Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 109: Nisafo An’​i Kornelio Petera

Tantara 109: Nisafo An’​i Kornelio Petera

APOSTOLY Petera hita mitsanga amy sary eto io. Namane aze roe lahy afarane ao reo. Fe manino lahilahy io ro mandohalike amin’​i Petera eo? Mety va raha ataone io? Hainao va hoe ia olo io?

Petera mifankahita amin’i Kornelio

Kornelio ty anara lahilahy io. Olo mana fahefà amy tafike romana ao ie. Tsy mahay an’​i Petera Kornelio, fe nisy nivòla aze mba hikaiky an’​i Petera ho an-tranone ao. Ndao ho henteantsika ty nahavy raha zay.

Jiosy ty mpanara-dia voalohane an’​i Jesosy, fe Kornelio tsy Jiosy. Tea an’​Andranahare Kornelio. Nivavake tamine ie, sady nanao raha soa maro ho an’​olo. Niseho tamine anjele raike zay ndraike andro ka nivòla hoe: ‘Tea-Ndranahare iha, ka hijànjy ty vavake ataonao ie. Maniràha olo iha, mba hangalake lahilahy raike atao hoe Petera zay. Mipetrake a-Jopa ao ie. An-tranon’​i Simona amoron-driake eny iny.’

Avy le nanirake lahilahy maromaro mba hila an’​i Petera, Kornelio. Fa nihanarinike tanàn’​i Jopa lahilahy reo, laha fa hamarain’​io. Tanabo tafotranon’​i Simona teo ro nisy an’​i Petera tamy fotoa io. Natao-Ndranahare ze hieritseretan’​i Petera fa nahita lamba bevata nijòtso baka an-​danitse ane ie. Hita tanaty lamba be io tao ty karazam-biby iaby. Tsy azo hany biby reo arake ty lalà-Ndranahare satria maloto. Fe nisy feo nivòla tamy fotoa io hoe: ‘Mitsangàna iha Petera. Vonò biby reo ka hano.’

‘Aha!’, hoy ty asan’​i Petera. ‘Tsy mbo nihina raha tsy malio aho.’ Fe hoy ty asa feo iny tamin’​i Petera: ‘Ka volàny sasy hoe maloto ty raha fa novolàni-Ndranahare hoe malio.’ Intelo raha zay ro niseho. Laha mbo sahìra nieritseritse ty dika raha nihitane io Petera, le niavy tan-trano tao lahilahy nirahin’​i Kornelio reny, ka nila an’​i Petera.

Nijòtso Petera ka nivòla hoe: ‘Zaho lahilahy ilànareo io. Ino ty antone iavianareo atoy?’ Nohazavà lahilahy reo fa nisy anjele raike nivòla tamin’​i Kornelio mba hikaike an’​i Petera ho an-tranone ane. Naneky hiarake amin-droze Petera, ka hamarain’​io avao le nandeha hisafo an’​i Kornelio ta-Kaisaria ane, Petera noho ty namane.

Namòry ty longone noho ty namane Kornelio. Laha fa niavy Petera, le namonjy aze Kornelio. Nandohalike tamy tombon’​i Petera teo ie arake ty hitanao amy sary eto io. Fe hoy ty asan’​i Petera hoe: ‘Mitsangàna; olo manahake anao avao aho.’ Resahi’​ty Baiboly fa tsy azo atao ty mandohalike noho mivavake amin’​olo. Jehovah raike avao ro tokone hivavahantsika.

Nitory tami’​ze olo iaby nivory teo, Petera. Nivòla ie hoe: ‘Hitako soa henany zao, fa tea-Ndranahare iaby ze olo maniry hanompo aze.’ Ka laha mbo nivòla Petera tamy fotoa io, le nandefa ty fanahine masy Andranahare, ka nanomboke nivòla tamy fivolàna samby hafa iaby ty olo. Nahatserike mpianatse jiosy niarake tamin’​i Petera reny raha niseho zay, satria nieritseritse roze fa ty Jiosy avao ro tea-Ndranahare. Fe, hain-droze ami’​zay henany zao fa tsy mihevitse ty olo baka amy foko raike ho soa na anabo mandilatse ty olo raike baka amy foko hafa Andranahare. Tsy raha soa tokone ho tiarontsika va raha zay?

Asan’​ny Apostoly 10:​1-48; 11:​1-18; Apokalypsy 19:10.



Fanontanea

  • Ia lahilahy mandohalike amy sary io?
  • Ino ty raha novolànin’​anjele raike tamin’​i Kornelio?
  • Nampahitàn’​i Jehovah ino Petera, tamin’​ie tanabo tafon-tranon’​i Simona ta-Jopa tao?
  • Nanino Petera ro nandrara an’​i Kornelio tsy handohalike na hivavake amine?
  • Nanino mpianatse jiosy niarake tamin’​i Petera reny ro nitserike?
  • Ino va ty raha miavake ianarantsika baka amy fitsidihan’​i Petera an’​i Kornelio io?

Fanontanea Fanampine

  • Vakio Asan’​ny Apostoly 10:​1-48.

    Ino ty dika safàn’​i Petera amy Asan’​ny Apostoly 10:42 ao iny, mikasike asa fitoria ty Fanjakà-Ndranahare? (Matio 28:19; Marka 13:10; Asa. 1:​8)

  • Vakio Asan’​ny Apostoly 11:​1-18.

    Nanao akore ty fihetsikin’​i Petera, laha fa nazava tamine ty tari-dalan’​i Jehovah mikasike ty olo hafa firenena? Amy fomba manao akore ro hanahàfantsika aze? (Asa. 11:​17, 18; 2 Kor. 10:​5; Efes. 5:​17)