Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 106: Naboake Baka Am-pigadrà Ao

Tantara 106: Naboake Baka Am-pigadrà Ao

MBA henteo moa anjele mamòha varavara trano figadrà io. Apostolin’​i Jesosy lahilahy naboakine bakao reo. Ndao hianarantsika ty antone nanaòva lahilahy reo am-pigadrà ao.

Anjele raike mampiboake apostoly reo

Vo tsy ela zay ty fotoa nandatsahan’​i Jesosy fanahy masy tamy mpianatsine reny. Ka zao ty raha niseho: nandeha tamy tempoly ta-Jerosalema tao Petera noho Jaona ndraike hariva. Nisy lahilahy nalemy liane naha olo aze zay ty tao; nipetrake marinike varavara tempoly io. Nandesin’​olo teo lahilahy io isan’​andro, soa afake hangatake drala ami’​ze olo avy amy tempoly ao. Laha fa nahita an’​i Petera noho Jaona ie, le nangatake amin-droze mba hanome raha aze. Ino ty raha nataon’​apostoly reo?

Nijàno roze ka nanenty soa lahilahy mahantra io. ‘Tsy manan-drala aho’, hoy ty asan’​i Petera, ‘fa hameako anao ze raha ananako. Amy anaran’​i Jesosy, mitsangàna iha, ka mandehàna!’ Norambesin’​i Petera tamy tanane ankavàna lahilahy io, ka tampotampoke teo ie le nitsanga soa ka nanomboke nandeha ami’​zay. Laha fa nahita raha zay ty olo, le nitserike biby, sady faly tamy fahagagà soa io.

Hoy ty asan’​i Petera hoe: ‘Baka amy heri-Ndranahare, aze namelo an’​i Jesosy tamy maty iny, ro anaòvanay fahagagà zao.’ Niavy teo mpitarike ­fivavàha reny, tamy fotoa nivolànan’​i Petera noho Jaona io. Neloke bibike roze, satria niresake tamin’​olo mikasike ty fanangàna an’​i Jesosy tamy maty Petera noho Jaona. Nosamborin-droze ami’​zay Petera noho Jaona, ka nogadràn-droze laha fa bakeo.

Nanao fivoriam-be ty mpitarike fivavàha laha fa hamarain’​iny. Nandesy tamin-droze teo Petera noho Jaona, miarake amy lahilahy nalemy taloha iny. ‘Herin’​ia ro anaòvanareo fahagagà zao?’, hoy ty asa mpitarike fivavàha reny nanontany.

Nivòla tamin-droze Petera fa ty heri-Ndranahare, ro namelo ndraike an’​i Jesosy tamy maty. Tsy hita mpisoro reny ty raha hataon-droze, satria roze mihitsy ro nahita maso fahagagà io, sady raha nisy vatane raha io. Ka le nohafatsafàrin-droze maré apostoly reny, mba tsy hiresake mikasike an’​i Jesosy ndre aìa ndre aìa; ndre amin’​ia ndre amin’​ia. Nengàn-droze handeha ami’​zay apostoly reny laha fa bakeo.

Laha fa nandeha ty fotoa, le mbo nitory mikasike an’​i Jesosy avao apostoly reny sady nanafake aretin’​olo maro. Niparitake ty vaovao mikasike fahagagà reo. Ka maro ty vahoake nipetrake tamy tany manodidy an’​i Jerosalema tao ro nanday ze longon-droze marary mba hotahàn’​apostoly reo. Nahavy ty mpitarike fivavàha hialo apostoly reo raha zay, ka nosamborin-droze ndraike apostoly reny le nogadrà. Fe tsy ela ty nijanonan-droze tam-​pigadrà tao.

Nisy namòha ty varavara trano figadrà iny tamy andro haly. Anjele-Ndranahare ty namòha aze, arake ty hitanao amy sary eo io. Hoy ty asan’​anjele iny: ‘Ndahàna nareo, ka mitsangàna amy tempoly eo; mazotoa miresake amy vahoake reo.’ Laha fa nanirake lahilahy hangalake apostoly reny tam-pigadrà tao mpitarike fivavàha reny, hamaray maraindray, le fa tsy hita tao sasy roze. Nihita lahilahy reo nampianatse tamy tempoly tao apostoly reny, laha fa tafara atoy, ka nandesin-droze tamy trano Fitsarà ­Anabo Jiosy tany.

‘Fa nandrara anareo tsy hampianatse raha mikasike an’​i Jesosy zao zahay’, hoy ty asa mpitarike fivavàha reny. ‘Fe, fa nofenoanareo fampianara io Jerosalema manontolo.’ Namaly apostoly reny laha fa bakeo hoe: ‘Andranahare ro atahòranay mihoatse ty olo.’ Ka le nanohy nampianatse ty “vaovao soa” avao roze. Tsy ohatse soa tokone harahintsika kea va raha zay?

Asan’​ny Apostoly toko faha-​3 zisiky amy toko faha-​5.



Fanontanea

  • Ino ty raha niseho tamin’​i Petera noho Jaona ndraike hariva tamin-droze handeha ho amy tempoly ao?
  • Ino ty raha novolànin’​i Petera tamy lahilahy nalemy iny? Namean’​i Petera raha soa biby mandilatse ty drala lahilahy io. Ino raha zay?
  • Nanino mpitarike fivavàha reny ro neloke? Nataon-droze akore Petera noho Jaona?
  • Ino hoasan’​i Petera tamy mpitarike fivavàha reny? Ino ami’​zay ty raha nafepétsy mpitarike fivavàha reny apostoly reo?
  • Ino ty antone nialòna mpitarike fivavàha reny apostoly reo? Fe ino ty raha niseho laha fa nogadrà fanindroany apostoly reny?
  • Ino ty safà navalin’​apostoly reny, laha fa nandesy tamy Fitsarà Anabo ane roze?

Fanontanea Fanampine

  • Vakio Asan’​ny Apostoly 3:​1-10.

    Manino safàn’​i Petera amy Asan’​ny Apostoly 3:​6 io ro manampy antsika hahazo soa fa mana ty lanjany hafatse mikasike Fanjakà-Ndranahare torintsika io, ndra tsy afake manao fahagagà aza tsika? (Jaona 17:​3; 2 Kor. 5:​18-20; Fil. 3:​8)

  • Vakio Asan’​ny Apostoly 4:​1-31.

    Amy fomba manao akore ro hanahàfantsika rahalahintsika kristiana tamy taonjato voalohane reny, laha fa misy ty fanenjeha antsika? (Asa. 4:​29, 31; Efes. 6:​18-20; 1 Tes. 2:​2)

  • Vakio Asan’​ny Apostoly 5:​17-42.

    Fa nisy olo tsy Vavolombelo va taloha tany na henany zao, nalala-tsay, ka niaro ty asa fitoria? Manomeza ohatse. (Asa. 5:​34-39)