Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Afaky ho Sambatsy ty Fianakavianao

 FIZARÀ 9

Manompoa Jehovah Nareo Trano Raiky

Manompoa Jehovah Nareo Trano Raiky

“Mivavaha amy azy nanao ty lanitsy noho ty tany noho ty riaky voho ty loharano iny.”—Apokalypsy 14:7

Nianaranao tamy bokikely toy ato, fa maro ty torolala amy Baiboly ao afaky manampy anao noho ty fianakavianao. Tea Jehovah ho sambatsy nareo. Mampitamà ie fa laha ty fanompoa azy ro ataonareo voalohany, “le hamea anareo koa raha iaby rezay.” (Matio 6:33) Teany ho namany vatany iha. Ataovo iaby ze azonao atao mba ho mpinama marè amy Ndranahary iha. Voninahitsy farany bevata ho ahy ty olombelo raha zay.—Matio 22:37, 38.

 1 HASOAVO TY FIFANDRAMBESANAO AMY JEHOVAH

HOY TY BAIBOLY: “ ‘Ho babanareo aho, le nareo ho anakilahiko noho anakampelako’, hoasa Jehovah.” (2 Korintianina 6:18) Tea Ndranahary ho namany marìny azy iha. Fomba raiky hanampy anao amy raha zay ty vavaky. Mampirisiky anao Jehovah hoe: “Ka mieny mivavaky.” (1 Tesalonianina 5:17) Ta hijanjy marè ty raha eritseretinao noho mampiasa loha anao ie. (Filipianina 4:6) Laha miaraky mivavaky amy ty fianakavianao iha, le ho hitan-drozy hoe mino vatany iha fa misy Ndranahary.

Ankoatsy ty firesahanao amy Ndranahary, le mila mijanjy azy koa iha. Mijanjy azy iha lafa mianatsy ty Safàny noho ty boky mifototsy amy Baiboly. (Salamo 1:1, 2) Vetsevetseo ty raha ianaranao. (Salamo 77:11, 12) Mila manatriky fivoria tsy tampaky koa iha laha ta hijanjy Ndranahary.—Salamo 122:1-4.

Bakeo, mila miresaky aminolo hafa mikasiky Jehovah koa iha laha ta hanasoa ty fifandrambesanao aminy. Ho mpinama marè nareo lafa miresaky mikasiky azy avao iha.—Matio 28:19, 20.

TOY MISY HEVITSY:

  • Manokàna fotoa sanandro mba hamakia Baiboly noho hivavaha

  • Ze raha mikasiky ty fivavaha ro ataovo vatan-draha marè an-tranonareo ao, zay vo ty fangalà andro

2 MAHAZOA TAVY TY FOTOA FIVAVAHA TY FIANAKAVIA

HOY TY BAIBOLY: “Mamonjea Ndranahary, le hamonjy anareo ie.” (Jakoba 4:8) Mila manoka fotoa hanaova Fotoa Fivavaha ty Fianakavia nareo sady manao raha zay saky herinandro. (Genesisy 18:19) Fe tsy zay avao. Ataovo mahazatsy anareo ty raha mikasiky Ndranahary. Miezaha hifandramby mariny aminy avao ka miresaha mikasiky azy ‘ndre mipetraky an-tranonao ao, ndre mandeha mban-dala eny, ndre mandry, ndre mifoha.’ (Deoteronomia 6:6, 7) Kirio ty hitsikomby safà Josoa toy hoe: “Fa laha zaho noho ty fianakaviako aloha le hanompo Jehovah.”—Josoa 24:15.

TOY MISY HEVITSY:

  • Ataovo tsy tampaky noho mifanaraky amy ty raha ilà ty olo kiraidraiky an-trano ao ty Fotoa Fivavaha ty Fianakavia