Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Afaky ho Sambatsy ty Fianakavianao

 FIZARÀ 7

Manao Akory ty Hitezà Ajà Reo?

Manao Akory ty Hitezà Ajà Reo?

“Mila ataonao am-ponao ao safà andidiako anao henanizao retoa. Le alenteho tsikelitsikely an-tsay ananao ao raha zay.”—Deoteronomia 6:6, 7

Lafa namoro ty fianakavia Jehovah, le nankininy amy ty baba noho ty reny ty fikarakarà ty anan-drozy. (Kolosianina 3:20) Andraikitsinao ty mampianatsy ty ananao ho tea Jehovah noho hanjary olobe azo atokisa. (2 Timoty 1:5; 3:15) Tsy maintsy ataonao hay koa ty raha anaty fony ao. Soa laha baka aminao ty hianarany raha zay. Laha ataonao am-ponao ao ty Safà Ndranahary, le ho hainao ty hampianatsy raha zay amy ty ananao.—Salamo 40:8.

 1 MIEZAHA HO MORA IRESAHA

HOY TY BAIBOLY: Soa iha laha “malisa hijanjy” sady “tsy halaky hivola.” (Jakoba 1:19) Teanao laha mahatsapa ty ananao hoe afaky miresaky soa aminao ie. Tokony ho hainy hoe parè hijanjy azy avao iha, lafa misy raha teany hovolany. Manaova mpinama soa nareo iaby, amy zay ho mora amin-drozy ty hiresaky aminao. (Jakoba 3:18) Fa laha mieritseritsy rozy hoe hasiaky iha na hitsaratsara azy, le mety tsy haboany aminao ty raha am-pony any. Manàna fahareta amy ananao, le ataovo avao ze hatokisany hoe tea azy iha.—Matio 3:17; 1 Korintianina 8:1.

TOY MISY HEVITSY:

  • Manaova parè avao lafa ta hiresaky ty ananao

  • Miresaha matetiky amy ty ananao, fa tsy hoe lafa misy raha tsy mety avao

2 MIEZAHA HAHAZO TY RAHA TEANY HAMBARA

HOY TY BAIBOLY: “Ty olo mahiratsy amy ze ataony ro hahita hasoava.” (Ohabolana 16:20) Ndraindraiky le mila eritseretinao baka amy ty safà aboa ty ananao ty raha am-pony ao. Matetiky moa ty ajà ro manè-draha na mivola raha tsy nieritseretiny loatsy. Fa “ze mamaly kanefa mbo tsy nijanjy, le hadalà noho henatsy ho azy raha zay.” (Ohabolana 18:13) Ka tsiela meloky.—Ohabolana 19:11.

TOY MISY HEVITSY:

  • Ka mora misondrotsy na manampa-dresaky, ndre ino ndre ino ty raha volany ty ananao

  • Tiarovo ty fihetseham-ponao tamy iha mbo nitovy tao aminy, le ino ty raha nieritseretinao ho vatan-draha tamy fotoa zay

 3 ATORÒ FA MIFANARAKY SOA NAREO

HOY TY BAIBOLY: “Janjino anaky, ty anatsy babanao, le ka atao ambanin-draha ty anatsy reninao.” (Ohabolana 1:8) Samby namea Jehovah fahefà amy ty anany ty baba noho reny. Tsy maintsy ampianarinao hanaja anao noho hanoriky ty safànao ty ananao. (Efesianina 6:1-3) Amby ajà reo laha vo somary tsy mifanaraky “amy say raiky” ty baba noho reniny. (1 Korintianina 1:10) Mety tsy hitovy hevitsy nareo, fe soa laha tsy resahinareo anila ajà reo eo raha zay satria mety hahavy an-drozy tsy hanaja anareo.

TOY MISY HEVITSY:

  • Ifampiresaho ty fomba hifehezanareo ajà reo

  • Laha mana hevitsy hafa amy ty fomba fitezà ty ananareo iha, le iezaho ho hay ty fahità valinao azy

 4 ALAMINO TY FOMBA HITEZÀ TY ANANAREO

HOY TY BAIBOLY: “Zaro amy lala tokony hombany ty ajà.” (Ohabolana 22:6) Tsy raha mandeha hoazy ty fahaiza miteza anaky. Mila alaminao soa ty fomba hitezà an-drozy, tafilitsy amy zay ty hifeheza an-drozy. (Salamo 127:4; Ohabolana 29:17) Tsy hoe manasazy avao ty dika ty hoe mifehy. Tsy zay avao, fa mila ampeanao koa ty ananao mba hahay ty antony ametrahanao fitsipiky. (Ohabolana 28:7) Ampianaro ho tea ty Safà Jehovah noho hahay ty torolala ao koa rozy. (Salamo 1:2) Hampahihitsy an-drozy raha zay.—Hebreo 5:14.

TOY MISY HEVITSY:

  • Ampeo ty ananao hino fa misy vatany Ndranahary sady azon-drozy atokisa

  • Ampeo rozy mba hahay noho hanalavitsy ty raha mety hahavy azy hanao raha raty, ohatsy hoe amy Internet noho amy tranonkala fiharoa rey. Ampianaro an-drozy ty tokony hatao mba tsy ho tratsy ty mpandrava ajà

“Zaro amy lala tokony hombany ty ajà”