Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino ty Azonao Ianara amy Baiboly Ao?

 TOKO FAHA-18

Tokony Hanoka ty Fiainako ho a-Ndranahary Noho Hatao Batisa va Aho?

Tokony Hanoka ty Fiainako ho a-Ndranahary Noho Hatao Batisa va Aho?

1. Ino ty mety hoeritseretinao lafa nianaranao soa boky toy?

FA MARO ty fahamarina baka amy Baiboly ao nianaranao lafa nianatsy boky toy. Teo, ohatsy, ty fampitamàna-Ndranahary fiaina zisiky farany, ty hoe manao akory ty olo lafa maty, noho ty hoe mbo tamàny ho velo ndraiky ty maty. (Mpitoriteny 9:5; Lioka 23:43; Jaona 5:28, 29; Apokalypsy 21:3, 4) Mety fa nanomboky namonjy ty fivoriani-Vavolombeloni-Jehovah iha, sady mino fa marina ty fivavahan-drozy. (Jaona 13:35) Mety fa niezaky nifandramby marìny tamy Jehovah  iha, sady fa nanapa-kevitsy hanompo azy. Ka mety hieritseritsy iha hoe: ‘Ino amy zay ty tokony hataoko mba hanompoa a Ndranahary?’

2. Nanino ty lahilahy Etiopiana raiky ro naniry hatao batisa?

2 Nisy lahilahy raiky nivelo tamy androni-Jesosy, nieritseritsy ho zay. Tafarani-nameloma ani-Jesosy ndraiky, le nisy mpianatsini-Jesosy mana anara Filipo nitory tamy lahilahy io. Niporofoni-Filipo taminy, fa Jesosy ro Mesia. Nidosiky ty foni-lahilahy Etiopiana io marè ty raha nianarany ka avy le nivola ie hoe: “Ndroa misy rano, ka ino ty misaka ahy tsy hatao batisa?”—Asan’ny Apostoly 8:26-36.

3. a) Ino ty didy nameani-Jesosy ty mpanori-dia azy? b) Akory ty tokony hanaova batisa olo raiky?

3 Ampianarini-Baiboly fa laha ta hanompo ani-Jehovah iha, le tokony hatao batisa. Nivola tamy mpanori-dia azy reo Jesosy hoe: “Anovo mpianatsy ty olo amy firenena iaby any, ka anovo batisa.” (Matio 28:19) Nanome modely koa Jesosy lafa natao batisa. Naepoky tanatini-rano tao Jesosy, fa tsy natè tan-dohany teo avao rano iny. (Matio 3:16) Tsy maintsy aepoky na ajobo an-drano koa ty Kristiana henanizao lafa atao batisa.

4. Midika ino ho ahin’olo hafa ty batisanao?

4 Lafa atao batisa iha, le atoronao amin’olo fa ta ho nama-Jehovah iha, sady ta hanompo azy vatany. (Salamo 40:7, 8) Ka laha zay, mety hivola iha hoe ‘Ino ty tokony hataoko mba ho afaky hatao batisa aho?’

FAHAIZA NOHO FINOA

5. a) Ino tse ty raha mila ataonao alohani-hanaova batisa anao? b) Manino ro tena ilà ty fivoria Kristiana?

5 Mila mahay ani-Jehovah noho Jesosy tse iha alohani-hanaova batisa anao. Fa nanomboky nanao raha  zay iha lafa nianatsy tamy boky toy. (Vakio Jaona 17:3.) Fe mbo tsy ampy zay. Volanini-Baiboly fa tsy maintsy ‘feno fahaiza marina soa’ mikasiky ty sitraponi-Jehovah iha. (Kolosianina 1:9) Tena ilà ty famonjeanao fivoriani-Vavolombeloni-Jehovah tsy tampaky satria hanampy anao hifandramby marìny amy Jehovah raha zay.—Hebreo 10:24, 25.

Mila mianatsy Baiboly iha alohani-hanaova batisa anao

6. Mila mahay kila raha iaby amy Baiboly ao va iha vo azo atao batisa?

6 Tsy ilàni-Jehovah ho hainao iaby kila raha amy Baiboly ao zay vo hatao batisa iha. Tsy nitamàniny hahay kila raha iaby Etiopiana iny vo natao batisa. (Asan’ny Apostoly 8:30, 31) Mbo hianatsy mikasiky a Ndranahary avao tsika zisiky farany. (Mpitoriteny 3:11) Fe mba mila mahay noho maneky ty fampianara fototsy amy Baiboly ao iha vo atao batisa.—Hebreo 5:12.

