Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino ty Azonao Ianara amy Baiboly Ao?

 TOKO 1

Ia Ndranahary Zao?

Ia Ndranahary Zao?

1, 2. Ino ty fanontanea fapetrakin’olo matetiky?

BE FANONTANEA ty ajà. Mety hanazava raha amin-drozy iha, fe mbo manontany avao rozy hoe: ‘Fa manino?’ Ndre mamaly ndraiky iha, le mety mbo hanontany avao rozy hoe: ‘Fa manino kay?’

2 Manontany iaby tsika ndre be ndre kely. Mety hanontany tsika hoe ino ty hohany androany? Ino ty akanjo hisikina? Ino ty raha hovilỳ? Na mety mana fanontanea bevata mikasiky ty fiaina na ty hoavy tsika. Fe lafa sarotsy ty mahita valiny mahafa-po amy fanontanea reo, le mety tsy hila sasy tsika.

3. Manino ty ankamaroan’olo ro mieritseritsy fa tsy afaky mahita ty valini-fanontanea bevata amy fiainany?

3 Mamaly fanontanea bevata amy fiainantsika rey va ty Baiboly? Eka hoy ty ilany. Fe mieritseritsy koa rozy hoe sarotsy azo ty raha volanini-Baiboly. Ty mpampianatsy noho ty mpanday fivavaha avao ro ataon-drozy mahay mamaly ani-raha rey. Ty sisany koa menatsy hivola hoe tsy mahay aho. Ka iha, manao akory ty hevitsinao?

4, 5. Ino iaby ty fanontanea bevata teanao ho hay? Manino iha ro tokony hila ty valini-raha reo?

4 Azo antoky fa teanao ho hay ty valini-fanontanea hoe: Ino ty antony mampisy ahy? Manao akory tena lafa maty? Manao akory Ndranahary zao? Mivola Jesosy, azy mpampianatsy malaza iny hoe: “Mangataha avao, le hamea nareo. Milà avao, le hahita nareo. Paipaiho  avao le hovohà nareo.” (Matio 7:7) Ka maneky mihintsy laha tsy hitanao ty valiny fanontaneanao.

5 Laha tsy mieny iha fa ‘mila avao’, le hahita ty valini-fanontanea reo amy Baiboly ao. (Ohabolana 2: 1-5) Tsy sarotsy hita ty valiny. Hanampy anao ho falifaly amy fiainanao henanizao noho hana hoavy soasoa koa ty raha ianaranao. Ndao tsika handiniky fanontanea raiky manahiran-tsay ty ankamaroan’olo.

MIDARY ANTSIKA VA NDRANAHARY?

6. Manino ty olo sisany ro mivola fa tsy midary ty fijalea mahazo an-drozy Ndranahary?

6 Maro ty mieritseritsy fa tsy midary antsika Ndranahary. Mieritseritsy rozy fa tsy hanahaky ani-zao ty fiaina laha midary antsika ie. Hita mbaiambaia ty aly, ty fankalaina, ty fahantrà. Marary noho mijaly ty olo, le misy koa ty maty. Misy mivola hoe: ‘Laha midary antsika Ndranahary, manino ro tsy tamperiny ty fijalea?’

7. a) Ino ty ampianarini-mpitariky fivavaha reo ty olo, ka mahavy an-drozy hino fa raty fanahy Ndranahary? b) Manino tsika ro tsy tokony hanome tsiny a Ndranahary mihintsy amy ty raha raty miseho?

7 Mpitariky fivavaha reo kindraiky ro mahavy ty olo hino fa raty fanahy Ndranahary. Lafa misy loza, le mivola rozy fa zay ty sitrapo-Ndranahary. Hita amy safà zay fa Ndranahary ro amean-drozy tsiny. Fe mampianatsy ty Baiboly fa tsy Ndranahary mihintsy ro mahavy ty raha raty. Mivola ty Jakoba 1:13 fa tsy mitsapa ndre ia ndre ia amy raha raty Ndranahary. Volaniny ao hoe: “Lafa misy fitsapà, le ao tsy hisy hivola hoe: ‘Fitsapà baka amy Ndranahary toy.’ Satria Ndranahary tsy azo tsapà amy raha raty, noho tsy mitsapa ndre ia ndre ia  amy raha raty koa.” Midika zay, fa ndre tsy sakanany aza ty raha raty, le tsy ie mihintsy ro mampisy raha rey. (Vakio Joba 34:10-12.) Toy misy ohatsy.

