Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino ty Azonao Ianara amy Baiboly Ao?

 TOKO FAHA-10

Ty Marina Mikasiky ty Anjely

Ty Marina Mikasiky ty Anjely

1. Manino tsika ro mila mianatsy mikasiky ty anjely?

TEANI-JEHOVAH hahay mikasiky ty fianakaviany tsika. Anatini-fianakaviany ty anjely satria kaihy hoe “anaki-Ndranahary” rozy amy Baiboly ao. (Joba 38:7) Manao ino anjely reo? Nanao akory ty nanampean-drozy ty olo taloha tany? Mbo afaky manampy antsika koa va rozy henanizao?—Henteo Fanazavà Hevitsy 8.

2. Ia ro namoro ty anjely? Firy ty anjely niforony?

2 Tokony ho haintsika hoe ia ro namoro ty anjely. Mivola ty Kolosianina 1:16 hoe lafa baka namoro ani-Jesosy, Jehovah le ‘namoro ty raha hafa iaby an-danitsy any noho an-tany etoy.’ Tafilitsy amy zay ty anjely. Firy rozy? Mivola ty Baiboly fa misy an-jatony tapitrisa ty anjely.—Salamo 103:20; Apokalypsy 5:11.

3. Ino ty raha volanini-Joba 38:4-7 mikasiky ty anjely?

3 Volanini-Baiboly koa fa namoro ty anjely tse Jehovah vo namoro ty tany. Volany amy bokini-Joba ao fa nifalifaly biby rozy lafa nivita ty tany. Fianakavia nifandramby soa rozy, sady niaraky nanompo ani-Jehovah.—Joba 38:4-7.

MANAMPY TY VAHOAKI-NDRANAHARY TY ANJELY

4. Ino ty ahaizantsika fa kinto amin’olombelo ty anjely?

4 Kinto amin’olombelo ty anjely bakany bakany zay. Maninto an-drozy koa ty raha teani-Jehovah hatao amy tany toy noho amin’olombelo. (Ohabolana 8:30, 31; 1 Petera 1:11, 12) Azo antoky fa nalahelo biby rozy lafa tsy nanoriky safà Adama noho Eva. Tsy maintsy  malahelo mandilatsy ani-zay rozy henanizao, lafa mahita fa tsy manoriky ty safàni-Jehovah ty ankamaroan’olo. Fe falifaly biby rozy lafa misy olo mibebaky noho mimpoly amy Ndranahary. (Lioka 15:10) Tena tean-drozy ty olo manompo a Ndranahary. Mampiasa anjely, Jehovah mba hanampea noho hiarova ty mpanompony an-tany etoy. (Hebreo 1:7, 14) Hanenty ohatsy vitsivitsy mikasiky ani-zay tsika.

“Naniraky ty anjeliny Ndranahariko, ka nampihily vavani-liona rey.”—Daniela 6:22

5. Ino ty fa nataoni-anjely mba hanampea ty mpanompo-Ndranahary?

 5 Nandefa anjely roe Jehovah mba hanampy ani-Lota noho ty fianakaviany hiala malaky, lafa horavà Sodoma noho Gomora. (Genesisy 19:15, 16) Taonjato maro tafarani-zay, le natoraky tanaty lavaky misy liona Daniela mpaminany, fe tsy nanahy ie satria ‘naniraky ty anjeliny Ndranahary, le nampihily ty vavani-liona rey.’ (Daniela 6:22) Mbo naniraky anjely koa Jehovah tafara atoy mba hanafaky ani-apostoly Petera baka an-gadra ao. (Asan’ny Apostoly 12:6-11) Nanampy ani-Jesosy koa ty anjely tamy ie tan-tany etoy. Lafa nivita batisa, ohatsy, ie le “nikarakara azy ty anjely.” (Marka 1:13) Nisy anjely raiky koa “nampahery azy” talohani-hamonoa azy.—Lioka 22:43.

6. a) Akory ty ahaizantsika fa manampy ty vahoaki-Ndranahary ty anjely henanizao? b) Ino ty fanontanea hovaleantsika?

