Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino ty Azonao Ianara amy Baiboly Ao?

 TOKO FAHA-17

Tombontsoa ty Mivavaky

Tombontsoa ty Mivavaky

Ta hijanjy ty vavakintsika azy “Mpanao ty lanitsy noho ty tany” iny.—Salamo 115:15

1, 2. Araky ty hevitsinao, manino ty vavaky ro fanomeza miavaky, le manino tsika ro mila mahay ty raha resahini-Baiboly mikasiky ty vavaky?

KELIKELY biby ty tany laha ampitovizy amy kila raha iaby misy. Sahala anaka rano mitè indraiky baka anaty sihoa ty fahitàni-Jehovah ty vahoaky amy firenena iaby. (Salamo 115:15; Isaia 40:15) Fe ndre kelikely biby ho zay aza tsika, le mivola ty Salamo 145:18, 19 hoe: “Anilani-ze olo iaby mikaiky ty anarany Jehovah, le ze mikaiky azy araky ty fahamarina. Hotanterahiny ty faniriani-ze matahotsy azy. Hojanjininy rozy lafa mikoiky vonjeo, ka havotany.” Mana tombontsoa miavaky vatany tsika! Jehovah azy Mpamoro farany ze mahery iny ro ta ho namantsika noho ta hijanjy ty vavaky ataontsika. Tombontsoa vatany ty mivavaky sady fanomeza miavaky nameani-Jehovah antsika kiraidraiky.

2 Fe lafa mifanaraky amy ty sitrapony avao ty vavaky ataontsika vo janjininy. Akory ty hanaovantsika ani-zay? Hanenty ty raha resahini-Baiboly mikasiky ty vavaky tsika.

MANINO TSIKA RO MIVAVAKY AMY JEHOVAH?

3. Manino iha ro tokony hivavaky amy Jehovah?

3 Teani-Jehovah hivavaky aminy na hiresaky aminy tsika. Vakio Filipianina 4:6, 7, le ho hitanao fa marina raha zay. Mba vetsevetseo moa, mieritseritsy anao azy Mpanjakani-kila raha iaby iny, sady teany laha resahinao  aminy ty raha mahafaly noho mampalahelo anao noho ze raha manahira anao.

4. Manino ro mihamarè ty finamànao amy Jehovah lafa mivavaky matetiky aminy iha?

4 Manampy antsika hinama soa amy Jehovah ty vavaky. Lafa mifampiresaky matetiky mikasiky ty raha eritseretiny noho ty raha am-pony ao voho ty raha mampiasa loha azy ty mpinama, le manjary mifankatea marè. Ho zay koa ty mivavaky amy Jehovah. Resahiny aminao amy Baiboly ao ty raha eritseretiny noho ty raha baka am-pony ao, voho ty raha hataony amy hoavy. Afaky volaninao aminy matetiky mihintsy aza ze raha iaby am-ponao ao. Lafa manao ani-zay iha, le hihamarè ty finamànareo.—Jakoba 4:8.

VAVAKY JANJININI-JEHOVAH

5. Akory ty ahaizantsika fa misy vavaky tsy janjinini-Jehovah?

5 Tsy ty vavaky iaby ro janjinini-Jehovah. Nivola ho zao tamy Israelita, ohatsy, Jehovah tamy androni-Isaia: “Ndre manao vavaky maro aza nareo le tsy hijanjy aho, satria feno lion’olo ty tananareo.” (Isaia 1:15) Ka laha tsy  miamby soa tsika, le mety hanao raha tsy teani-Jehovah, ka tsy hidary ty vavaky ataontsika ie.

6. Manino ro tena ilà ty finoa? Akory ty hampisehoanao fa inoanao Jehovah?

6 Tsy maintsy mino ani-Jehovah tsika laha teantsika hijanjy ty vavaky ataontsika ie. (Marka 11:24) Hoy apostoly Paoly: “Laha tsy amy finoa, le tsy misy raha azo atao hampifalifalea ani-Jehovah, satria ze mamonjy azy le tsy maintsy mino fa misy ie sady mpanome raha soa ani-ze olo sahira mila azy.” (Hebreo 11:6) Fe tsy ampy ty mivola hoe mino ani-Jehovah. Mila manoriky ty safàny sanandro tsika laha ta hampiseho hoe mino azy.—Vakio Jakoba 2:26.