7. Nanampy anao tamin’ino ty fianara Baiboly?

7 Volanini-Baiboly fa: “Laha tsy amy finoa, le tsy misy raha azo atao mba hampifalifalea ani-Jehovah.” (Hebreo 11:6) Midika zay, fa mila manam-pinoa tse iha vo atao batisa. Zay, ohatsy, ty nataon’olo sisany ta Korinto tany. Nampianarini-mpanori-dia ani-Jesosy rey tse rozy, le “nanjary mpino, ka natao batisa.” (Asan’ny Apostoly 18:8) Mitovy amy zay koa fa ty fianaranao Baiboly ro nanampy anao hino ty raha ampitamàni-Ndranahary noho hino koa fa manan-kery hanafaky antsika amy ota noho fahafatesa ty vilim-panavota nataoni-Jesosy.—Josoa 23:14; Asan’ny Apostoly 4:12; 2 Timoty 3:16, 17.

RESAHO AMIN’OLO HAFA TY FAHAMARINA

8. Ino ty mahavy anao ta hiresaky amin’olo ty raha nianaranao?

8 Maro ty raha fa nianaranao amy Baiboly ao sady  hitanao fa mahasoa ty fiainanao raha zay, ka hatanjaky ty finoanao. Manjary ta hiresaky amin’olo hafa mikasiky ty raha ianaranao iha. (Jeremia 20:9; 2 Korintianina 4:13) Fe ia ro tokony hiresahanao?

Tokony hahavy anao hivola ty raha inoanao ty finoa

9, 10. a) Ia tse ty azonao iresaha ty raha nianaranao? b) Ino ty tokony hataonao laha ta hitory miaraky amy fiangona iha?

9 Mety ta hiresaky amy fianakavianao, ty namanao, ty olo tanà raiky aminao, na ty mpiaraky miasa aminao mikasiky ty raha nianaranao iha. Mety zay, fe soa laha soa fanahy iha lafa manao ani-raha zay. Mety ho afaky hanomboky hitory miaraky amy fiangona iha. Lafa parè hanao raha zay iha, le mivolana amy mpampianatsy Baiboly anao. Volano ie hoe ta hitory miaraky amy fiangona iha. Lafa hitany fa parè iha sady miay mifanaraky amy Baiboly, le hisy anti-panahy roe amy fiangona ao hifanao fotoa aminareo roe.

10 Ino ty raha hiseho amy fotoa io? Hiresaky aminao anti-panahy reo mba hahità laha azonao noho inoanao ty fampianara fototsy amy Baiboly ao, sady laha ekènao noho orihinao amy fiainanao andavanandro raha zay. Ho hita koa amy zay laha ta ho Vavolombeloni-Jehovah vatany iha. Tiarovo fa mikarakara ty olo kiraidraiky amy fiangona ao ty anti-panahy, anatiny zay koa iha. Ka matahotsy miresaky amin-drozy. (Asan’ny Apostoly 20:28; 1 Petera 5:2, 3) Lafa vita zay le hivola aminao anti-panahy reo laha afaky manomboky mitory miaraky amy fiangona iha.

11. Manino ro vatan-draha ty manao fiovà alohani-hitoria miaraky amy fiangona?

11 Mety hanazava aminao ty anti-panahy fa mbo misy fiovà mila ataonao alohani-hitorianao miaraky amy fiangona. Manino ro vatan-draha ty fiovà? Satria  misolo tena ani-Jehovah tsika lafa mivola amin’olo mikasiky a Ndranahary, ka mila mana fomba fiaina manome voninahitsy azy.—1 Korintianina 6:9, 10; Galatianina 5:19-21.