6 Tsy miseho amin’olo sasy ty anjely henanizao. Fe mbo ampiasà-Ndranahary avao rozy mba hanampea ty mpanompony. Mivola ty Baiboly hoe: “Ty anjelini-Jehovah le mipetraky manodidy ze olo matahotsy Azy, sady manavotsy azy.” (Salamo 34:7) Manino tsika ro mila arova? Satria misy fahavalo tena mahery ta hanimba antsika. Ia zao? Nanao akory ty nampisy azy? Manao akory ty animban-drozy antsika? Mba hamalea fanontanea reo, le hohenteantsika hoe ino ty raha niseho tafara kelikelini-namorona ani-Adama noho Eva.

FAHAVALO TSY HITA MASO

7. Nanao akory ty olombelo lafa nifitahini-Satana?

7 Nianarantsika tamy Toko faha-3 tao fa nanohitsy a Ndranahary ty anjely raiky satria ta hotompoe. Satana Devoly ty ikaihani-Baiboly azy. (Apokalypsy 12:9) Teani-Satana tsy hanoriky ty safà-Ndranahary koa ty olo.  Nivoafitaky Eva le tsy nanoriky safà, bakeo voafitakiny koa ty ankamaroan’olo tafarani-zay. Fe, nisy ty tsy nivaliky tamy Jehovah mihintsy, manahaky ani-Abela, Enoka, noho Noa.—Hebreo 11:4, 5, 7.

8. a) Ino ty nahavy ty anjely sisany hanjary demonia? b) Ino ty nataoni-demonia rey mba tsy hahafaty an-drozy lafa niavy ty Ranobe?

8 Nisy anjely nanohitsy a Ndranahary tamy androni-Noa, le niala baka an-danitsy any. Nijotso tan-tany etoy rozy le niova ho olombelo. Ino ty antony? Ta hanambaly rozy. (Vakio Genesisy 6:2.) Kanefa tsy mahazo manao ani-zay ty anjely. (Joda 6) Raty fanahy noho nasiaky marè nanahaky anjely raty reo koa ty ankamaroan’olo tamy zay. Naripakini-Jehovah ty raty fanahy ka nataony dobo ranobe tany toy iaby. Fe navotany ty mpanompony tsy mivaliky. (Genesisy 7:17, 23) Nimpoly tan-danitsy any ndraiky anjely raty rey satria tsy ta ho maty. Kaihini-Baiboly hoe demonia anjely raty reo. Nanjary nama-Satana Devoly rozy, ka ie ro sefon-drozy.—Matio 9:34.

9. a) Ino ty raha nahazo ty demonia lafa nimpoly tan-danitsy any? b) Ino ty hohenteantsika manaraky?

9 Tsy nekèni-Jehovah ho anatini-fianakaviany sasy demonia rey, satria nanohitsy azy. (2 Petera 2:4) Fa tsy afaky miova ho olombelo sasy rozy, fe mbo “mamitaky ty tany iaby misy olo” avao sady fa maro ty voafitany. (Apokalypsy 12:9; 1 Jaona 5:19) Ndao hohenteantsika hoe akory ty fomba amitahan-drozy olo.—Vakio 2 Korintianina 2:11.

TY FOMBA AMITAHANI-DEMONIA OLO

10. Akory ty amitahani-demonia olo?

10 Mamitaky olo amy fomba sankarazany ty demonia. Mety hifandramby mivanta amy demonia ty olo raiky. Fe mety hamonjy olo koa ie, ohatsy hoe ambiasa  mba hifandrambesa amy demonia. Fe mivola ty Baiboly fa tsy tokony hanao raha misy ifandrambesany amy demonia tsika. (Galatianina 5:19-21) Ino ty antony? Mampiasa fandriky ty mpamandri-boro mba hahazoa voro, le manahaky ani-zay koa demonia reo, mampiasa fitaky rozy mba hamandriha noho hahazoa olo.—Henteo Fanazavà Hevitsy 26.

