Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino ty Azonao Ianara amy Baiboly Ao?

 TOKO FAHA-19

Mijanòna Marìny ani-Jehovah Avao

Mijanòna Marìny ani-Jehovah Avao

1, 2. Aia ty ahitantsika fiarova henanizao?

ERITSERETO hoe mandeha miboaky iha bakeo mitsioky marè ty andro. Mihamainty ty lanitsy, bakeo manomboky misy helatsy noho hotroky. Mizinja amy zay ty ora, ka mila pilasy hialofa iha. Hetra iha lafa nahita pilasy maiky noho azo antoky.

2 Mitovy amy zay koa ty raha iainantsika henanizao satria miharaty tontolo toy. Mety hieritseritsy iha hoe: ‘Aia lahy ty misy pilasy azo antoky?’ Nanoratsy ho zao ty mpanao salamo raiky: “Hivola amy Jehovah aho hoe: ‘Fialofako iha, sady fiarova matanjaky ho ahy, sady Ndranahariko azy atokisako iny.’ ” (Salamo 91:2) Tsy afaky antsika ty raha manahira henanizao. Fe afaky manafaky ani-zay Jehovah sady mampitamà antsika hoavy soasoa.

3. Akory ty ampisehoantsika hoe Jehovah ro fialofantsika?

3 Akory ty fomba iarovani-Jehovah antsika? Afaky manampy antsika hiatriky raha sarotsy ie, sady mahery marè mandilatsy ze olo ta hanao raha raty antsika. Ndre misy raha raty mahazo antsika aza henanizao, le azo antoky hoe harenini-Jehovah raha zay amy hoavy. Mampirisiky ho zao ty Baiboly: “Mijanòna amy fitiava-Ndranahary ao.” (Joda 21) Mila mijano marìny a Ndranahary avao tsika soa hahazo ty fanampeany lafa misy raha sarotsy. Fe akory ty hanaovantsika ani-zay?

 INO TY HAVALINAO TY FITIAVANI-JEHOVAH?

4, 5. Akory ty nampisehoani-Jehovah hoe teany tsika?

4 Mila haintsika hoe manao akory ty fitiavani-Jehovah antsika soa tsika hijano marìny azy avao. Vetsevetseo moa ty raha iaby fa nataoni-Jehovah ho antsika. Nameany tany soasoa misy karazan-kazo noho biby soasoa tsika, sady nameany hany matsiro noho rano malio. Natorony antsika amy Baiboly ao koa ty anarany noho ty toetsy soany. Mandilatsy raha iaby zay, le nirahiny hanome ty ainy tan-tany etoy Anakiny teany marè iny, mba hampisehoany hoe teany tsika. (Jaona 3:16) Mahavy antsika hitamà raha soa amy hoavy soro nataony zay.

5 Nananga ty Fanjakàni-Mesia Jehovah. Tsy ho ela le hanafaky ty fijalea iaby fanjakà an-danitsy any io. Hovàny ho paradisa tany toy, le hilamy soa noho ho sambatsy zisiky farany ty olo iaby. (Salamo 37:29) Hita koa hoe tea antsika Jehovah satria mampianatsy antsika ty fomba fiaina tena soa. Manasa antsika hivavaky aminy koa ie, sady parè hijanjy ty vavakintsika avao. Nasehoni-Jehovah mazava soa hoe teany ty kiraidraiky amintsika.

6. Ino ty havalinao ty fitiavani-Jehovah?

6 Ino koa ty tokony havalinao ty fitiavani-Jehovah? Asehò aminy hoe mankasitraky ty raha iaby nataony taminao iha. Mampalahelo fa tsy mahay mankasitraky ty ankamaroan’olo henanizao. Fa nanao ho zay avao ty olo tamy Jesosy tan-tany etoy. Nisy fotoa ie nitaha boka folo, fe raiky avao ty nisaotsy azy. (Lioka 17:12-17) Teantsika laha manahaky lahilahy raiky nisaotsy ani-Jesosy iny tsika. Ta hankasitraky ani-Jehovah avao tsika.

7. Tokony hanao akory ty fitiavantsika ani-Jehovah?

 7 Mila asehontsika koa fa tea ani-Jehovah tsika. Nivola tamy mpianatsiny Jesosy hoe tsy maintsy tea ani-Jehovah amy ty fony iaby, noho amy ty vatany iaby voho amy ty sainy iaby rozy. (Vakio Matio 22:37.) Ino ty teany hovolany amy raha zay?

8, 9. Akory ty hampisehoantsika amy Jehovah hoe teantsika ie?

8 Ampy va ty mivola avao hoe tea azy? Aha. Laha tea azy amy fontsika iaby noho ty vatantsika iaby voho ty saintsika iaby tsika, le hasehontsika amy ty raha ataontsika raha zay. (Matio 7:16-20) Ampianarini-Baiboly mazava soa fa laha tea ani-Jehovah tsika, le hanoriky ty didiny. Sarotsy va zay? Aha, satria ‘tsy mavesatsy ty didini-Jehovah.’—Vakio 1 Jaona 5:3.