MIBEBAHA KA MIMPOLIA

12. Manino ro mila mibebaky iaby ty olo?

12 Mbo misy raha hafa tsy maintsy ataonao zay vo azo atao batisa iha. Nivola apostoly Petera hoe: “Mibebaha, ka mimpolia mba hamonoa ty fahotànareo, mba hisiani-fotoa mamelombelo baka amy Jehovah.” (Asan’ny Apostoly 3:19) Manao akory mibebaky zao? Tena maneny amy ty raha raty natao ty hoe mibebaky. Laha nijangajanga, ohatsy, iha le tokony hibebaky. Fe ndre miezaky marè iha mba hanaova ty soa avao, le mbo mila mibebaky avao, satria mpanota iaby tsika ka mila mangataky amy Ndranahary mba hanenga ty hadisoantsika.—Romanina 3:23; 5:12.

13. Manao akory ‘mimpoly’ zao?

13 Ampy va ty maneny amy raha raty nataonao? Aha. Nivola Petera fa mila ‘mimpoly’ koa iha. Midika zay hoe mila mandà ze karaza fandaisam-bata raty iaby iha, sady manao raha soa avao. Mba eritsereto moa hoe mandeha an-tany lavitsy mbo tsy nihitanao any iha. Arakinao tampoky fa diso lala iha. Ino ty hataonao? Tsy maintsy mandeha moramora tse iha, le mijano, bakeo mimpoly amy lala tokony hombanao iny any. Manao ho zay koa iha lafa mianatsy Baiboly. Mety ho hitanao fa misy fahazara na raha sisany mila ajano amy ty fiainanao. Ka misalasala ‘mimpoly’ fa anovo ze fiovà tokony hatao, le engao any amy zay ty raha raty.

 MANAOVA FANOKANAM-BATA

Fa nampitamà ani-Jehovah va iha hoe hanompo azy?

14. Akory ty hanaovanao ty fanokanam-batanao ho a Ndranahary?

14 Misy raha bevata hafa tokony hataonao koa alohani-hanaova batisa anao. Tsy ino zay fa ty fanokanam-bata ho ani-Jehovah. Manao akory fanokanam-bata zao? Mivavaky iha, le mampitamà ani-Jehovah fa hanompo azy raiky avao sady ty sitrapony ro hataonao voalohan-draha amy fiainanao.—Deoteronomia 6:15.

15, 16. Ino ty hahavy olo raiky hanokam-bata ho ani-Jehovah?

15 Manahaky olo manao voady amy mariazy rey tsika lafa mampitamà ani-Jehovah fa hanompo azy raiky avao. Mba vetsevetseo moa olo mampiaraky rey. Lafa haini-lahilahy iny soa ampela iny, le manjary teany ka ta hampakatsy azy ho valy ie. Fanapahan-kevitsy bevata raha zay sady mitaky andraikitsy, fe ataony avao satria teany ampela iny.

16 Arakaraky ty ianaranao mikasiky ani-Jehovah ro hahavy anao ho tea azy noho haniry hanao ze farany vitanao amy fanompoa azy. Hahavy anao hanao vavaky manoka raha zay, le hampitamà azy iha fa hanompo azy. Mivola ty Baiboly fa tsy maintsy “mandà ty vatany” ty olo ta hanori-dia ani-Jesosy. (Marka 8:34) Ino ty dikani-zay? Midika zay hoe ataonao amy pilasy voalohany ty fanoriha ty safàni-Jehovah. Vatan-draha marè mandilatsy ty fanirianao noho ty raha kendrènao ty raha teani-Jehovah.—Vakio 1 Petera 4:2.

KA MATAHOTSY TSY HAHAVITA

17. Manino ty olo sisany ro tsy manokam-bata ho ani-Jehovah?

17 Tsy manokam-bata ho ani-Jehovah ty olo sisany, satria matahotsy tsy no hampitamà ani-Jehovah bakeo  tsy hahavita hanompo azy. Mety tsy ta handiso fanantenà ani-Jehovah rozy, na mety mieritseritsy hoe laha tsy manokam-bata ho azy, le tsy hampanino ani-Jehovah ze ataon-drozy.

18. Ino ty hanampy anao tsy hatahotsy tsy no handiso fanantenà ani-Jehovah?

18 Laha tea ani-Jehovah iha, le tsy hatahotsy hanatanteraky ty raha nampitamàninao azy. Hiezaky iha hanao ze farany vitanao. (Mpitoriteny 5:4; Kolosianina 1:10) Tsy hieritseritsy sasy iha amy zay hoe sarotsy marè ty manao ty raha teany. Nanoratsy apostoly Jaona hoe: “Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.”—1 Jaona 5:3.

