Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 93: Nanome Hany Olo Maro Jesosy

Tantara 93: Nanome Hany Olo Maro Jesosy

NISY raha mampanahìra niseho. Maty Jaona Mpanao Batisa. Tsy tea aze Herodiasy, valy mpanjaka iny, ka nataone ze hanampàha ty lohan’​i Jaona.

Nalahelo biby Jesosy laha fa naharé raha io. Nandeha tamy toera tsy misy olo tany ie raike avao, fe nanarake aze vahoake reny. Noferinesan’​i Jesosy biby olo reo laha fa nihitane. Nanambara ty fanjakà-Ndranahare tamin’​olo reny ie, sady nanafake ty arete nahazo an-droze.

Nivòla tamin’​i Jesosy ty mpianatsine laha fa hariva andro iny hoe: ‘Mitòka maré toera misy antsika toy. Ty andro kea fa mihariva. Ka manino kay laha ampolỳ ami’​zay olo reo, soa ho afake hivily hany ho an-​droze an-tanà ane!’

Jesosy Nanome hany olo maro

‘Tsy mahazo mandeha roze’, hoy ty asan’​i Jesosy namaly. ‘Ameonareo hany roze.’ Nitolike tamin’​i Filipo tany Jesosy laha fa bakeo, ka ­nanontany aze hoe: ‘Aìa ro hivilianantsika hany hafàha olo maro reto?’

Namaly Filipo hoe: ‘Drala be ty ho lanintsika, vo hahazo anjara kelikele ty olo kiraidraike.’ Nivòla kea Andrea hoe: ‘Toy misy ajà manday hany ho antsika, fe mofo limy noho fia roe avao raha toy, ka tsy ampy ho an’​olo maro biby reto.’

‘Volàno olo reo mba hipetrake amy tany’, hoy Jesosy. Laha fa baka nivavake tami-Ndranahare ie, le nanomboke nanampatampake mofo reny. Bakeo, nozarà’​ty mpianatse tamy vahoake mofo noho fia reny. Nisy lahilahy 5 000 noho ampela voho ajà an’​arivone nihina teo. Nihina roze, ka vintsy iaby. Laha fa nahòro mpianatse reo ty hany sisa tsy lany, le nahafeno panié 12.

Nampiondrànin’​i Jesosy laka ami’​zay mpianatsine reny, ka nalefane hiampita Riakin’​i Galilia iny. Laha fa haly ty andro, le nisy tsioke mahery, ka nahetsiketsi’​ty tsioke laka io. Navàka biby mpianatsin’​i Jesosy reny. Laha fa misasakaly ami’​zay, le nahita olo nandeha tamy rano teo mpianatse reny, ka namonjy an-droze. Natahotse roze satria tsy hain-droze olo io, ka nikiakiake maré roze iaby.

‘Ka mavàka nareo’, hoy ty asan’​i Jesosy. ‘Zaho avao toy!’ Fe tsy nino mpianatse reny, ka hoy ty asan’​i Petera: ‘Laha iha vatane io, Tompo, le mba volàno aho hamonjy anao an-drano eny.’ Namaly Jesosy hoe: ‘Avia bakao moa!’ Niala tamy laka iny Petera, ka nandeha tamy rano iny teo! Navàka maré Petera laha fa bakeo, ka nanomboke nilentike. Fe navòtan’​i Jesosy ie.

Mbo nanome hany olo an’​arivone mahery ndraike Jesosy, ka mofo fito noho fia vitsivitsy avao ro nanaòvane raha zay. Samby nivintsy iaby ty olo maro. Tsy mahatserike anao va ty fomba nikarakaràn’​i Jesosy ty olo? Laha fa ie ro mitarike antsika amy fanjakà-Ndranahare ao, le tsy hisy raha hanahìra antsika sasy!

Matio 14:​1-32; 15:​29-38; Jaona 6:​1-21.



Fanontanea

  • Ino ty raha nampalahelo nahazo an’​i Jaona? Nanao akore Jesosy laha fa naharé raha zay?
  • Akore ty fomba nanomezan’​i Jesosy hany olo maro biby nanarake aze reny? Laha fa nahòro hany sisa tsy lany reny, nanao akore ty hamaroane?
  • Ino ty antone nampavàka mpianatse reny tamy andro halike io? Ino ty raha nahazo an’​i Petera?
  • Nanao akore ndraike ty fomba namahanan’​i Jesosy olo an’​arivone mahery reny?
  • Ino ty antone ivolànantsika fa ho soa ty fiaìna, laha fa Jesosy ro ho Mpanjaka’​ty tany?

Fanontanea Fanampine

  • Vakio Matio 14:​1-32.

    Toetsin’​i Petera manao akore iny ro hita amy Matio 14:​23-32 ao?

    Tantara manao akore amy Baiboly ao iny ro ahità fa nanjary nana sain’​olobe Petera? (Matio 14:​27-30; Jaona 18:10; 21:​7; Asa. 2:​14, 37-40; 1 Pet. 5:​6, 10)

  • Vakio Matio 15:​29-38.

    Tamy fomba manao akore ro nampisehoan’​i Jesosy fa nanaja ty raha namean’​i Jehovah aze ie? (Matio 15:37; Jaona 6:12; Kol. 3:​15)

  • Vakio Jaona 6:​1-21.

    Akore ty fomba hanahàfa’​ty Kristiana an’​i Jesosy, laha ty resake fanajà fitondram-panjakà ro resahy? (Jaona 6:15; Matio 22:21; Rom. 12:​2; 13:​1-4)