9 Sambatsy noho afa-po tsika lafa manoriky ty safàni-Jehovah. (Isaia 48:17, 18) Fe ino ty hanampy antsika hijano marìny ani-Jehovah avao? Aleo zay hodinihintsika.

MAMONJEA ANI-JEHOVAH AVAO

10. Manino iha ro mila manohy mianatsy mikasiky ani-Jehovah?

10 Ino ty nahavy anao ho nama-Jehovah? Lafa nianatsy Baiboly iha, le nihanahay azy ka nanomboky ninama taminy. Manahaky afo tsy teanao ho maty finamà io. Mila katà avao ty afo soa hirehitsy. Manahaky ani-zay koa fa mila manohy mianatsy mikasiky ani-Jehovah iha mba hahasoa ty finamànareo.—Ohabolana 2:1-5.

Manahaky afo ty fitiavanao ani-Jehovah, ka mila ataonao ze hampirehitsy azy

11. Ino ty ho vokatsini-fianara Baiboly aminao?

11 Hahita raha tena midosiky ty fonao iha laha manohy mianatsy Baiboly avao. Henteo moa ty raha tsapani-mpianatsini-Jesosy roe lafa nanazavàny ty faminania amy Baiboly ao. Nivola rozy hoe: “Tsy sahala nisy afo niroaroa va tam-pontsika tao tamin’ie niresaky  tamintsika tan-dala teny, ka nanazava soa ty Soratsy Masy tamintsika?”—Lioka 24:32.

12, 13. a) Mety hanao akory ty fitiavantsika a Ndranahary? b) Akory ty tsy hahafaty ty fitiavantsika ani-Jehovah?

12 Voadosiky ty foni-mpianatsini-Jesosy reo lafa nahatakatsy ty Soratsy Masy. Ho falifaly manahaky ani-zay koa iha, lafa manomboky mahatakatsy ty raha volanini-Baiboly. Nanampy anao hahay ani-Jehovah noho ho tea azy raha zay. Tsy teanao hihamanintsy fitiava io.—Matio 24:12.

13 Laha vo manjary nama-Ndranahary iha, le mila miezaky hahasoa ty finamànareo avao. Tsy maintsy manohy mianatsy mikasiky an-drozy amy Jesosy noho mametsivetsy ty raha nianaranao iha sady manoriky raha rey amy fiainanao. (Jaona 17:3) Anontaneo ho zao ty vatanao lafa mianatsy na mamaky Baiboly iha: ‘Ino ty ianarako mikasiky ani-Jehovah baka amy raha toy? Manino  aho ro tokony ho tea azy amy ty foko iaby noho ty vatako iaby?’—1 Timoty 4:15.

14. Manino ty vavaky ro mampitombo ty fitiavantsika ani-Jehovah?

14 Miresaky matetiky amin’olo raiky tena namanao iha, ka mahasoa ty finamànareo raha zay. Manahaky ani-zay koa fa ho tea ani-Jehovah marè tsika laha miresaky matetiky aminy, amy alalani-vavaky. (Vakio 1 Tesalonianina 5:17.) Fanomeza soa baka amy Babantsika an-danitsy any iny ty vavaky. Tokony horesahintsika aminy avao ze tena am-pontsika ao. (Salamo 62:8) Tsy tokony hataontsika tsianjery ty vavakintsika. Tena ho tea ani-Jehovah marè tsika laha manohy mianatsy Baiboly avao sady manao vavaky baka am-po.

MIRESAHA MIKASIKY ANI-JEHOVAH

15, 16. Manao akory ty fahitànao ty asa fitoria?

15 Laha ta hijano marìny ani-Jehovah avao tsika, le mila miresaky ty finoantsika amin’olo. Tombontsoa miavaky ty firesaha mikasiky ani-Jehovah. (Lioka 1:74) Nameani-Jesosy andraikitsy io iaby ty tena Kristiana. Tokony hitory mikasiky vaovao soani-Fanjakà-Ndranahary iaby tsika kiraidraiky. Fa nanao an’io va iha?—Matio 24:14; 28:19, 20.

16 Tsapani-apostoly Paoly hoe lafovily ty asa fitoria, ka nikaihiny hoe “hanana.” (2 Korintianina 4:7) Ty firesaha amin’olo mikasiky ani-Jehovah noho ty fikasàny ro asa farany bevata azonao atao. Manompo ani-Jehovah iha laha manao an’io, sady lafovily aminy ze vitanao. (Hebreo 6:10) Mahasoa anao noho ty olo mijanjy anao ty fitoria, satria manampy anao noho ty olo hafa hamonjy ani-Jehovah noho hahazo fiaina zisiky farany. (Vakio 1 Korintianina 15:58.) Mbo misy asa hafa mahafa-po mandilatsy ani-zay va?

