Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 92: Mamelo ty Maty Jesosy

Tantara 92: Mamelo ty Maty Jesosy

AJÀ ampela hitanao amy sary eto io, le 12 tao. Mitanjake ty tanane Jesosy. Baba noho renin’​ajà io, aze mitsanga anilane eo reo. Hainao va ty antone maha falifale an-droze, arake ty hitantsika amy sary io? Ndao ho henteantsika.

Jesosy namelo anak’ampela Jairo

Lahilahy nalaza ty baban’​ajà ampela io. Jairo ty anarane. Narary ty anak’​ampelane ndraike andro, ka napetrake tan-kitrely teo. Tsy nety janga ie fa nanjeky avao ty aretine. Fa natahotse biby Jairo noho valine io, satria fa atahòra ho maty anak’​ampelan-droze io. Nandeha nila an’​i Jesosy Jairo, satria fa naharé mikasike ty fahagagà nataon’​i Jesosy ie.

Nifeno vahoake biby nanodidy an’​i Jesosy tamy fotoa nahitan’​i Jairo aze. Fe nisisike tanaty vahoake maro reny tao Jairo ka niankohoke tan-tombon’​i Jesosy teo. ‘Marary biby ty anak’​ampelako’, hoy ty asan’​i Jairo. ‘Mba miavia aminay ane lahy iha hitàha aze’, hoy ty fangatahane. Naneky hiarake amin’​i Jairo ho an-tranone ane Jesosy.

Laha fa nandeha roze, le mbo nivorivory manodidy an’​i Jesosy avao ty olo. Nijàno tampoke Jesosy. Nanontany ie hoe: ‘Ia ro nikasike ahy teo?’ Ren’​i Jesosy fa nisy hery niala tamine tao. Fe ia olo nikasike aze io? Ampela fa narare mafy tanaty 12 tao, ampela nikasike an’​i Jesosy io. Niavy tamin’​i Jesosy teo ie mba hikasike ty akanjon’​i Jesosy, ka le niafake ty aretine!

Falifale ty ain’​i Jairo laha fa nahita fahagagà zay, satria hitane fa mora tamin’​i Jesosy ty nanafake aretin’​olo raike. Fe niavy bakany irake raike zay, ka nivòla tamin’​i Jairo ie hoe: ‘Ka sahiraninao sasy Jesosy fa maty anak’​ampelanao iny.’ Tsy taitse Jesosy sady nivòla tamin’​i Jairo hoe: ‘Ka taitse iha, ho velo ananao io.’

Tamy farane, le niavy tan-tranon’​i Jairo tao roze. Nalahelo iaby ty olo teo, ka nitàny. Fe nivòla Jesosy hoe: ‘Ka mitàny nareo. Tsy maty ajà io fa miroro.’ Fe nihehy roze iaby sady nikizake an’​i Jesosy, satria hain-droze fa maty ajà io.

Nandesin’​i Jesosy nilitse tamy trano niroroan’​ajà iny tao rae noho renin’​ajà ampela io miarake ami’​ty apostoline telo. Norambesine tamy tanane ajà iny ka hoy ty asane hoe: ‘Mitsangàna!’ Nivelo ndraike ajà ampela iny arake ty hita amy sary eto. Nitsanga ie ka nandehandeha! Zay ty antone mahafaly bibike ty babane noho ty renine eto io.

Tsy vo io avao ty olo novelomin’​i Jesosy. Resahi’​ty Baiboly fa anake lahin’​ampela maty valy ta-Naina tao zay ro novelomin’​i Jesosy voalohane. Laha fa tafara atoy, le namelo an’​i Lazarosy anadahin’​i Marta noho Maria kea Jesosy. Laha fa ho mpanjaka’​ty Fanjakà-Ndranahare Jesosy, le hovelomine ndraike olo maro biby fa nimaty reny. Tsy mahafaly antsika va raha zay?

Lioka 8:​40-56; 7:​11-17; Jaona 11:​17-44.



Fanontanea

  • Ia va ty baban’​ajà ampela amy sary io? Ino raha mampanahìra an-droze morovaly io?
  • Ino ty raha nataon’​i Jairo laha fa nahita an’​i Jesosy ie?
  • Ino ty raha niseho laha fa nandeha ho an-tranon’​i Jairo ane Jesosy? Fe ino ty hafatse novolàny tamin’​i Jairo tan-dala teny?
  • Nanino olo tan-tranon’​i Jairo tao reny ro nihehy an’​i Jesosy?
  • Nandesin’​i Jesosy ho amy efitse misy ajà ampela iny ane ty rae noho ty renine miarake amy apostoly telo. Ino ty raha nataon’​i Jesosy laha fa bakeo?
  • Ia ty olo nimaty ka novelomin’​i Jesosy ndraike? Mampiseho ino raha zay?

Fanontanea Fanampine

  • Vakio Lioka 8:​40-56.

    Tamy fomba manao akore ro nampisehoan’​i Jesosy tamin’​ampela nandeha lio iny, fa be fangoraham-po noho nahay nandanjalanja ie? Ino ty fianara tokone hotahafi’​ty anti-panahy kristiana baka amy raha zay? (Lioka 8:​43, 44, 47, 48; Lev. 15:​25-27; Matio 9:​12, 13; Kol. 3:​12-14)

  • Vakio Lioka 7:​11-17.

    Mahafake ty alahelon’​olo nana longo fa nimaty, safàn’​i Jesosy tamin’​ampela fa maty valy ta-Naina tao iny. Ino ty antone? (Lioka 7:13; 2 Kor. 1:​3, 4; Heb. 4:​15)

  • Vakio Jaona 11:​17-44.

    Nanao akore ty fomba nampisehoan’​i Jesosy, fa mety ty mitàny, laha fa misy longontsika maty? (Jaona 11:​33-36, 38; 2 Sam. 18:33; 19:1-4)