Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 95: Ty Fomba Fampianaran’​i Jesosy

Tantara 95: Ty Fomba Fampianaran’​i Jesosy

NDRAIKE andro Jesosy, le nivòla tamy lahilahy raike mba ho tea ty namane. Nanontane lahilahy iny Jesosy hoe: ‘Ia va ty namanao?’ Hain’​i Jesosy soa ty raha noeritserety lahilahy io. Nieritseritse lahilahy io fa ty olo mitovy karàza amine avao na mitovy fivavàha amine ro namane. Ka ndao ho henteantsika ty raha novolànin’​i Jesosy tamine.

Mampiasa ohatse Jesosy kindraindraike, laha fa mampianatse. Io ty raha nataone teto. Notantaràne ty tantara’​ty Jiosy raike noho Samaritana raike. Fa nianarantsika taloha fa tsy tea Samaritana ty Jiosy. Ho’​zao tantara nataon’​i Jesosy io:

Nisy Jiosy raike nandeha a-Jeriko ane, ndraike andro. Fe nisy mpandrava, nanàka aze tan-dala teny, ka nangalatse ty dralane noho namàngo aze. Tsy nengà mpandrava io ie laha tsy fa ho nimaty.

Nisy mpisoro jiosy nandalo tamy lala io teo. Nihitane soa lahilahy maratsy iny, mandry an-dala eo. Ino ty raha hataone arake ty hevitsinao? Nivìo lala hafa ie ka nandeha. Nisy mpitarike fivavàha hafa kea nandalo laha fa bakeo. Levita lahilahy io. Nijàno va ie? Aha, tsy nanampy lahilahy naratsy iny ie fa nandeha avao. Hitanao amy sary io mpisoro noho Levita iny, mihatake lavitse aloha eroy.

Fe henteo aze miarake amy lahilahy maratsy etoa io. Samaritana lahilahy io. Nanampy lahilahy jiosy maratsy io ie. Nasiane aòly ty fery tamy Jiosy io, ka nandesine tamy toera azo ikarakarà aze Jiosy iny laha fa bakeo.

Samaritana soa fanahy

Nanontanian’​i Jesosy lahilahy nametrake fanontanea tamine voalohane iny laha fa nivita tantara io. Hoy Jesosy: ‘Ia tamin-droze telo lahy reo ro eritseretinao fa nama lahilahy naratsy io? Mpisoro iny va? Sa aze Levita iny? Sa aze raike Samaritana iny?’

Namaly lahilahy iny hoe: ‘Aze Samaritana soa fanahy iny.’

Ka hoy Jesosy: ‘Marina raha volàninao zay. Ka ndahàna kea iha, ka manaòva raha manahake zay.’

Tsy teanao va ty fomba fampianaran’​i Jesosy? Afake mianatse raha maro soa biby tsika, laha mijànjy soa ty safàn’​i Jesosy amy Baiboly ao, sa tsy zay?

Lioka 10:​25-37.



Fanontanea

  • Ino ty raha nanontanea lahilahy raike an’​i Jesosy? Ino ty antone?
  • Mampiasa ino Jesosy kindraindraike laha fa mampianatse? Ino koa ty raha fa haintsika mikasike ty Jiosy noho Samaritana?
  • Arake tantara nataon’​i Jesosy io, ino ty raha niseho tamy Jiosy raike laha fa nandeha ho a-Jeriko ane ie?
  • Nanao akore ty fihetsiky mpisoro jiosy noho ty Levita raike, nandalo tamy lala io teo?
  • Ia ty nanampy Jiosy naratsy io, arake ty hita amy sary eo?
  • Ino ty fanontanea napetran’​i Jesosy tamy lahilahy iny, laha fa vita tantara io? Ino hoasa lahilahy iny aze?

Fanontanea Fanampine

  • Vakio Lioka 10:​25-37.

    Tsy avy le namaly ty fanontanea lahilahy raike nahay Lalàna zay Jesosy, fa nanampy aze mba hieritseritse. Tamy fomba manao akore ro nanaòvane raha zay? (Lioka 10:26; Matio 16:​13-16)

    Nanino Jesosy ro nampiasa fanohàra, mba hanampia ty olo mpijànjy aze tsy hifilifily karazan’​olo? (Lioka 10:​36, 37; 18:​9-14; Tit. 1:​9)