7. a) Manino tsika ro tokony hiambany noho hanaja ani-Jehovah lafa mivavaky aminy? b) Akory ty atao mba ho baka am-po ty vavaky ataontsika?

7 Manino ro tokony hiambany noho hanaja ani-Jehovah tsika lafa mivavaky? Tsy maintsy manaja tsika lafa miresaky amy mpanjaka na prezidà raiky. Jehovah ro Ndranahary Farany Ze Mahery, ka tsy vomaiky va tsika tokony hanaja noho hiambany lafa miresaky aminy? (Genesisy 17:1; Salamo 138:6) Ty tena baka am-pontsika ao koa ro tokony hovolanintsika lafa mivavaky fa tsy safà mitovy avao ro hampolimpolintsika.—Matio 6:7, 8.

8. Ino koa ty raha hafa tokony hataontsika lafa misy raha angatahintsika amy vavaky?

8 Farany, lafa misy raha angatahintsika amy vavaky, le tokony hiezaky hanao raha mifanaraky amy vavaky iny tsika. Mety mangataky mikasiky ty raha ilàntsika sanandro ohatsy tsika. Tsy tokony ho kamo tsika, ka hitamà hoe avy le hameany antsika iaby ze ilàntsika, kanefa tsika mba afaky miasa avao. Tsy maintsy miasa mafy tsika, sady maneky ze asa azontsika atao. (Matio 6:11; 2 Tesalonianina 3:10) Na lafa mangataky amy Jehovah tsika  mba hampeany hiala amy raha raty, le mila manalavitsy ze olo na pilasy na raha mety hahavy antsika hanao raha iny. (Kolosianina 3:5) Aleo hodinihintsika ty fanontanea fapetrakin’olo mikasiky ty vavaky.

FANONTANEA MIKASIKY TY VAVAKY

9. Ia ro tokony hivavahantsika? Ino ty volanini-Jaona 14:6 mikasiky ty vavaky?

9 Ia ro tokony hivavahantsika? Nampianatsy Jesosy fa tokony hivavaky amy ‘Babantsika an-danitsy any’ ty mpianatsiny. (Matio 6:9) Nivola ie bakeo hoe: “Zaho ro lala noho fahamarina voho fiaina. Tsy misy olo mandeha amy Baba any laha tsy amy alalako.” (Jaona 14:6) Midika raha zay fa Jehovah raiky avao ro tokony hivavaha, le atao amy alalani-Jesosy. Ino ty dikani-hoe atao amy alalani-Jesosy ty vavaky? Tokony hanaja ty asa manoka nameani-Jehovah ani-Jesosy tsika, laha teantsika hijanjy ty vavaky ataontsika Jehovah. Fa nianarantsika, fa ty hanafaky antsika amy ty ota noho ty fahafatesa ro niaviani-Jesosy tan-tany etoy. (Jaona 3:16; Romanina 5:12) Nitendrèni-Jehovah ho Mpisorobe noho Mpitsara koa Jesosy.—Jaona 5:22; Hebreo 6:20.

Afaky mivavaky avao iha ndre ombia ndre ombia

10. Misy pozy manoka hataoni-vatantsika va lafa mivavaky? Hazavao.

10 Tokony hanao akory ty pozini-vatantsika lafa mivavaky? Tsy mivola Jehovah hoe mila mandohaliky, na mipetraky, na mitsanga tsika lafa mivavaky. Mivola ty Baiboly fa mila manaja ani-Jehovah ty pozintsika lafa mivavaky. (1 Tantara 17:16; Nehemia 8:6; Daniela 6:10; Marka 11:25) Fe ty tena vatan-draha marè aminy, le ty am-pontsika ao fa tsy ty pozintsika. Afaky mivola marè na mivola an’aintsika any avao tsika lafa mivavaky, ndre aia ndre aia ty misy antsika, ndre andro ndre haly. Afaky  matoky tsika hoe mijanjy ty vavaky ataontsika Jehovah, ndre tsy misy olo mahita antsika aza.—Nehemia 2:1-6.