8, 9. Manino ro tsy rariny laha amea tsiny Ndranahary amy ty raha manahira antsika? Manomeza ohatsy.

8 Mba eritsereto moa hoe misy tanora raiky miaraky mipetraky amy babany noho reniny. Tea azy biby babany io, sady nampianatsy azy hahay hanapa-kevitsy soa. Fe tsy nidary ty safàni-babany ie, ka niala tan-trano ao. Tsy nanaka azy babany. Nanao raha tsy mety ie, le niazon-draha. Hameanao tsiny va babany satria tsy nisakanany anakiny io lafa niala tan-trano ao? Tsy zay mihintsy! (Lioka 15:11-13) Manahaky babany io koa Ndranahary, tsy sakanany ty olo lafa mifily hanohitsy azy noho hanao raha raty. Ka lafa misy loza miseho, le tokony ho tiarovintsika, fa tsy Ndranahary ro nahavy ani-raha zay. Tsy rariny vatany laha amea tsiny Ndranahary.

9 Misy antony kanao mbo engà-Ndranahary hiseho ty raha raty. Hianaranao amy Toko faha-11 ao ty raha volanini-Baiboly mikasiky ani-raha zay. Fe afaky matoky iha fa tea antsika Ndranahary, sady tsy baka aminy ty raha manahira mahazo antsika. Ie raiky avao aza ro afaky mandamy ani-raha zay.—Isaia 33:2.

10. Manino tsika ro afaky matoky fa hareni-Ndranahary iaby kila raha simba nataon’olo raty fanahy?

10 Masy Ndranahary. (Isaia 6:3) Malio noho soa iaby ze raha nataony, ka afaky matoky azy tsika. Tsy mitovy amy zay ty olombelo, satria mety hanao diso. Ndre ty mpanday farany ze soa aza, le tsy mana hery hanamboara ty raha simba nataon’olo raty fanahy. Tsy misy olo mana hery mandilatsy a-Ndranahary. Mana hery hanarena  ty raha simba nataon’olo raty fanahy ie, sady hataony raha zay. Hafahiny tsy ho eo sasy ty raha raty.—Vakio Salamo 37:9-11.

MANAO AKORY NDRANAHARY LAFA MAHITA OLO MIJALY?

11. Manao akory Ndranahary lafa mahita anao mijaly?

11 Manao akory Ndranahary lafa mahita ty raha miseho an-tany etoy noho ty raha mahazo anao? Mivola ty Baiboly fa “tea rariny” Ndranahary. (Salamo 37:28) Midika zay fa dinihiny soa ty raha miseho an-tany etoy, ndre soa ndre raty. Halany ty mahita olo mijaly. Mivola ty Baiboly fa “nalahelo ty fony” lafa nahita fa feno faharatia ty tan-tany etoy taloha. (Genesisy 6:5, 6) Tsy niova Ndranahary. (Malakia 3:6) Mivola ty Baiboly fa tena midary anao ie.—Vakio 1 Petera 5:7.

Ampianarini-Baiboly fa Jehovah ro Mpamoro kila raha iaby, sady be fitiava ie

12, 13. a) Ino ty mahavy antsika ho tea noho hidary olo, le manao akory tsika lafa mahita ty fijalea an-tany etoy? b) Manino tsika ro matoky fa hafahi-Ndranahary ty fijalea noho ty tsy rariny?

12 Mivola koa ty Baiboly fa natao-Ndranahary mitovy soraky aminy tsika. (Genesisy 1:26) Midika zay fa nataony hana toetsy soa manahaky ty azy tsika. Ka laha malahelo iha lafa mahita olo mijaly, le mbo malahelo marè mandilatsy ani-zay koa Ndranahary lafa mahita ani-raha zay! Manino tsika ro mivola ani-zay?