11. Ino sikily zao, le manino tsika ro tsy tokony hanao ani-raha io?

11 Raiky amy fandriky ampiasàn-drozy ty sikily. Mampiasa hery hafahafa ty olo manao raha io mba hahaiza ty hoavy noho ty raha hafa. Misy, ohatsy, manenty basia mba hahaiza ty hoavy, ao ty mila famantara, manenty karatsy, mampiasa boly kristaly, na mamaky soritsy amy tana. Maro ty mieritseritsy fa tsy mampanino ty manao sikily. Fe tena raty raha io. Aseho amy Baiboly ao, ohatsy, fa miaraky miasa amin’olo mpivola ty hoavy ty demonia. Tantarà amy Asan’ny Apostoly 16:16-18 ao fa nahay naminany ty ajà ampela raiky satria nampeani-demonia mpivola ty hoavy. Tsy afaky nivola ty hoavy sasy ajà ampela iny lafa niroasini-apostoly Paoly demonia iny.

12. a) Manino ro tena raty ty manohatsy mifandramby amy ty maty? b) Manino ty mpanompo-Ndranahary ro tsy manao fombafomba misy ifandrambesany amy demonia mihintsy?

12 Mampiasa fandriky hafa koa ty demonia mba hamandriha olo. Teany hino tsika fa mbo velo mbao ty olo lafa maty sady afaky mifampiresaky amintsika na mampijaly antsika. Mivola, ohatsy, ty mpikaiky angatsy, fa afaky miresaky amin’olo maty rey ie, le mamonjy azy ty olo lafa maty ty longony na ty namany. Mety hivola raha mahakinto mikasiky namany na longony fa nimaty io mpisikily iny, sady mety hangala tahaky feon’olo fa nimaty iny mihintsy aza. (1 Samoela 28:3-19) Manao fombafomba koa ty olo sisany lafa misy olo maty satria  mino rozy fa mbo velo mbao ty olo raiky fa nimaty. Manao fety na manao soro ho ahin’olo fa nimaty rey ohatsy rozy, na manao fombafomba lafa misy maty valy, na manao fiaretan-tory. Misy ifandrambesany amy demonia raha reo ka tsy mandramby anjara amy fombafomba reo ty Kristiana. Mety hovolambolanini-longony na horatiratìn-drozy, na hiatakatahan-drozy ie amy zay. Fe haini-Kristiana fa tsy velo mbao mihintsy ty olo maty. Tsy afaky miresaky aminy mihintsy tsika, sady tsy afaky mampijaly antsika koa ie. (Salamo 115:17) Miambena soa! Ka manohatsy mifandramby amy ty maty na amy ty demonia mihintsy, sady ka manao fombafomba misy ifandrambesany amy demonia mihintsy.—Vakio Deoteronomia 18:10, 11; Isaia 8:19.

13. Manjary manao akory henanizao ty olo natahotsy demonia taloha?

13 Tsy hoe mamitaky avao ty demonia fa mampitahotsy koa. Masiaky marè noho satà mandilatsy bakany bakany zay Satana noho ty demoniany henanizao satria hainy fa ‘sisa kely’ le tsy hengàni-Jehovah ho an-tany etoy sasy rozy. (Apokalypsy 12:12, 17) Fe ndre zay, an-tapitrisany ty olo natahotsy demonia reo taloha, fe nanjary tsy matahotsy an-drozy sasy. Ino ty nahavy raha zay?

TOHERO TY DEMONIA LE HO AFAKY NAREO

14. Ino ty mila ataontsika laha tsy ta hifandramby amy demonia sasy tsika?

14 Resahini-Baiboly hoe ino ty atao laha tsy ta hifandramby amy demonia sasy na ta hanohitsy an-drozy. Nisy nifandramby tamy demonia, ohatsy, ty olo ta Efesosy tao, talohani-nianaran-drozy ty fahamarina. Ino ty nahafaky an-drozy? Mivola ty Baiboly hoe: “Maro tamin’olo zatsy nampiasa mazỳ reo ro namory ty bokiny  sady nanoro azy [tamy afo] tamason’olo iaby teo. Le nisahin-drozy ty mety ho vilini-raha zay, ka hitany fa farantsa volafoty dimy aly.” (Asan’ny Apostoly 19:19) Noroan-drozy iaby ze kila boky mikasiky mazỳ nananan-drozy, satria ta ho Kristiana rozy. Ilà koa ty manao ho zay henanizao. Tokony hariani-ze olo ta hanompo ani-Jehovah ty kila raha misy ifandrambesany amy demonia. Ndre boky zay, ndre gazety, fanentea andro, filma, moziky, fisà, ndre sarini-demonia, ndre sarin’olo. Raha reo ro mahavy olo mieritseritsy hoe tsy manahy ty mazỳ na ty demonia sady soasoa. Anatini-zay koa ty raha isikinan’olo mba hiarovany ty vatany amy raha raty.—1 Korintianina 10:21.

