Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 98: Jesosy Tamy Vohitse Oliva Teo

Tantara 98: Jesosy Tamy Vohitse Oliva Teo

AMY Vohitse Oliva eo Jesosy. Apostoline iaby lahilahy efatse miarake amine eo reo. Retoa iaby ty anaran-droze: Andrea noho Petera mpirahalahy, voho Jakoba noho Jaona kea mpirahalahy. Tempoli-Ndranahare ta-Jerosalema tao iny aze hitanao lavidavitse eroy io.

Fa roe andro zay ty nilìran’​i Jesosy ta-Jerosalema tao niarake tamin’​ampondra iny. Talata ty andro henany zao. Vo maraindray le fa tamy tempoly tao Jesosy. Ta-hamono aze biby mpisoro reny fe navàka roze, satria tean’​olo Jesosy.

Jesosy noho apostoliny

‘Bibilava, taranaki’​ty menarà retia!’ Ho’​zay ro nikaìhan’​i Jesosy mpitarike fivavàha reo. Nivòla tamin-droze kea Jesosy laha fa bakeo, fa hosazì-Ndranahare roze, satria fa maro maré ty raha raty nataon-droze. Tafarani’​zay, le niavy tamy Vohitse Oliva teo Jesosy. Nisy raha nanontanian’​apostoly efatse reny an’​i Jesosy laha fa bakeo. Hainao va hoe ino raha nanontanian-droze an’​i Jesosy io?

Nanontany an’​i Jesosy ty raha hiseho amy hoavy apostoly reo. Fa hain-droze soa fa hangalake kila raha raty an-tany etoy Jesosy. Fe tean-droze ho hay hoe ombìa vatane raha zao vo ho avy. Ombìa va Jesosy vo ho avy ndraike amy maha-Mpanjaka aze?

Fa hain’​i Jesosy fa tsy ho afake hahita aze sasy apostoline an-tany etoy reo laha fa ho avy ndraike ie. Satria, fa an-danitse ane ie amy fotoa io, ka tsy ho afake hahita aze roze. Ka nambaran’​i Jesosy an’​apostoline reny ty raha hiseho an-tany etoy, laha fa ho Mpanjaka an-danitse ane ie. Hainao va ty sasane amy raha hiseho reo?

Nivòla Jesosy, fa hisy aly be, ho maro ty olo harare noho ho mosaré, hisy famonoan’​olo, sady hisy horohoron-tany be kea. Nivòla kea Jesosy fa hotorỳ amy tany manontolo ty vaovao soa mikasike ty fanjakà-Ndranahare. Fa hitantsika miseho amy androntsika henany zao iaby va raha reo? Eka! Azontsika antoke soa henany zao fa mpanjaka an­danitse ane Jesosy. Tsy ho ela, le hataone tsy hisy raha raty sasy an-tany etoy.

Matio 21:46; 23:​1-39; 24:​1-14; Marka 13:​3-10.



Fanontanea

  • Aìa Jesosy amy sary io? Ia olo miarake amine reo?
  • Fa ho natao mpisoro reo ino Jesosy tamy tempoly tao? Ino ty raha novolànin’​i Jesosy tamin-droze?
  • Nanontany ino an’​i Jesosy apostoly reny?
  • Nanino Jesosy ro nivòla tamin’​apostoly reo ty raha hiseho an-tany etoy, laha fa ho Mpanjaka an-danitse any ie?
  • Ino ty raha novolànin’​i Jesosy fa hisy, aloha’​ty hamaràna ty faharatia an-tany etoy?

Fanontanea Fanampine

  • Vakio Matio 23:​1-39.

    Hita amy Baiboly ao fa azo atao ty mampiasa anaram-boninahitse tsy ara-pivavàha. Fe manao akore safàn’​i Jesosy amy Matio 23:​8-11 ao iny, laha ty fampiasà anaram-boninahitse amy fiangona kristiana eo ro resahy? Mety va? (Asa. 26:25; Rom. 13:​7; 1 Pet. 2:​13, 14)

    Ino ty raha natao Fariseo reo, mba hanakàna ty olo tsy ho Kristiana? Ino ty raha mitovy amin’​io, atao’​ty mpitarike fivavàha henany zao? (Matio 23:13; Lioka 11:52; Jaona 9:22; 12:42; 1 Tes. 2:​16)

  • Vakio Matio 24:​1-14.

    Ilà vatane ty miaritse. Ino ty antone arake ty resahy amy Matio 24:13 ao?

    Ino ty dika safà hoe “farane” amy Matio 24:13 ao? (Matio 16:27; Rom. 14:​10-12; 2 Kor. 5:​10)

  • Vakio Marka 13:​3-10.

    Amy Marka 13:10 ao, ino ty safà mampiseho fa mila mitory ty vaovao soa malaky vatane tsika? Manosike antsika hanao ino safàn’​i Jesosy reo? (Rom. 13:​11, 12; 1 Kor. 7:​29-31; 2 Tim. 4:​2)