13 Ampianarini-Baiboly fa “fitiava Ndranahary.” (1 Jaona 4:8) Fitiava io ro mahavy azy hanao raha. Tsika koa manam-pitiava satria manahaky azy. Eritsereto toy: Hafahinao iaby va ty fijalea noho ty tsy rariny an-tany etoy laha vitanao ty manao raha zay? Mazava ho azy fa eka ty valiny, satria tea olo iha. Ka Ndranahary? Hafahiny iaby ty fijalea noho ty tsy rariny satria teany tsika, sady mana hery hanaova raha zay ie. Afaky  matoky iha, fa ho tanteraky iaby ze raha nampitamàni-Ndranahary resahy amy fanombohani-boky toy! Fe mba hahavy anao hatòky fa hiseho vatany raha ampitàmany reo, le mila hainao soa Ndranahary.

TEA-NDRANAHARY HAHAY AZY IHA

Volaninao amin’olo teanao hinamà ty anaranao. Volani-Ndranahary amintsika amy Baiboly ao ty anarany

14. Ia ty anara-Ndranahary, le manino tsika ro tokony hampiasa raha io?

14 Laha ta hinama amin’olo raiky iha, ino matetiky ty raha voalohany volaninao aminy? Ty anaranao. Mana anara va Ndranahary? Maro ty fivavaha mivola fa Ndranahary na Tompo ty anarany, fe tsy anara raha reo fa anaram-boninahitsy manahaky hoe “mpanjaka” na “prezidà.” Fa nivolani-Ndranahary tamintsika fa Jehovah ty anarany. Mivola ty Salamo 83:18 hoe: “Iha raiky avao, azy mana anara hoe Jehovah iny, ro Farany Anabo amy tany toy iaby.” Nampiasa anara-Ndranahary io in’arivony ty mpanoratsy Baiboly. Tea-Ndranahary ho hainao ty anarany, sady teany hampiasanao. Volaniny aminao ty anarany soa hanjary namany iha.

15. Ino ty dikani-anara hoe Jehovah?

15 Misy dikany bevata ty anara-Ndranahary hoe Jehovah.  Midika zay fa afaky manatanteraky ze raha ampitamàniny noho ty raha teany hatao ie. Tsy misy afaky manaka azy. Jehovah avao ro afaky mana anara io. *

16, 17. Ino ty dikani-hoe a) “Farany Ze Mahery”? b) “Mpanjakani-zisiky farany”? d) “Mpamoro”?

16 Fa nivakintsika tamy Salamo 83:18 tao fa ‘Jehovah raiky avao ro Farany Anabo.’ Mivola koa ty Apokalypsy 15:3 hoe: “Bevata sady mahatseriky ty asanao Jehovah  Ndranahary, azy Farany Ze Mahery iny. Mahity noho marina ty lalanao, azy Mpanjakani-zisiky farany iny.” Ino ty dikani-anaram-boninahitsy hoe “Farany Ze Mahery”? Midika raha io fa Jehovah ro mahery marè mandilatsy kila raha iaby. Kaihy hoe “Mpanjakani-zisiky farany” koa ie, satria fa nisy avao ie bakany bakany zay. Hazavà amy Salamo 90:2 ao koa fa fa Ndranahary ie bakany bakany zay, le ho zisiky farany. Mahatseriky vatany raha zay!

17 Jehovah raiky avao ro Mpamoro. Mivola ty Apokalypsy 4:11 hoe: “Maeva handramby voninahitsy noho haja voho hery iha Jehovah, iha ro Ndranaharinay, satria iha ro namoro kila raha iaby, sady ty sitraponao ro nampisy noho namorona raha reo.” Niforonini-Jehovah iaby kila raha iaby, ohatsy hoe ty anjely an-danitsy any, ty basia, ty voankazo noho ty fia.

 AFAKY HO NAMA-JEHOVAH VA IHA?

18. Manino ty olo sisany ro mieritseritsy fa tsy ho afaky ho nama-Ndranahary mihintsy? Ino ty volanini-Baiboly mikasiky raha zay?

18 Lafa mamaky mikasiky toetsy miavaky ananani-Jehovah rey ty olo sisany, le matahotsy sady mieritseritsy hoe ‘Ndranahary zao mahery noho manam-boninahitsy marè, sady lavitsy biby any, ka ino ty hidareany ahy?’ Fe tea-Ndranahary hieritseritsy manahaky ani-zay va tsika? Aha. Ta hifandramby amintsika Jehovah. Mivola ty Baiboly fa “tsy lavitsy antsika kiraidraiky ie.” (Asan’ny Apostoly 17:27) Tea-Ndranahary hamonjy azy iha, sady mampitamà ie fa ‘hamonjy anao’ koa.—Jakoba 4:8.