17. Manino ro meky ty asa fitoria?

 17 Asa meky ty fitoria. Tokony ‘hotorintsika tsy misy hataky andro ty safà.’ (2 Timoty 4:2) Mila maharè mikasiky ty Fanjakà-Ndranahary ty olo. Hoy ty Baiboly: “Marìny ty andro bevatani-Jehovah. Fa marìny ie, sady mihamamonjy malaky marè.” “Tsy ho tara” ty farany. (Zefania 1:14; Habakoka 2:3) Tsy ho ela vatany, le horavàni-Jehovah tontolo ratini-Satana toy. Mila ampiambenintsika soa tse ty olo alohani-zay, soa ho afaky hanompo ani-Jehovah.

18. Manino tsika ro tokony hanompo ani-Jehovah miaraky amy ty tena Kristiana?

18 Teani-Jehovah hanompo azy miaraky amy ty tena Kristiana tsika. Hoy ty Baiboly: “Mba mifandiniha tsika mba handrisiky ho amy fitiava noho asa soa, ka tsy hahafoy ty fiarahantsika mivory, manahaky ty sisany fa zatsy tsy mivory, fa hifampahery, vo handraky moa fa hitanareo fa mihamarìny ty andro.” (Hebreo 10:24, 25) Tokony hanao ze azontsika atao tsika mba hanatreha ty fivoria iaby. Afaky mifandrisiky noho mifampahery tsika lafa mivory.

19. Ino ty hanampy antsika ho tea ty rahalahy noho anabavintsika Kristiana?

19 Hahita nama soa iha lafa manatriky fivoria. Hanampy anao hanompo ani-Jehovah rozy. Misy rahalahy noho anabavy sankarazany, manao ze fara heriny amy fanompoa ani-Jehovah manahaky anao koa ho hitanao any. Tsy lavorary manahaky anao avao rozy. Ka laha sendra manao hadisoa rozy, le tokony ho parè hanenga hadisoa iha. (Vakio Kolosianina 3:13.) Ty toetsy soani-rahalahy noho anabavy avao ro ifantoho, fa manampy anao ho tea an-drozy noho hihamarìny ani-Jehovah zay.

 TY TENA FIAINA

20, 21. Ino “tena fiaina” zao?

20 Teani-Jehovah hana fiaina farany ze soa iaby ty namany. Ampianarini-Baiboly fa tena ho hafa mihintsy ty fiainantsika amy hoavy, fa tsy hanahaky ty hitantsika henanizao.

Teani-Jehovah hahazo tavy “ty tena fiaina” iha. Hahazo ani-raha zay va iha?

21 Hiay zisiky farany tsika amy hoavy, fa tsy 70 na 80 tao avao. Ho azontsika tavy ty “fiaina zisiky farany” amy paradisa ao, satria ho salama soa noho hiada sady ho sambatsy tsika. Zay ro kaihini-Baiboly hoe “tena fiaina.” Mampitamà Jehovah fa hanome antsika ty tena fiaina, fe mila manao ze azontsika atao tsika mba “hivahatsy marè” amy raha io.—1 Timoty 6:12, 19.

22. a) Akory ty ‘hivaharantsika marè amy tena fiaina’? b) Manino fiaina zisiky farany io ro tsy karama?

22 Akory ty ‘hivaharantsika marè amy tena fiaina’? Tokony “hanao raha soa, noho hanan-kanana amy ty asa soa” tsika. (1 Timoty 6:18) Midika zay fa mila manoriky ze raha nianarantsika tamy Baiboly ao tsika. Fe ndre zay, tsy baka amy ezaky ataontsika ro ahazoantsika ty tena fiaina. Tsy karama mihintsy raha io fa fanomeza baka amy Jehovah, mba hampisehoany ty “hasoa fanahiny tsy manam-paharoe” ho ani-mpanompony tsy mivaliky. (Romanina 5:15) Tena teani-Babantsika an-danitsy any hamea ani-fanomeza io ty mpanompony tsy mivaliky.

23. Manino iha ro mila mifily soa henanizao?

23 Anontaneo ty vatanao hoe: ‘Manompo a Ndranahary araky ty itiavany azy va aho?’ Laha hitanao fa mbo misy raha tokony hovànao, le avy le anovo. Ho fiarova ho antsika Jehovah, laha matoky azy tsika sady manao ze azontsika atao mba hanoriha ty safàny noho hiantehera aminy. Harovany ty vahoakiny tsy mivaliky anatini-andro farany mampanjeky haratia amy  tontoloni-Satana toy. Bakeo hataony azo antoky fa hiay zisiky farany amy Paradisa ao tsika araky ty fa nampitamàniny. Afaky hahazo tena fiaina iha laha mahay mifily soa henanizao!