Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 96: Nitàha ty Olo Marare Jesosy

Tantara 96: Nitàha ty Olo Marare Jesosy

NAFÀHAN’​I Jesosy iaby ty aretin’​olo laha fa nandehandeha tamy tanà io tao ie. Nalaza tamy tanà io, noho tamy manodidy teo, ty resake mikasike fahagagà nataon’​i Jesosy reny. Ka nandesin’​olo tamin’​i Jesosy teo iaby ty kolitsake, ty jiky, ty marény, noho ty olo manan’​arete hafa kea. Nafàhan’​i Jesosy iaby aretin’​olo reny, ka janga roze.

Fa telo tao mahery zay ty nananòvan’​i Jaona batisa an’​i Jesosy. Nivòla tamy apostoline reo Jesosy, fa handeha ho a-Jerosalema ane ie. Hisy hamono ie laha fa ane, fe hovelomy ndraike laha fa bakeo. Zisiky hiavia fotoa zay, le mbo nitàha aretin’​olo avao Jesosy.

Jesosy nitaha ampela marary

Nampianatse tamy andro sabata Jesosy ndraike andro zay. Tami’​ty Jiosy Sabata zao, le andro tsy azo anaòva raha mihitsy. Narary biby ampela hitanao amy sary eto io. Tsy afake nitsanga soa ampela io tanati’​ty 18 tao, fa niondrike avao. Napetran’​i Jesosy tamin’​ampela io teo ty tanane, ka avy le nahay nitsanga soa ampela io. Afake ty aretine!

Nimeloke bibike mpitarike fivavàha jiosy reny laha fa nahita raha io. Nikiakiake tamy vahoake reny ty raike tamin-droze hoe: ‘Enin’​andro avao ro tokone hiasàntsika. Ka afake mitàha aretin’​olo tsika amy andro reo, fa tsy amy andro sabata mihitsy!’

Fe hoy ty asan’​i Jesosy hoe: ‘Lahilahy raty fanahy nareo! Ia aminareo kiraidraike reo moa ro tsy hamàha ty aosinareo ka hampinon-drano aze laha fa Sabata zay? Ka sandraky ampela mahantra, fa nijaly tanaty 18 tao toy, tsy tokone hampea va ie, soa ho afake arete mahazo aze io ndre amy andro sabata?’ Nimenatse biby lahilahy raty fanahy reny laha fa nivòla raha zay Jesosy.

Nandeha ta-Jerosalema ane Jesosy noho apostoline reo tafarafara atoy. Laha vo tafaboake ty tanàn’​i Jeriko roze, le niré mpangatake roe jiky rezay fa nandalo Jesosy. Nikaikaike maré roze hoe: ‘Jesosy e! Mba ampio lahy zahay!’

Nokaìhin’​i Jesosy lahilahy jiky reny, ka nanontaniane hoe: ‘Ino ty raha teanareo hataoko aminareo?’ Namaly roze hoe: ‘Mba ampahitào lahy ty masonay!’ Notsapàn’​i Jesosy ty mason-droze, ka avy le nahita roze! Hainao va ty antone nanaòvan’​i Jesosy fahagagà maro iaby rezao? Satria teane ty olo sady irìne hino aze iaby roze. Ka, azo antoke kea, fa tsy hisy olo harare sasy an-tany etoy, laha fa Jesosy ro ho Mpanjaka.

Matio 15:​30, 31; Lioka 13:​10-17; Matio 20:​29-34.



Fanontanea

  • Ino ty raha nataon’​i Jesosy laha fa nandehandeha tamy tanà io tao ie?
  • Ino ty raha novolànin’​i Jesosy tamy apostoline reny, telo tao tafara’​ty batisane?
  • Ia olo amy sary reo? Ataon’​i Jesosy ino ampela io?
  • Nanohitse an’​i Jesosy mpitarike fivavàha reny, fe nimenatse roze laha fa namaly an-droze Jesosy. Ino ty antone?
  • Ino ty raha nataon’​i Jesosy tamy lahilahy roe jiky rezay, laha fa niha-narìny an’​i Jeriko ie miarake amy apostoline reny?
  • Ino ty antone anaòvan’​i Jesosy fahagagà?

Fanontanea Fanampine

  • Vakio Matio 15:​30, 31.

    Nampiasa an’​i Jesosy mba hampisehoane ty herine Jehovah. Tantarao ty fomba miavake nanaovane raha zay. Tokone hanao akore kea ty finoantsika raha nampitamànin’​i Jehovah amy tontolo vaovao ao? (Sal. 37:29; Isaia 33:​24)

  • Vakio Lioka 13:​10-17.

    Tamy Sabata ro nanaòvan’​i Jesosy ty sasane tamy fahagagà niavake biby. Fanampia manao akore ro handesine ho ahi’​ty olombelo laha fa amy Fanjakàne Arivo Tao io? (Lioka 13:​10-13; Sal. 46:​9; Matio 12:​8; Kol. 2:​16, 17; Apok. 21:​1-4)

  • Vakio Matio 20:​29-34.

    Nahita fotoa hanampia ty olo avao Jesosy, ndre fa maro aza ty raha nataone. Manao akore ty fomba ampisehoa tantara io raha zay? Ino koa ty fianara azontsika ami’​zay? (Deot. 15:​7; Jak. 2:​15, 16; 1 Jaona 3:​17)