Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 111: Ajà Lahilahy Raike Nilàvo Satria Niroro

Tantara 111: Ajà Lahilahy Raike Nilàvo Satria Niroro

INO raha miseho amy sary etoa io? Maratsy va ajà lahilahy miampatsy amy tany eo io? Mba henteo moa fa Paoly olo raike miboake baka an-trano ao io! Hitanao eto koa va Timoty? Nitonta baka an-dafonety eny va ajà lahilahy io?

Paoly hamelo Eotyka

Eka, zay vatane ty raha niseho. Nanao lahateny ho ahy mpianatse reo Paoly ta-Troasy tao. Haine fa tsy hahita mpianatse reo sasy ie anaty fotoa elaela, satria mila mandeha sambo ie laha fa hamarain’​io. Ka le nandahateny avao Paoly ndre fa misasakaly aza ty andro.

Nipetrake tan-dafonety teny ajà lahilahy atao hoe Eotyka io, ka niroro. Misy efitse telo man’​anabo, trano nipetrahany io. Nilatsake bakeny ajà io, ka nidaràboky tambany amy tany eo! Zay ty antone maha tserike olo reo io. Laha fa norambesy lahilahy reo ajà io, le nihitan-droze fa maty.

Laha fa nihitan’​i Paoly fa maty ajà io, le niroro tanabony teo ie sady namìhy aze. Le hoy ty asane hoe: ‘Ka tserike nareo. Tsy manino ajà io!’ Marina raha zay! Fahagagà ro niseho! Novelòmin’​i Paoly ndraike ajà iny! Falifale bibike ty olo iaby.

Niakatse amy trano anabo ane ndraike roze iaby ka nihina. Notohizan’​i Paoly avao ty lahatenine zisiky maraindray. Fe azo antoke fa tsy niroro sasy Eotyka! Laha fa bakeo le niakatse an-tsambo ami’​zay Paoly noho ­Timoty,voho aze niara-dia tamine reny. Hainao va hoe aìa ty tany nandehànan-droze?

Vo nahavita ty liany fahatelo tamy asa fitoria Paoly, ka an-dala eny ­handeha holy ie henany zao. Nijàno telo tao ta-Efesosy tao Paoly tamy liany io. Ka, mbo lavalava mandilatse ty liany faharoe, lia fahatelo ­nataone io.

Laha fa niala ta-Troasy tao sambo nandehànan’​i Paoly iny, le nijàno kelikele ta-Mileto tao. Nanararaotsy fijanonan-droze io Paoly. Nanirake olo hangalake ty anti-panahy tamy fiangonan’​i Efesosy, tsy lavitse teo ie, mba ho avy a-Mileto ao. Nataony raha zay mba hahafahane miresake ­farany amin’​olo reo. Laha fa niavy ami’​zay ty fotoa handehàna sambo iny, le nalahelo biby iaby olo reny nahita an’​i Paoly nandeha!

Tafimpòly ta-Kaisaria tao sambo iny tamy farany. Mbo nipetrake tan-tranon’​i Filipo tao avao Paoly. Niavy tao Agabo mpaminany mba hananatse an’​i Paoly. Novolànin’​i Agabo mpaminany ie fa hogadrà, laha fa avy a-Jerosalema ane ka tokone hiamby soa. Marina raha zay, satria zay mihitsy ty raha niseho. Laha fa baka nogadrà roe tao ta-Kaisaria tao Paoly, le nalefa ta-Roma tany mba hotsarà tanatrehan’​i Kaisara filoha romana. Ndao ho hententsika ty raha niseho tamy liany ho a-Roma ane io.

Asan’​ny Apostoly toko faha-​19 zisiky amy toko faha-​26.



Fanontanea

  • Ia va ajà lahilahy miampatsy amy tany io? Nanino ie io?
  • Ino ty raha nataon’​i Paoly, laha fa hitane fa maty ajà lahilahy io?
  • Taìa ro nandehanan’​i Paoly noho Timoty miarake amin’​olo nanarake an-droze reny? Ino ty raha niseho laha fa nijàno ta-Mileto tao roze?
  • Ino ty anatse maré nataon’​i Agabo mpaminany an’​i Paoly? Tamy fomba manao akore ro nahatanterake safà zay?

Fanontanea Fanampine

  • Vakio Asan’​ny Apostoly 20:​7-38.

    Ino avao ty raha tokone hataontsika, laha teantsika ty ho “afake ami’​ty lion’​olo iaby”, arake ty safàn’​i Paoly amy Asan’​ny Apostoly 20:​26, 27 ao iny? (Ezek. 33:​8; Asa. 18:​6, 7)

    Nanino ty anti-panahy ro tokone ‘hitanjake maré safà azo antoke iny’, laha fa mampianatse? (Asa. 20:​17, 29, 30; Tit. 1:​7-9; 2 Tim. 1:​13)

  • Vakio Asan’​ny Apostoly 26:​24-32.

    Mba hahavitane ty asa nanirahan’​i Jesosy aze, le nanararaotse ty maha-romana aze Paoly. Tamy fomba manao akore ro nanaòvane raha zay? (Asa. 9:15; 16:​37, 38; 25:​11, 12; 26:32; Lioka 21:​12, 13)