11. Ino ty raha sisany azontsika resahy amy Jehovah?

11 Ino ty azontsika resahy amy vavaky? Afaky mangataky ze raha ilàntsika amy Jehovah tsika fe mifanaraky amy raha teany. Hoy ty Baiboly: “Ndre ino ndre ino angatahintsika, ka mifanaraky amy ty sitrapony, le mijanjy antsika ie.” (1 Jaona 5:14) Ndre raha mampiasa loha antsika manoka va azo resahy? Manahaky miresaky amin’olo namantsika biby rey ty miresaky amy Jehovah, ka azontsika resahy aminy iaby ze raha an-tsaintsika noho am-pontsika any. (Salamo 62:8) Afaky mangataky fanahy masy tsika mba hanampy antsika hanao raha soa. (Lioka 11:13) Afaky mangataky tari-dala baka aminy koa tsika lafa misy raha manahira soa mba hahaizantsika manapa-kevitsy. (Jakoba 1:5) Tokony hangataky amy Jehovah tsika mba hengàny ty hadisoantsika. (Efesianina 1:3, 7) Tokony hivavaky ho ahin’olo hafa koa tsika, tafilitsy amy zay ty fianakaviantsika noho ty rahalahy noho anabavy iaby amy finoa ao.—Asan’ny Apostoly 12:5; Kolosianina 4:12.

12. Ino ty tena tokony ho voalohany amy vavaky ataontsika?

12 Ino ty tena tokony ho voalohany amy vavaky ataontsika? Jehovah noho ty sitrapony. Tokony hisaotsy azy amy fo tsika amy raha iaby nataony ho antsika. (1 Tantara 29:10-13) Zay ty tokony hatao satria fa nampianarini-Jesosy ty mpianatsiny raha zay tamy ie tan-tany etoy. (Vakio Matio 6:9-13.) Nivola ie fa tokony hivavaky mba hanamasìna ty anara-Ndranahary tse tsika. Bakeo nasehony hoe tokony hangataky ty hiaviani-Fanjakà-Ndranahary noho hangataky ty hanaova ty sitraponi-Jehovah amy tany toy iaby tsika. Lafa vita ty fangataha raha bevata eo reo, vo nivola Jesosy hoe tokony hivavaky mikasiky  ty raha ilantsika manoka tsika. Asehontsika hoe ino ty tena vatan-draha amintsika laha Jehovah noho ty sitrapony ro resahintsika voalohany amy vavaky.

13. Tokony hanao akory ty halavani-vavaky ataontsika?

13 Tokony hanao akory ty halavani-vavaky ataontsika? Tsy volanini-Baiboly raha zay. Azo atao boribory na lava biby ty vavaky, mianky amy ze raha miseho avao. Mety hanao vavaky boribory, ohatsy, tsika  alohani-hihina, fa mety hataontsika lavalava lafa misaotsy ani-Jehovah na mitantara aminy ty raha mampiasa loha antsika. (1 Samoela 1:12, 15) Tsy hoe mba hampieky olo manahaky ty nataon’olo sisany tamy androni-Jesosy ro antony anaovantsika vavaky lava. (Lioka 20:46, 47) Tsy teani-Jehovah ty vavaky manahaky ani-zay. Ty vavaky baka am-pontsika ro tena vatan-draha aminy.

14. Tokony hivavaky impiry tsika, le ino ty ampianarini-raha zay antsika mikasiky ani-Jehovah?

14 Tokony hivavaky impiry tsika? Teani-Jehovah hiresaky aminy matetiky tsika. Mampirisiky antsika ty Baiboly hoe “mivavaha avao”, “mahareta amy vavaky”, “ka mieny mivavaky.” (Matio 26:41; Romanina 12: 12; 1 Tesalonianina 5:17) Parè hijanjy antsika avao Jehovah. Tea antsika noho matariky amintsika ie ka tokony hisaotsy azy sanandro tsika. Tokony hangataky tari-dala noho  hery, voho fampahereza aminy koa tsika. Laha haintsika fa tombontsoa bevata ty mivavaky amy Jehovah, le hivavaky avao tsika saky mana fahafaha hanao raha zay.

