Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 103: Militse amy Trano Mihìly

Tantara 103: Militse amy Trano Mihìly

NIJÀNO raike tan-dolon’​i Jesosy teo Maria, laha fa nandeha Petera noho Jaona. Nanomboke nitàny ie. Niondrike ie laha fa bakeo, ka nanenty tanaty lolo io ao, arake ty nihitantsika tamy sary tambalike tao iny. Nahita anjele roe tao Maria! Nanontanian’​anjele reo ie hoe: ‘Manino va iha mitàny io?’

Namaly Maria hoe: ‘Nisy nangalatse tatoa Tompoko iny, sady tsy haiko ty nametrahane aze.’ Nitolike Maria laha fa bakeo, ka nahita lahilahy raike zay. Nanontany an’​i Maria lahilahy io hoe: ‘Ia va olo ilànao io?’

Nieritseritse Maria hoe, olo mpikarakara noho mpiamby zariday lahilahy io, ka mety ho ie ro nangalake ty vatan’​i Jesosy. Novolànine lahilahy io hoe: ‘Laha iha ro nangalake fatin’​i Jesosy iny, mba volàno ahy lahy ty nasianao aze.’ Jesosy lahilahy io, fe tsy nihain’​i Maria ty tarehine. Laha fa nokaìhy lahilahy io tamy anarane Maria, le nihain’​i Maria ami’​zay fa Jesosy io. Nilay malaky ie ka nivòla tamy mpianatse reny hoe: ‘Nahita an’​i Tompo aho!’

Tamy andro io avao, fe fa harivariva le nisy mpianatsin’​i Jesosy roe rezay nandeha an-dala eny, ho a-Emaosy ane. Nisy lahilahy raike zay nanarake an-droze. Nanazava raha maro baka amy Baiboly ao tamy mpianatse reo lahilahy io, ka mba afakafake ty alahelon-droze an’​i Jesosy novonòa iny. Nijàno roze tamy farane mba hihina, nanomboke hay mpianatse reny ami’​zay fa Jesosy lahilahy io. Nanjavo Jesosy, ka nimpòly malaky ta-Jerosalema tany mpianatse roe lahy reo mba hivòla tamy apostoly hafa mikasike raha iaby rezay.

Mbo niseho tamin’​i Petera kea Jesosy tamy fotoa io. Falifale bibike ty mpianatse hafa laha fa naharé vaovao rezao. Nandeha ta-Jerosalema tany kea mpianatse roe reny, ka nifankahita tamy apostoly sasane reny. Nambaran-droze apostoly reo ty fomba nisehoan’​i Jesosy tamin-droze tan-dala teny. Hainao va hoe ino ty raha nahatserike niseho tamy fotoa nitantarà mpianatse roe reo raha zay?

Henteo sary io. Niseho tamy mpianatsine reny tan-trano tao Jesosy, ndra nihìly aza ty varavara. Falifale bibike mpianatse reo! Tsy andro soa biby sady niavake va ty fahitanao andro io tami’​zay? Tiaronao va hoe im-piry zay Jesosy ro niseho tamy mpianatsine reo? Tsy fa indimy va zay?

Jesosy miseho amy mpianatsine

Tsy niarake tamy namane reo ty apostoly Tomasy tamy fotoa nisehoan’​i Jesosy io. Nitantara tamin’​i Tomasy mpianatse reo hoe: ‘Nahita an’​i Tompo zahay!’ Fe nivòla Tomasy fa mila mahita an’​i Jesosy mihitsy ie vo hino hoe niseho tamin-droze vatane ie. Laha fa valo andro tafara atoy, le nivory tanaty trano mihìly zay ndraike mpianatse reny. Tao kea Tomasy tamy fotoa io. Niseho tampoke tamin-droze ndraike Jesosy, ka nino ami’​zay Tomasy.

Jaona 20:​11-29; Lioka 24:​13-43.



Fanontanea

  • Ino ty raha novolànin’​i Maria tamy lahilahy nataone ho mpiamby zariday iny? Fe tamy fomba manao akore ro nahaìzane fa Jesosy olo io?
  • Ino ty raha niseho, laha fa tan-dala ho an-tanàn’​i Emaosy ane ty mpianatse roe?
  • Ino ty raha nahatserike niseho, laha mbo nitantara ty nisehoan’​i Jesosy tamin-droze mpianatse roe lahy reny?
  • Impiry Jesosy ro niseho tamy mpanara-dia aze reo?
  • Ino hoy ty asan’​i Tomasy, laha fa naharé ie fa nahita an’​i Tompo ty mpianatse? Fe ino ty raha niseho, laha fa afake valo andro tafara atoy?

Fanontanea Fanampine

  • Vakio Jaona 20:​11-29.

    Te hivòla va Jesosy amy Jaona 20:23 ao, fa namea fahefà hamela heloke ty olombelo? Hazavao. (Sal. 49:​2, 7; Isaia 55:​7; 1 Tim. 2:​5, 6; 1 Jaona 2:​1, 2)

  • Vakio Lioka 24:​13-43.

    Amy fomba manao akore ro hanomànantsika ty fontsika mba haneke ty fahamarìna amy Baiboly ao? (Lioka 24:​32, 33; Ezra 7:10; Matio 5:​3; Asa. 16:14; Heb. 5:​11-14)