nanoka ty vatanao ho ahy Jehovah iha mba hanao ty sitrapony, le nasehonao raha zay lafa natao batisa iha. (Vakio ty Romanina 14:7, 8.) Hanampy anao hamita voady bevata io ty tohy safà apostoly Jaona iny.

“LE TY HANORIHANTSIKA TY DIDINY”

7. Ino iaby ty sisany amy ty didy Ndranahary? Ino ty dika ty hoe manoriky didy rey?

7 Nivola Jaona fa laha tea a Ndranahary tsika le ‘hanoriky ty didiny.’ Ino iaby ty didy Ndranahary? Nanome didy mivanta maro Jehovah, amy Baiboly ao. Raràny, ohatsy, ty manao mamo, mijangajanga, manompo sampy, mangalatsy noho mavandy. (1 Korintianina 5:11; 6:18; 10:14; Efesianina 4:28; Kolosianina 3:9) Manoriky ty didy Ndranahary tsika laha miay mifanaraky amy fitsipiky mikasiky ty fandaisam-bata reo.

8, 9. Manao akory ty hahaizantsika hoe ino ty mampifalifaly Jehovah lafa tsy manome lalàna mivanta ty Baiboly? Manomeza ohatsy.

8 Fe tsy ampy ty manoriky didy mivanta namea Jehovah rey, laha ta hampifaly azy. Tsy ta hipiritsy antsika Jehovah, le tsy nametraky lalàna amy ty karazan-draha iaby amy ty fiainantsika andavanandro. Ka tsy mitamà hahita didy mivanta amy Baiboly ao tsika, amy ze kila raha miseho amy ty fiainantsika. Ka manao akory ty hahaiza hoe ino ty mampifalifaly Jehovah? Misy fomba ahaiza mazava soa ty hevitsy Ndranahary, ty amy Baiboly ao. Lafa mianatsy Baiboly tsika le hahay hoe ino ty tea Jehovah, le ino ty halany. (Vakio ty Salamo 97:10; Ohabolana 6:16-19) Manjary mazava amintsika hoe toe-tsay noho lily manao  akory ro mahazo hatò aminy. Arakaraky ty hahaizantsika ty toetsy Ndranahary noho ty fandinihany raha, ro hahaizantsika mandramby fanapahan-kevitsy noho manao raha mifanaraky amy ty itiavany azy. Ka ndre tsy misy lalàna mivanta mikasiky ty raha mahazo antsika aza ty amy Baiboly ao, le azontsika atao matetiky ty mamantatsy “ze sitrapo Ndranahary.”—Efesianina 5:17.

9 Mety va, ohatsy, ty manenty filma na fandahara amy tele misy hasatà na fandaisam-bata maloto? Tsy misy didy mandrara raha zay mivanta ty amy Baiboly ao. Fe, le mila lalàna mivanta va tsika vo hahay any zay? Fa haintsika ty hevitsy Jehovah mikasiky raha reo. Ambara ty Safàny mazava soa hoe: “Le vatany halany ty olo tea hasatà.” (Salamo 11:5) Volaniny ao koa hoe: “Hohelofa Ndranahary ty mpijangajanga noho ty mpandranto.” (Hebreo 13:4) Afaky mamantatsy ty sitrapo Jehovah tsika, lafa mandiniky safà reo. Zay ro mahavy antsika tsy hanenty fandahara mampiseho raha hala Ndranahary rey, lafa miala voly. Haintsika fa falifaly Jehovah lafa tsy manenty fandaisam-bata maloto tsika, ndre eritserety tontolo toy sahala amy fialam-boly tsy manahy raha rey. *

10, 11. Manino tsika ro mifily hanoriky ty safà Ndranahary? Manao akory ty tokony hanorihantsika ty safàny?

10 Ino ty tena antony anorihantsika ty didy Ndranahary? Nanino tsika ro ta hanoriky ty fomba fihevitsiny avao amy ze raha ataontsika? Tsy hoe mba hilaisa sazy avao ro anaovantsika raha zay, na mba tsy ho tratsy ty loza mahazo ty olo tsy midary ty sitrapo Ndranahary. (Galatianina 6:7) Tsy zay! Mifily hanoriky ty safà Jehovah tsika satria zay ro fomba soa marè hampisehoantsika fa tea azy vatany tsika. Ta hahazo hatò aminy tsika, manahaky ajà  mila hatò amy babany io. (Salamo 5:12) Jehovah ro Babantsika, sady tea azy tsika. Tsy misy raha mampanitranitra noho mahafa-po antsika mandilatsy ty fahaiza hoe “mahazo hatò amy Jehovah” ty fiainantsika.—Ohabolana 12:2.

