Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 114: Ty Fara’​ty Faharatia

Tantara 114: Ty Fara’​ty Faharatia

INO ty raha hitanao amy sary io? Misy miaramila maro mitikitse sôvaly foty ty eo. Fe hainao va hoe baka aìa roze reo? Mijotso baka an-​danitse ane sôvaly reo, ka mandeha amy raho eo! Misy sôvaly vatane va an-danitse ane?

Jesosy Mpanjaka an-danitse ane

Aha, tsy misy sôvaly ty ane, satria tsy mahay mandeha amy raho eny sôvaly zao, sa tsy zay? Fe misy firesàha mikasike sôvaly an-danitse ane amy Baiboly ao. Ino ty antone iresàhane an’​io?

Satria mampiasa sôvaly matetike ty olo taloha, laha fa handeha hialy. Ka, ty Baiboly le miresake mikasike ty olo mitikitse sôvaly, mba hampisehoa fa mana aly hatao amin’​olo an-tany etoy reo Andranahare. Hainao va hoe ino ty anara ikaìha toera hisy aly io? Hara-magedona. Io ro aly handrava ty faharatia an-tany etoy.

Jesosy ro hitarike aly amy Hara-magedona io. Tiaròvo soa, fa nifìly an’​i Jesosy mba ho mpanjaka’​ty Fanjakàne Jehovah. Zay ty antone anaòvane satroky mpanjaka io. Sabatsy io kea, le mampiseho fa hovonòan’​i Jesosy iaby ty fahavalo-Ndranahare. Tokone ho tserike va tsika laha handripake ty olo raty fanahy iaby Andranahare?

Henteo ndraike Tantara faha-​10 iny. Ino ty raha hitanao ao? Namono olo maro Safodrano be iny. Ia ty nahavy Safodrano io? Jehovah Andranahare. Henteo kea henany zao Tantara faha-15 iny. Ino ty raha miseho eto? May ka refotse tamy afo nalefan’​i Jehovah baka an-danitse ane, Sodoma noho Gomora.

Avalìho amy Tantara faha-33 ao bokinao io. Henteo ty raha niseho tamy sôvaly noho sarety miaramila ejipsiana reny. Ia ty nampihìly riake io amin-droze eo? Jehovah avao. Nanao raha zay ie, mba hanavòta ty mpanompone. Henteo amy Tantara faha-76 ao. Hitanao ao fa nengàn’​i Jehovah hovonòa Israelita mpanompone reny, satria nanao raha raty.

Ka tsy tokone ho tserike sasy tsika, laha fa handefa tafike baka an-danitse ane Jehovah. Hataone tsy misy faharatia sasy an-tany etoy, ka tafikine reo ro hanatanterake raha zay. Fe mba eritsereto soa tseky ty dika raha zay! Avalìho amy pejy manarake ao bokinao io, ka ndao ho henteantsika.

Apokalypsy 16:16; 19:​11-16.



Fanontanea

  • Manino ty Baiboly ro miresake mikasike sôvaly an-danitse ane?
  • Ino ty anara aly hatao-Ndranahare amin’​olo raty fanahy an-tany etoy iny? Ino ty antone anaòva aly io?
  • Ia ty hitarike aly io, arake ty hita amy sary eo? Manino ie ro manao satroky mpanjaka? Ino ty dika sabatsy an-tanany eny io?
  • Manino tsika ro tsy tokone ho tserike laha handripake ty olo raty fanahy Andranahare, arake Tantara faha-10 noho faha-15 voho faha-33 fa nianarantsika reny?
  • Naripa-Ndranahare avao olo raty fanahy nanao ho nivavake amine reny. Ino ty antone, laha impolìa ndraike Tantara faha-33 noho faha-36 voho faha-76 iny?

Fanontanea Fanampine

  • Vakio Apokalypsy 19:​11-16.

    Manao akore ty fomba ampisehoa’​ty Baiboly, fa Jesosy Kristy ro hitikitse sôvaly foty iny? (Apok. 1:​5; 3:14; 19:11; Isaia 11:​4)

    Manino lio niparitake tamin’​akanjon’​i Jesosy teny reny ro manaporofo fa haharesy vatane ie? (Apok. 14:​18-20; 19:13; Isaia 63:​1-6)

    Mety ho ia koa ro ho tafilitse amy miaramila manarake an’​i Jesosy aze mitikitse sôvaly foty io? (Apok. 12:​7; 19:14; Matio 25:​31, 32)