Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Afaky ho Sambatsy ty Fianakavianao

 FIZARÀ 8

Ino ty Hatao Lafa Tra-pahasahiràna?

Ino ty Hatao Lafa Tra-pahasahiràna?

“Zay ro ifalifaleanareo marè, ndre tsy maintsy ampalahelovy tsielatsiela amy fitsapà maro samby hafa aza nareo henanizao.”—1 Petera 1:6

Marina fa manao ze farany vitanao iha mba ho sambatsy ty fianakavianao. Fe mety hisy fahasahiràna tsy ampoizinao ka ho sarotsy aminareo ty ho falifaly avao. (Mpitoriteny 9:11) Tea antsika Ndranahary ka ampeany tsika lafa misy raha manahira. Laha manoriky ty torolala amy Soratsy Masy ao nareo, le ho afaky hiaritsy ndre ty fahasahiràna sarotsy marè aza.

 1 MIANTEHERA AMY JEHOVAH

HOY TY BAIBOLY: “Apetraho aminy iaby ze raha mampiasa loha anareo, satria mikarakara anareo ie.” (1 Petera 5:7) Tiarovo avao fa tsy sazy baka amy Ndranahary ty fitsapà mahazo anao. (Jakoba 1:13) Hanome anao ty fanampea farany ze soa ie, laha mamonjy azy iha. (Isaia 41:10) ‘Aboaho aminy ty am-ponao ao.’ —Salamo 62:8.

Hahazo fampahereza koa iha lafa mamaky noho mianatsy Baiboly sanandro. Hanjary ho hainao amy zay ty fomba “ampahereza Jehovah antsika amy ty fijaleantsika iaby.” (2 Korintianina 1:3, 4; Romanina 15:4) Mampitamà ie fa hanome anao “ty fiadana Ndranahary azy bevata marè mandilatsy ty eritseritsy iaby iny.”—Filipianina 4:6, 7, 13.

TOY MISY HEVITSY:

  • Mivavaha amy Jehovah hanampy anao tsy ho taitsy sady hieritseritsy soa

  • Henteo iaby ze azonao atao, le ze hevitsy farany mety ro ataovo

2 KARAKARAO TY VATANAO NOHO TY FIANAKAVIANAO

HOY TY BAIBOLY: “Ty fo ty olo mandini-draha miezaky hahazo fahaiza, le ty sofy ty hendry ta hijanjy fahaiza.” (Ohabolana 18:15) Anovo hay ty raha iaby miseho aminareo. Henteo ze raha ilà ty olo kiraidraiky an-trano ao. Miresaha amin-drozy, le mijanjìna soa.—Ohabolana 20:5.

Ka manao akory laha misy longo maty? Ka misalasala hampiboaky ty alahelonao. Tiarovo fa ndre Jesosy “aza nitany.” (Jaona 11:35; Mpitoriteny 3:4) Ilà koa ty mangalaky havozaha noho miroro soa. (Mpitoriteny 4:6) Mba maivaiva ty fahoria mahazo anareo amy zay.

TOY MISY HEVITSY:

  • Miezaha ho zatsy miresaky amy ty olo an-trano ao, ndre mbo tsy misy raha sarotsy mahazo anareo. Tsy hisalasala hiresaky aminao rozy amy zay, lafa misy fahasahiràna

  • Miresaha aminolo fa nandalo fahasahiràna manahaky ty mahazo anareo koa

 3 MANGATAHA FANAMPEA

HOY TY BAIBOLY: “Tea amy fotoa iaby ty nama vatany sady manahaky rahalahy natao hanampy lafa misy fahasahiràna.” (Ohabolana 17:17) Ta hanampy anao ty namanao, fe mety tsy ho hain-drozy hoe ino ty hatao. Ka misalasala fa volano amin-drozy ty raha ilànao. (Ohabolana 12:25) Mila mangataky fanampea ara-panahy baka aminolo mahay soa ty Soratsy Masy koa iha. Hanampy anao ty torohevitsy mifototsy amy Baiboly amean-drozy.—Jakoba 5:14.

Hahazo ty fanampea ilànao iha laha minama aminolo mino Ndranahary vatany sady matoky ty raha ampitamaniny. Le vatany hahery koa iha laha manampy olo mila fampahereza. Miresaha aminolo mikasiky Jehovah noho ty raha ampitamaniny. Mazotoa manampy olo sahira, sady ka mihatakataky, fa miaraha avao amy ty olo tea anao sady midary anao.—Ohabolana 18:1; 1 Korintianina 15:58.

TOY MISY HEVITSY:

  • Miresaha amy nama marìny anao raiky le engaho hanampy anao ie

  • Volano mazava soa ty raha ilànao