11 Hita baka amy zay fa tsy hoe tsy tom-pontsika avao ty anorihantsika safà. * Tsy mifilifily ze didy horihintsika tsika, na hanao ho zao hoe laha mety amintsika ie le horihintsika, fa laha somary sarotsarotsy na manahira antsika le hengàntsika. Mifanohitsy amy zay fa ‘manoriky safà amy ty fontsika’ tsika. (Romanina 6:17) Hoy ty mpanao salamo: “Ho teatea ty aiko ty didinao, sady fa sandra niteako avao koa.” (Salamo 119:47) Manahaky azy tsika, satria teantsika vatany ty manoriky ty safà Jehovah. Ekentsika fa maeva orihy ze kila raha volaniny, sady zay ty ilàny. (Deoteronomia 12:32) Nanoriky ty safà Jehovah tanaty ty tao maro Noa, mba hanaporofoany ty fitiavany azy. Teantsika laha manahaky ty raha volany Baiboly mikasiky azy, ty hovolany Jehovah mikasiky antsika. Ho zao ty volaniny ao: “Nanovy Noa iaby ze raha nampanovy Ndranahary azy. Zay vatany ty nataony.”—Genesisy 6:22.

12. Ino ro mampifalifaly vatany ty fo Jehovah?

12 Manao akory Jehovah lafa manoriky safà an-tsitrapo tsika? Mivola ty Safàny fa ‘mampifalifaly ty fony’ raha zay. (Ohabolana 27:11) Marina vatany va fa mampifalifaly ty fo azy Tompo Fara Tampony iny ty fanorihantsika ty safàny? Le zay vatany, sady mazava ty antony! Namea Jehovah fahalalaha hifily tsika. Midika raha zay fa afaky mifily tsika, na hanoriky ty safàny, na tsy hanoriky.  (Deoteronomia 30:15, 16, 19, 20) Laha mifily an-tsitrapo hanoriky ty safà Babantsika an-danitsy any iny tsika, ka fo feno fitiava ro manosiky antsika hanao raha zay, le mampifalifaly azy vatany tsika. (Ohabolana 11:20) Mifily ty fiaina soa marè koa tsika amy zay.

“TSY MAVESATSY TY DIDINY”

13, 14. Manino ro azo volany hoe ‘tsy mavesatsy ty didy Ndranahary’? Hazavao amy ohatsy.

13 Mampahery biby ty safà apostoly Jaona hoe: ‘Tsy mavesatsy ty didy Ndranahary.’ * (1 Jaona 5:3) Ho zao ty ivolana raha io amy Baiboly Fandikan-teny Anglisy Vaovao ao: “Tsy mampitseky antsika ty didiny.” Tsy tafahoatsy na mampijaly ty lalàna Jehovah. Tsy mitaky raha tsy ho vitan’olombelo tsy lavorary ie.

14 Eritsereto, ohatsy, hoe hifindra trano ty olo raiky namanao biby. Mangataky anao ie mba hanampy azy hitao enta. Maro ty enta mila tatery. Ty ilany maivaiva ka ndre olo raiky avao le fa afaky manday azy. Fa ty ilany mavesatsy ka le olo roe vo mahaleo azy. Fa nifilifilỳ namanao iny ze enta teany handesinao. Mbo hampandesiny anao avao va ty enta sisany, laha fa hainy hoe mavesatsy marè aminao? Aha. Tsy hengàny hilogologo any zay raiky avao iha, tsy no ho azon-draha. Tsy maniraky antsika hanoriky didy sarotsy loatsy amintsika koa Jehovah, satria be fitiava noho soa fanahy. (Deoteronomia 30:11-14) Tsy hampandesiny enta mavesatsy manahaky zay mihintsy tsika. Hay Jehovah hoe ino ty raha tsy ho vitantsika, satria “hainy soa ty nanamboara antsika, sady tiarony fa lemboky avao tsika.”—Salamo 103:14.