15. Ino koa ty mbo tokony hataontsika mba hanohera ani-Satana noho ty demonia?

15 Tao vitsivitsy tafarani-nanapotehani-Kristiana ta Efesosy tany rey ty boky mazin-drozy, le nanoratsy ty apostoly Paoly hoe mbo mialy ay noho ‘mialy amy anjely raty’ avao rozy. (Efesianina 6:12) Ndre fa noroan-drozy aza ty bokin-drozy, le mbo nanohatsy nampijaly an-drozy avao demonia rey. Ino koa ty mbo tokony hataon-drozy? Nivolanini-Paoly rozy hoe: “Rambeso ty ampinga bevata, tsy ino zay fa ty finoa, fa zay ro hahavitanareo hamono [na hampijano] ty balakititsy mirehitsy iaby, baka amy azy raty iny.” (Efesianina 6:16) Miaro ty maramila mialy ty ampinga, manahaky ani-zay koa fa afaky miaro antsika ty finoa. Laha tena matoky tsika hoe afaky miaro antsika Jehovah, le ho afaky hanohitsy ani-Satana noho ty demonia tsika.—Matio 17:20.

16. Ino ty azontsika atao mba hahavy ty finoantsika ani-Jehovah hatanjaky?

16 Ino ty azontsika atao mba hahavy ty finoantsika ani-Jehovah hatanjaky? Mila mamaky Baiboly sanandro  tsika, sady mila mianatsy matoky hoe hiaro antsika ie. Laha tena matoky ani-Jehovah tsika, le tsy hahavita hampijaly antsika Satana noho ty demonia.—1 Jaona 5:5.

17. Ino koa ty hiaro antsika amy demonia?

17 Mbo nila nanao ino koa Kristiana ta Efesosy tany rey? Feno olo mifandramby amy demonia tamy tanà io. Nivola tamin-drozy Paoly hoe: “Mivavaha avao ndre amy fotoa manao akory ndre amy fotoa manao akory.” (Efesianina 6:18) Nila nangataky fiarova tamy Jehovah amy fotoa iaby rozy. Ka tsika? Feno olo mifandramby amy demonia koa manodidy antsika. Laha zay ie, le mila mangataky ani-Jehovah hiaro antsika koa tsika, sady mila mampiasa ty anarany lafa mivavaky. (Vakio Ohabolana 18:10.) Laha tsy mieny mangataky amy Jehovah hanafaky antsika amy Satana tsika, le hamaly antsika ie.—Salamo 145:19; Matio 6:13.

18, 19. a) Ino ty hanampy antsika handresy ani-Satana noho ty demonia? b) Ino ty fanontanea hovalea amy toko manaraky ao?

18 Afaky hanohitsy ani-Satana noho ty demonia tsika laha tsy manao raha misy ifandrambesany amy demonia sasy, sady miantehitsy amy Jehovah. Tsy tokony hatahotsy an-drozy tsika. (Vakio Jakoba 4:7, 8.) Mbo mahery lavitsy mandilatsy ty demonia Jehovah. Fa nisazìny rozy tamy androni-Noa, le mbo haripakiny amy hoavy. (Joda 6) Tiarovo fa tsy raiky tsika, fa mampiasa ty anjeliny Jehovah mba hiarova antsika. (2 Mpanjaka 6:15-17) Afaky matoky tsika fa afaky mandresy ani-Satana noho ty demonia, satria Jehovah manampy antsika.—1 Petera 5:6, 7; 2 Petera 2:9.

19 Ka laha mampijaly marè manahaky ani-zay ty raha ataoni-Satana noho ty demonia, manino ro mbo tsy aripaki-Ndranahary rozy? Hovalea amy toko manaraky ao fanontanea zay.