19. Manino iha ro tsy tokony hatahotsy hanokam-bata ho ani-Jehovah?

19 Tsy handiny ho lavorary iha vo hanokam-bata ho ani-Jehovah. Tsy ilàny hanao raha tsy ho vitantsika tsika. (Salamo 103:14) Hampeany iha mba tsy hanao raha raty. (Isaia 41:10) Matokisa ani-Jehovah amy ty fonao iaby, le “hataony mandeha soa ty fiainanao.”—Ohabolana 3:5, 6.

FANAMBARÀ ANKAVORIA

20. Ino ty dinga tokony hataonao lafa baka nanokam-bata ho ani-Jehovah?

20 Hitanao va hoe fa parè hanokam-bata ho ani-Jehovah iha? Lafa baka nanokam-bata ho ani-Jehovah iha, le fa parè hilitsy amy dinga manaraky. Tokony hatao batisa iha.

21, 22. Akory ty hanaovanao “fanambarà ankavoria” ty finoanao?

21 Volano amy anti-panahy mpandrindra amy fiangona misy anao fa baka nanokam-bata ho ani-Jehovah iha ka ta hatao batisa. Hanendry anti-panahy  hiaraky midiniky aminao ty fampianara fototsy amy Baiboly ao ie afarani-zay. Laha hitan-drozy hoe parè iha, le hovolanin-drozy hoe afaky atao batisa iha amy fivoriambeni-Vavolombeloni-Jehovah ho avy. Hisy lahateny hanazava ty dikani-batisa amy fivoriambe io. Hametraky fanontanea roe amy ze hatao batisa amy zay ty mpandahateny. Hanao “fanambarà ankavoria”  ty finoanao iha lafa mamaly fanontanea reo.—Romanina 10:10.

22 Hatao batisa amy zay iha, le haepoky an-drano ao iaby ty vatanao. Batisa io ro hampiseho amin’olo iaby fa nanokam-bata ho ani-Jehovah iha sady nanjary Vavolombeloni-Jehovah.

 MAMPISEHO INO TY BATISANAO?

23. Ino ty dikani-hoe atao batisa “amy anarani-Baba, noho amy anarani-Anaky, voho amy anarani-fanahy masy”?

23 Nivola Jesosy hoe hatao batisa “amy anarani-Baba, noho amy anarani-Anaky, voho amy anarani-fanahy masy” ty mpanori-dia azy. (Vakio Matio 28:19.) Ino ty dikani-zay? Midika zay hoe maneky ty fahefàni-Jehovah noho ty anjara asani-Jesosy amy fikasà-Ndranahary iha, sady maneky ty fomba ampiasàni-Jehovah ty fanahy masy mba hanaova ty sitrapony.—Salamo 83:18; Matio 28:18; Galatianina 5:22, 23; 2 Petera 1:21.

Lafa atao batisa iha, le mampiseho fa ta hanao ty sitraponi-Jehovah

24, 25. a) Mampiseho ino ty batisa? b) Ino ty hodinihintsika amy toko farany amy boky toy?

24 Misy heviny tena bevata ty batisa. Lafa iha aepoky an-drano any, le midika hoe tampitsy eo ty fiainanao taloha, na nengànao any. Fa lafa aboaky baka anaty rano ao iha, le hanomboky fiaina vaovao ka hanao ty sitrapo-Ndranahary. Mampiseho raha zay hoe hanompo ani-Jehovah iha manomboky eo. Tiarovo fa tsy nanoka ty vatanao ho an’olo, na fikambana, na asa iha. Natokanao ho ani-Jehovah ty vatanao.

25 Hanampy anao hanasoa ty fifandrambesanao amy Jehovah ty fanokanam-batanao. (Salamo 25:14) Tsy hoe ho avotsy ty olo raiky satria vita batisa. Nivola ty apostoly Paoly hoe: “Miezaha marè avao miaraky amy tahotsy noho fangitikitiha, mba hahazoanareo fanavota.” (Filipianina 2:12) Vo fanomboha avao ty batisa. Ka akory ty hahavy anao hariniky ani-Jehovah avao? Hamaly ani-zay ty toko farany amy boky toy.