Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 116: Ia ty Hahazo Fiaìna Mandrakizay?

Tantara 116: Ia ty Hahazo Fiaìna Mandrakizay?

AZONAO volàny va raha vakìn’​anak’​ajà kelikele io miarake amy namane reo? Boky vakinao toy io: Boky Misy Tantara Baka Amy Baiboly. Amy tantara vakìnao io kea, tantara vakìn-droze io: “Ia ty Hahazo Fiaìna Mandrakizay?”

Ajà lahilahy mamaky boky

Hainao va raha ianaran-droze eo io? Voalohane, le tokone hahay ty raha mikasike an’​i Jehovah noho Jesosy Anake lahine iny tsika, laha ta hiay mandrakizay. Hoy ty asa’​ty Baiboly: ‘Zao ty tokone hatao laha ta hahazo fiaìna mandrakizay. Mila mahay an’​Andranahare marina raike avao iny, noho Jesosy Kristy, Anake lahy nirahine ho an-tany etoy.’

Ami’​ty fomba manao akore ro hianarantsika raha maro mikasike an’​i Jehovah Andranahare noho Jesosy Anane? Ty fomba raike, le ty famakiantsika Boky Misy Tantara Baka Amy Baiboly toy, baka am-boalohane zisiky am-parane. Tsy hitanao hoe mitantara raha maro mikasike an’​i Jehovah noho Jesosy va boky toy? Miresake mikasike ty raha fa nataon-droze taloha noho ty raha mbo hataon-droze amy hoavy kea boky toy. Fe mila manao raha maro hafa koa tsika, fa tsy mamaky boky toy avao.

Baiboly

Hitanao va boky raike amy tany eo io? Baiboly io. Mangatàha olo raike iha mba hamaky aminao ty tampatampane amy tantara baka amy Baiboly ao, hita anaty boky toy ato. Manome fanazavà maro ho antsika ty Baiboly. Laha orìhintsika soa fanazavà reo, le afake hanompo an’​i Jehovah tsika, ka hahazo fiaìna mandrakizay. Ka tokone hataontsika fahazara ty mianatse Baiboly.

Fe tsy ampy mihitsy laha mianatse mikasike an’​i Jehovah Andranahare noho Jesosy Kristy avao tsika. Mety hahay raha maro mikasike an­droze noho ty fomba fampianaran-droze tsika, fe tsy hahazo fiaìna mandrakizay. Hainao va ty raha hafa tokone hatao?

Tokone ho hita ami’​ty fiaìnantsika, fa narahintsika soa raha nianarantsika reny. Tiaronao va Jodasy Iskariota? Raike tamy apostoly 12 nofilìn’​i Jesosy iny. Nahay raha maro mikasike an’​i Jehovah noho Jesosy ie. Fe ino ty raha nahazo aze? Nanjary tea ty vatatenane raike avao ie, ka nivalike tamin’​i Jesosy. Navìlin’​i Jodasy farantsa volafoty 30 tamy fahavalone reny Jesosy. Tsy hahazo fiaìna mandrakizay Jodasy.

Tiaronao va Gehazy? Hita amy Tantara faha-69 ao ty tantarane. Ta hahazo akanjo noho drala tsy natao ho aze mihitsy Gehazy. Namoro vandy ie, mba hahazòane raha reo. Fe nosazìn’​i Jehovah ie. Hosazìn’​i Jehovah kea tsika, laha tsy manorike ty lalàne.

Maro ty olo soa fanahy nazoto nanompo an’​i Jehovah zisiky am-parane. Tokone hanahake an-droze kea tsika, sa tsy zay? Ohatse soa tokone harahintsika Samoela. Tiaròvo ty raha nihitanao amy Tantara faha-​55 ao. Vo anak’​ajà efatse na limy tao Samoela, le fa nanomboke nanompo an’​i Jehovah tamy tabernakely tao. Ka ndra mbo kelikele aza iha, le fa afake manompo an’​i Jehovah koa.

Ty olo raike tokone hotahafintsika le Jesosy Kristy. Tamin’​i Jesosy mbo ajà, arake ty hita amy Tantara faha-87 ao, le fa niresake tamin’​olo hafa mikasike an’​i Jehovah. Tamy tempoly tao ro nanaòvane raha zay. Ndao koa tsika hanahake aze. Ndao tsika hanao ze vitantsika ka hanambara amin’​olo hafa ty raha mikasike an’​i Jehovah Andranahare, noho Jesosy Kristy. Laha manao raha reo tsika, le afake hahazo fiaìna mandrakizay amy paradisa vaovao hatao-Ndranahare an-tany etoy iny.

Jaona 17:​3; Salamo 145:​1-21.



Fanontanea

  • Ino ty raha tokone ho haintsika, laha teantsika ty hiay mandrakizay?
  • Laha hentea ty raha ataon’​ajà ampela kelikele noho namany reo amy sary eo, amy fomba manao akore ro hianarantsika raha mikasike an’​i Jehovah Andranahare noho Jesosy?
  • Ino boky hafa hitanao amy sary io? Manino tsika ro tokone hamaky boky io matetike?
  • Ankoatse ty fianara raha mikasike an’​i Jehovah noho Jesosy, ino koa ty raha tokone hatao mba hahazoa fiaìna mandrakizay?
  • Ino ty raha azontsika ianara baka amy Tantara faha-69 ao?
  • Ino ty ohatse soa nengàn’​i Samoela mbo nikely, laha Tantara faha-55 io ro hentea?
  • Amy fomba manao akore ro hanahàfantsika an’​i Jesosy Kristy? Ho afake hanao ino tsika amy hoavy, laha manao raha zay?

Fanontanea Fanampine

  • Vakio Jaona 17:​3.

    Tsy midika hoe mahatiaro ty raha nianara reny avao ty dika mahazo fahalalà an’​i Jehovah Andranahare noho Jesosy Kristy zao, fa misy raha hafa ankoatse an’​io koa. Manao akore ty fomba anazavà’​ty Baiboly raha zay? (Matio 7:21; Jak. 2:​18-20; 1 Jaona 2:​17)

  • Vakio Salamo 145:​1-21.

    Ino iaby ty antone sasane tokone hideràntsika an’​i Jehovah? (Sal. 145:​8-11; Apok. 4:11)

    Ino ty mampiseho fa “manisy soa tontolo toy” Jehovah? Manino raha zay ro tokone hahavy antsika hamonjy aze? (Sal. 145:​9; Matio 5:​43-45)

    Ino ty ezake tokone hataontsika, laha teantsika amy fontsika vatane Jehovah? (Sal. 119:​171, 172, 175; 145:​11, 12, 21)