19. a) Ino ty azonao atao mba hanjary nama-Ndranahary iha? b) Ino ty toetsi-Ndranahary teanao marè?

19 Ino ty azonao atao mba hanjary nama-Ndranahary iha? Nivola Jesosy hoe: “Mba hahavy an-drozy ho velo zisiky farany, le ilàn-drozy ty mianatsy hahay mikasiky anao, azy Ndranahary marina raiky avao iny noho Jesosy Kristy, azy nirahinao iny.” (Jaona 17:3) Tohizo ty fianaranao, le hahay mikasiky a Ndranahary noho Jesosy iha. Afaky hahazo fiaina zisiky farany iha amy zay. Fa nianarantsika, ohatsy, hoe “fitiava Ndranahary.” (1 Jaona 4:16) Kanefa mana toetsy soa maro hafa koa ie. Volanini-Baiboly hoe “mamindra fo noho soa fanahy, tsy mora meloky, atsiky hasoa fanahy feno fitiava sady tea fahamarina marè” Jehovah. (Eksodosy 34:6) “Soa toetsy noho parè hanenga hadisoa” ie. (Salamo 86:5) Manam-pahareta noho tsy mivaliky Ndranahary. (2 Petera 3:9; Apokalypsy 15:4) Hahay raha maro mikasiky toetsy soa ananany reo iha lafa mamaky ty mikasiky azy amy Baiboly ao.

20-22. a) Tsy afaky mihamarìny a Ndranahary va iha satria tsy hita maso ie? b) Ino ty tokony hataonao laha misy olo ta hanaka anao tsy hianatsy Baiboly?

 20 Tsy afaky mihamarìny a Ndranahary va iha satria tsy hita maso ie? (Jaona 1:18; 4:24; 1 Timoty 1:17) Lafa mamaky mikasiky ani-Jehovah amy Baiboly ao iha, le ho hainao fa misy vatany ie. (Salamo 27:4; Romanina 1:20) Lafa mihamahay mikasiky ani-Jehovah iha, le hitombo ty fitiavanao azy sady harìny azy iha.

Tea ty anakiny ty baba, fe mandilatsy ani-zay ty fitiavani-Babantsika an-danitsy any iny antsika

21 Ho hainao fa Babantsika Jehovah. (Matio 6:9) Ie ro nanome fiaina antsika, ka teany hana fiaina farany ze soa koa tsika. Zay ro tea ty baba soa fanahy ho ahi-ty anakiny. (Salamo 36:9) Volanini-Baiboly vatany fa afaky ho nama-Jehovah iha. (Jakoba 2:23) Mba diniho moa hoe Jehovah, azy Mpamoro ty kila raha iaby iny ro ta hinama aminao!

22 Mety hisy olo ta hanaka anao tsy hianatsy Baiboly. Mety matahotsy ie hoe hiova fivavaha iha. Fe, ka engà hisy hanaka anao tsy ho nama-Jehovah. Ie ro farany ze soa amy Nama iaby.

23, 24. a) Manino iha ro tokony hanontany avao? b) Ino ty hodinihintsika amy toko manaraky?

23 Mety hisy raha tsy hazava aminao lafa mianatsy Baiboly iha, fe ka menatsy manontany. Milà fanampea. Mila miambany manahaky ty ajà tsika hoasani-Jesosy. (Matio 18:2-4) Be fanontanea ty ajà. Tea-Ndranahary hahita ty valini-fanontanea manahira anao iha. Diniho soa ty Baiboly, soa ho azonao antoky fa marina vatany ty raha ianaranao.—Vakio Asan’ny Apostoly 17:11.

24 Ty fianara Baiboly ro fomba farany ze soa hianara mikasiky ani-Jehovah. Hodinihintsika amy toko manaraky ao hoe ino ty tsy mampitovy ty Baiboly amy boky hafa.

^ feh. 15 Laha tsy misy anara hoe Jehovah ty amy Baibolinao ao na laha mila fanazavà fanampiny mikasiky ty dikani-anara io noho ty fanonona azy iha, le vakio ty Fanazavà Hevitsy 1.