15. Manino tsika ro afaky matoky fa natao handrambesantsika hasoava bevata ty didy Jehovah?

 15 Tsy mavesatsy mihintsy ty didy Ndranahary, fa natao handrambesantsika hasoava bevata. (Vakio ty Isaia 48:17.) Afaky nivola tamy Israelita reo Mosesy hoe: “Nandidy antsika hanaraky fitsipiky iaby reo Jehovah, sady nandidy ty hatahora any Jehovah Ndranaharintsika, mba hahitantsika hasoava zisiky farany, le ho velo tsika, manahaky ty androany.” (Deoteronomia 6:24) Afaky matoky koa tsika fa mieritseritsy ze hahasoa antsika Jehovah, kanao nanome lalàna. Nainany tsika handramby hasoava maharitsy, le zisiky farany ndraỳ! Tsy haharaty antsika mihintsy ty didy Jehovah. Tsy iankania raha zay, satria mana fahendrea tsy mety tampitsy ie, ka hainy ze hahasoa antsika vatany. (Romanina 11:33) Jehovah koa ro faratampony, laha ty fitiava ro resahy. (1 Jaona 4:8) Baka amy fitiava iaby ze kila raha volaniny noho ataony. Fitiava koa ro ifotora ty didy iaby ameany ty mpanompony.

16. Manino tsika ro afaky manoriky safà avao, ndre tsy lavorary noho miay amy tontolo raty toy?

16 Tsy midika raha zay hoe mandeha ho azy avao ty manoriky ty safà Ndranahary. Tsy maintsy mialy ay tsika mba tsy ho voatao tontolo fa mivaliky sady “ambany fahefà azy raty iny eo” toy. (1 Jaona 5:19) Mila mialy amy ty vatantsika tsy lavorary koa tsika, mba tsy ho voatariky handika ty lalàna Ndranahary. (Romanina 7:21-25) Fe afaky mandresy tsika laha tea a Ndranahary. Tahỳ Jehovah ty olo manoriky ty safàny, satria ta hampiseho hoe tea azy vatany. Ameany ty fanahiny masy “ze manoriky ty safàny amy maha mpanday azy.” (Asan’ny Apostoly 5:32) Mahavy antsika hamokatsy toetsy soa fanahy io, le toetsy reo koa manampy antsika hanoriky safà avao.—Galatianina 5:22, 23.

17, 18. a) Ino ty horesahy amy boky toy ato, le ino iaby ty tokony hotiarovintsika lafa mandiniky raha reo? b) Ino ty hodinihintsika amy toko manaraky ao?

 17 Horesahy amy boky toy ato ty torolala Jehovah noho ty fitsipikiny mikasiky ty fandaisam-bata, voho ty fomba maro ahaiza ty sitrapony. Misy raha bevata maromaro mila tiarovintsika, lafa mandiniky raha zay. Tokony ho tiarontsika fa tsy manao forosè antsika hanoriky ty lalànany noho ty torolalany Jehovah, fa fanoriha an-tsitrapo ro teany. Ka halino koa fa mahasoa antsika manomboky henanizao, sady ahazoantsika fiaina zisiky farany, ty fomba fiaina tea Jehovah hananantsika. Le soa ho tiarontsika koa fa ty fanorihantsika ty safà Jehovah amy ty fontsika iaby ro fomba soa marè ampisehoantsika hoe tea azy vatany tsika.

18 Tea antsika Jehovah, ka nanome antsika feo ty fieritsereta, mba hahaizantsika manavaky ty soa amy ty raty. Fe mila mampiofana ty feo ty fieritseretantsika tsika, mba hahavy raha io ho mpitari-dala azo atokisa. Zay ro hodinihintsika amy toko manaraky ao.

^ feh. 9 Henteo ty Toko faha-6 laha ta hahay mikasiky ty fomba hifilia fialam-boly mahasoa iha.

^ feh. 11 Ndre ty demonia aza manoriky safà tsy tom-po. Lafa nandidy an-drozy hiboaky baka amin’olo sisany Jesosy, le voatery naneky ty fahefàny rozy ka nanoriky ty safàny, ndre tsy an-tsitrapo aza.—Marka 1:27; 5:7-13.

^ feh. 13 Mbo safà grika nampiasà Jaona io avao koa ro nadika hoe “enta mavesatsy” amy Matio 23:4 ao. Ty lalàna be kalakalaony noho ty fomban-draza nanerea ty Mpanora-dalàna noho Fariseo ty olo ro nitea Matio hovolany amy hoe “enta mavesatsy.”