Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 113: Paoly Ta-Roma Tany

Tantara 113: Paoly Ta-Roma Tany

HENTEO rojo vy amy tanan’​i Paoly eny io, henteo koa miaramila romana mandìny aze eo io. Nigadra ta-Roma tany Paoly. Mandìny ty valim-pitsarà haboakin’​i Kaisara filoha romana ho aze ie eto. Nengà hisafo aze tseky ty olo tamy ie mbo nifehy.

Nandefa hafatse tamy filoha jiosy maromaro tany Paoly mba ho avy amine eo, telo andro tafara’​ty niaviane ta-Roma tao. Nivaly hafatse iny, ka maro ty jiosy ta-Roma tao ro niavy teo. Nitory tamin-droze reo mikasike an’​i Jesosy noho ty fanjakà-Ndranahare Paoly. Ty sasane nino, ka nanjary Kristiana, fa ty hafa tsy nino.

Paoly am-pigadrà

Nitory tamy miaramila niamby aze tam-pigadrà tao reny koa Paoly. Nanambaràn’​i Paoly ty vaovao soa iaby ze olo azone nitoria, tanaty roe tao nahagadra aze io. Ka ndra ty olo sasane tamy fianakavian’​i Kaisara tao aza, le maro ro nanjary Kristiana laha fa naharé vaovao soa mikasike Fanjakà-Ndranahare notorìn’​i Paoly io.

Fe ia va olo misafo an’​i Paoly manoratse an-datàbo eo io? Azonao an’​eritseritse va io? Eka, Timoty io. Nogadrà koa Timoty, laha fa nitory ty Fanjakà-Ndranahare, fe fa niafake ie fa tsy gadra sasy. Avy amin’​i Paoly ao ie henany zao mba hanampy aze. Hainao va hoe ino raha soratan’​i Timoty io? Ndao ho henteantsika.

Tiaronao va tanà Filipy noho Efesosy tamy Tantara faha-​110 tao iny? Nanampy ty olo, nanànga fiangona kristiana tamy tanà reo tao Paoly. Ka, ndra mbo am-pigadrà ao aza ie henany zao le nanoratse taratasy ho ahi’​ty Kristiana mipetrake amy tanà reo. Hita amy Baiboly ao taratasy reo, ka kaìhy hoe Efesianina noho Filipianina. Mivòla amy Timoty ty raha tokone hosoràta ho ahi’​ty Kristiana namane a-Filipy ane Paoly amy sary io.

Nisoa fanahy tamin’​i Paoly ty olo ta-Filipy tao. Nandefa fanomeza ho an’​i Paoly tam-pigadrà tao roze, ka nisaotse an-droze Paoly tamy raha zay. Epafrodito ty anara lahilahy nanday fanomeza reo. Fe narare maré Epafrodito io, ka fa ho nimaty. Fe, fa salama ie henany zao ka fa handeha holy amine ane ami’​zay. Handay taratasy nosoratan’​i Paoly noho Timoty reo ie laha fa mimpòly a-Filipy ane.

Nanoratse taratasy roe hafa hitantsika amy Baiboly ao Paoly, tamy ie mbo tam-pigadrà tao. Ty raike ho ahi’​ty Kristiana nipetrake tamy tanàn’​i Kolosia ane. Hainao va hoe ia ty nikaìha aze? Kolosianina. Taratasy manoka ho an’​i Filemona naman’​i Paoly, nipetrake ta-Kolosia tao ty taratasy raike hafa. Mikasike an’​i Onesimosy mpanompon’​i Filemona taratasy io.

Nilay baka amin’​i Filemona tao Onesimosy, ka niavy ta-Roma tany. Laha fa tao ie, le nihainy ty antone nilìran’​i Paoly tam-pigadrà tao. Niavy ie mba hisafo an’​i Paoly, ka nitory tamine Paoly. Tsy ela le fa nanjary Krisitiana koa Onesimosy. Naneny noho’​ty filaìsane an’​i Filemona ie henany zao. Hainao va hoe ino ty raha nosoratan’​i Paoly amy taratasy halefa ho an’​i Filemona io?

Novolànin’​i Paoly Filemona mba hamela heloke an’​i Onesimosy. Nanoratsy Paoly hoe: ‘Ampolìko aminao ane ie. Fe tsy hoe mpanomponao avao ie henany io, fa rahalahy kristiana koa.’ Nandesin’​i Onesimosy niarake tamine taratasy roe reo laha fa nimpòly ta-Kolosia tany ie. Ty taratasy raike ho ahi’​ty Kolosiana, ty raike hafa ho an’​i Filemona. Somary eritsereto moa ty hafalian’​i Filemona laha fa nihainy fa nanjary Kristiana mpanompony io.