15. Manino tsika ro mivola hoe “amena” amy farani-vavaky?

15 Manino tsika ro mivola hoe “amena” amy farani-vavaky? Midika hoe “marina zay” na “mba hoavy vatany zay” ty hoe “amena.” Midika zay fa lafa mivola hoe amena tsika amy vavaky ataontsika, le mampiseho fa baka am-pontsika raha zay. (Salamo 41:13) Ampianarini-Baiboly fa soa koa ty mivola hoe “amena”, an’aintsika any na marè amy vavaky an-kavoria mba hampisehoa fa maneky ty raha volany amy vavaky iny tsika.—1 Tantara 16:36; 1 Korintianina 14:16.

AKORY TY AMALEANI-JEHOVAH VAVAKY?

16. Mamaly vavaky vatany va Jehovah? Hazavao.

16 Mamaly vavaky vatany va Jehovah? Eka, mamaly vatany ie. Mikaiky azy hoe “Mpamaly vavaky” ty Baiboly. (Salamo 65:2) Mijanjy noho mamaly amy fomba samby hafa ty vavaky baka am-po ataon’olo an-tapitrisany Jehovah.

17. Akory ty ampiasàni-Jehovah ty anjely na ty mpanompony an-tany etoa mba hamaleany ty vavakintsika?

17 Mampiasa ty anjely noho ty mpanompony an-tany etoa Jehovah mba hamaleany ty vavakintsika. (Hebreo 1:13, 14) Maro, ohatsy, ty olo nivavaky mba hisy olo hanampy azy hahazo ty raha ampianarini-Baiboly. Tsiela tafarani-zay, le nisy Vavolombeloni-Jehovah niavy. Asehoni-Baiboly fa manampy amy fanambarà ty “vaovao soa” amy tany toy iaby koa ty anjely. (Vakio Apokalypsy 14:6.) Maro amintsika koa nivavaky tamy Jehovah mikasiky ty raha nanahira antsika na ty raha nilàntsika, le nahazo fanampea baka amy rahalahy na anabavintsika Kristiana.—Ohabolana 12:25; Jakoba 2:16.

Mety hampiasa Kristiana raiky Jehovah mba hamalea ty vavakintsika

18. Akory ty ampiasàni-Jehovah ty fanahiny masy noho ty Baiboly mba hamalea vavaky?

 18 Mampiasa ty fanahiny masy Jehovah mba hamalea ty vavakintsika. Lafa mivavaky aminy tsika mba hahazo fanampea amy raha raiky manahira antsika, le mety hampiasa ty fanahiny masy ie hahitantsika tari-dala noho hampahery antsika. (2 Korintianina 4:7) Mampiasa Baiboly koa Jehovah mba hamalea ty vavakintsika noho mba handrambesantsika fanapahan-kevitsy soa. Lafa mamaky Baiboly tsika le mety hahita andinin-teny manampy antsika. Afaky mampiasa olo mamaly teny am-pivoria any koa Jehovah mba haharezantsika hevitsy ilàntsika. Azony ampiasà koa ty anti-panahini-fiangona mba hampahery antsika amy andinin-teny baka amy Baiboly ao.—Galatianina 6:1.

19. Manino ro atao ho raha tsy valeani-Jehovah ty vavakintsika kindraiky?

19 Mety hivola tsika kindraiky hoe: ‘Manino Jehovah ro mbo tsy mamaly ty vavakiko avao?’ Tiarovo fa haini-Jehovah hoe ombia noho manao akory ty hamaleany ty vavakintsika. Hainy ty raha ilàntsika. Mety mila mivavaky aminy avao tsika mba hampisehoa fa maniry ty raha volanintsika sady manam-pinoa azy. (Lioka 11:5-10) Mety tsy haintsika kindraiky fa mamaly ty vavaky ataontsika Jehovah. Mety hivavaky mikasiky fitsapà raiky manahira antsika ohatsy tsika, fe mety tsy afahany raha zay, fa ameany hery hiareta avao tsika.—Vakio Filipianina 4:13.

20. Manino tsika ro tokony hivavaky matetiky amy Jehovah?

20 Tombontsoa bevata vatany ty hoe afaky mivavaky amy Jehovah! Afaky matoky tsika fa hijanjy antsika ie. (Salamo 145:18) Arakaraky ty hivavahantsika matetiky aminy baka am-po ro hahavy antsika hihamarìny azy.