Tamin’​i Paoly nanoratse taratasy ho ahi’​ty Filipiana noho ho an’​i Filemona, le niresake vaovao soa tamin-droze. Hoy ty asane tamy Filipiana reo hoe: ‘Manirake an’​i Timoty ho aminareo atoy aho, fe tsy ho ela koa zaho le hisafo anareo.’ Ho’​zao koa ty raha nosoràtane ho an’​i Filemona: ‘Ikarakarao trano aho soa hipetràhako ane.’

Laha fa nafàha tam-pigadrà tao Paoly, le nisafo rahalahiny noho anabaviny kristiana tamy toera maro tany. Fe laha fa tafara atoy le nogadrà ta-Roma tao ndraike ie. Nihainy tami’​zay fa hovonòa ie. Nanoratse tamin’​i Timoty tany ie, sady nivòla tamine mba ho avy malaky. Nanoratse ie hoe: ‘Tsy nivalike tamin’​i Jehovah mihitsy aho, ka hamaly ty raha soa nataoko Andranahare.’ Novonòa Paoly tao vitsivitsy tafara atoy. Noravà ndraike Jerosalema, ka ty Romana ro nandrava aze tamin’​io.

Fe misy raha maro hafa koa amy Baiboly ao. Apostoly Jaona ro nampanoratin’​i Jehovah Andranahare ty boky farany amy Baiboly ao, ka tafilitse ami’​zay ty Apokalypsy. Manambara ty hoavy boky io. Ndao ho henteantsika ty raha mikasike ty hoavy.

Asan’​ny Apostoly 28:​16-31; Filipianina 1:13; 2:​19-30; 4:​18-23; Hebreo 13:23; Filemona 1-25; Kolosianina 4:​7-9; 2 Timoty 4:​7-9.



Fanontanea

  • Ia iaby ty olo nitorian’​i Paoly tamin’​ie nigadra ta-Roma tao?
  • Ia olo manoratse amy latàbo nisafo an’​i Paoly, amy sary io? Ino ty raha nataone ho an’​i Paoly?
  • Ia moa Epafrodito zao? Ino ty raha nandesine ta-Filipy ane, laha fa noly tany ie?
  • Nanino Paoly ro nanoratse taratasy ho an’​i Filemona, aze namane bibike iny?
  • Ino ty raha nataon’​i Paoly, laha fa nafàha tam-pigadrà tao ie? Fe ino koa ty raha nahazo azy tafaran’​io?
  • Ia ro nampiasàn’​i Jehovah hanoratse ty boky farane amy Baiboly ao? Ino ty raha resahi’​ty bokin’​Apokalypsy?

Fanontanea Fanampine

  • Vakio Asan’​ny Apostoly 28:​16-31 noho Filipianina 1:​13.

    Nanararaotse ty fotoa nahagadra aze ta-Roma tao Paoly, ka nataone ino fotoa nananane reny? Ino ty vokatse soa niazo baka amy finoa matanjake nananane zay tamy fiangona kristiana teo? (Asa. 28:​23, 30; Fil. 1:​14)

  • Vakio Filipianina 2:​19-30.

    Nanao akore ty fomba nampisehoan’​i Paoly ty fitiavane an’​i Timoty noho Epafrodito, noho ty fomba azontsika anahàfa an’​i Paoly? (Fil. 2:​20, 22, 25, 29, 30; 1 Kor. 16:18; 1 Tes. 5:​12, 13)

  • Vakio Filemona 1-25.

    Ino ty nahavy an’​i Paoly hamporisike an’​i Filemona hanao raha soa? Amy fomba manao akore koa ro ahafàha’​ty anti-panahy manahake aze henany zao? (Filem. 9; 2 Kor. 8:​8; Gal. 5:​13)

    Nanaja ty feo’​ty fieritseretan’​olo hafa Paoly. Tamy fomba manao akore ro nanaòvane raha zay, laha hentea safàne amy Filemona 13, 14 ao io? (1 Kor. 8:​7, 13; 10:​31-33)

  • Vakio 2 Timoty 4:​7-9.

    Manahake an’​apostoly Paoly, manino tsika ro afake matoky fa hitahy antsika Jehovah, laha tsy mivalike amine zisiky am-parane tsika? (Matio 24:13; Heb. 6:​10)