Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 88: Nataon’​i Jaona Batisa Jesosy

Tantara 88: Nataon’​i Jaona Batisa Jesosy

MBA henteo moa voromailala mijòtso an-dohan’i lahilahy io eo. Jesosy lahilahy io. Fa 30 tao eo ho eo ie henany zao. Jaona lahilahy anilane eo io. Fa nianatse raha maro mikasike aze avao tsika taloha. Tiaronao va tamin’i Maria nisafo an’i Elizabeta iny? Nihetsike ajà tan-tròkin’i Elizabeta tao iny. Tsy ia ajà io fa Jaona. Fe ino va raha ataon’i Jesosy noho Jaona amy sary eto io?

Jesosy natao batisa

Vo baka nandetike an’i Jesosy tamy Ranon’i Jordana tao Jaona. Ho’zay ty fomba fanaòva batisa olo raike. Alentike anaty rano ao tseky ie bakeo ampiakary ndraike. Zay ty asa nataon’i Jaona, ka nokaìhi’ty olo hoe Jaona Mpanao Batisa ie. Fe nanino moa Jesosy ro nataon’i Jaona batisa io?

Nanao raha zay Jaona, satria nangatake tamine Jesosy mba hataone batisa. Nataon’i Jaona batisa iaby ze olo naneny tami’ty raha raty nataone taloha. Fe, fa nanao raha raty va Jesosy, ka tokone haneny tamy raha raty nataone? Aha. Mbo tsy nanao raha raty Jesosy, satria Ana-Ndranahare baka an-danitse ane ie. Misy dikane hafa kanao Jesosy nangatake an’i Jaona mba hanao batisa aze. Ndao ho henteantsika ty mikasike raha zay.

Mpandrafitse ty asan’i Jesosy taloha’ty namonjeane an’i Jaona. Olo mpanamboatse raha sankarazane vita amy hazo mpandrafitse zao, ohatse: latàbo, sezy noho sezy lava. Mpandrafitse kea Josefa valin’i Maria iny, ka nampianarine Jesosy mba hahay asane io. Fe tsy nanirake ty Anane mba ho mpandrafitse an-tany etoy Jehovah. Nisy asa miavake teane hataon’i Jesosy, ka tamy fotoa nanaòva batisa an’i Jesosy io ro tean’i Jehovah hanombòha asa io. Ka le nangatake an’i Jaona ie mba hanao batisa aze. Nasehon’i Jesosy tamy batisane io, fa paré hanao ty sitrapòn’i Jehovah, Babane ie. Faly va Jehovah tamy raha nataon’i Jesosy zay?

Eka, faly bibike ie, satria laha fa niakatse baka anaty rano ao Jesosy, le nisy feo baka an-danitse ane nivòla hoe: ‘Toy ty Anako teako maré.’ Atao ho nisokatse lanitse iny, ka nijòtso tamin’i Jesosy teo voromailala io. Fe tsy voromailala vatane raha io, fa manahake zay avao ty fahità aze. Fanahy masi-Ndranahare raha io, laha ty marina.

Maro ty raha tean’i Jesosy hodinihy, ka nandeha tamy toera mangìky raike zay tany ie, nijàno tany tanaty 40 andro. Niavy tamine teo Satana. Nandraman’i Satana hampanaòvy raha mifanohitse ami’ty lalà-Ndranahare Jesosy. Fa in-telo ro nanaòvane raha zay, fe tsy neken’i Jesosy.

Laha fa vita raha zay, le nandeha nimpòly an-tanà ane ami’zay Jesosy. Nahita lahilahy maromaro ie, ka nokaìhine roze mba ho mpanara-dia aze, na ho mpianatsine. Retoa ty anara’ty sasane amy lahilahy reo: Andrea, Petera (na Simona); Filipo, voho Natanaela (na Bartolomeo). Nandeha ta-Galilia tany niarake tamy mpianatsine vaovao reo Jesosy. Laha fa niavy ta-Galilia tao roze le nijàno tamy tanà nahabe an’i Natanaela, ta-Kana tao. Nandeha namonjy fanambalean’olo tamy tanà io tao Jesosy, ka tao ro nanaòvane fahagagà voalohane. Hainao va hoe ino fahagagà nataone io? Novàne ho divay ty rano.

Matio 3:13-17; 4:1-11; 13:55; Marka 6:3; Jaona 1:29-51; 2:1-12.



Fanontanea

  • Ia lahilahy roe amy sary reo?
  • Manao akore ty fomba fanaòva batisa olo raike?
  • Olo manao akore reny matetike ro nataon’​i Jaona batisa?
  • Ino ty antone manòka nangatahan’​i Jesosy an’​i Jaona mba hanao batisa aze?
  • Nanao akore ty fomba nampisehoa-Ndranahare ty hafaliane, laha fa natao batisa Jesosy?
  • Ino ty raha niseho laha fa nandeha tamy toera mangìky raike zay tany, tanaty 40 andro Jesosy?
  • Ia ty anara’​ty mpanara-dia an’​i Jesosy sasane, na ty mpianatsine voalohane? Ino ty fahagagà nataon’​i Jesosy voalohane?

Fanontanea Fanampine

  • Vakio Matio 3:​13-17.

    Ino ty ohatse namean’​i Jesosy mpianatsine reo? (Sal. 40:​7, 8; Matio 28:​19, 20; Lioka 3:​21, 22)

  • Vakio Matio 4:​1-11.

    Mamporisike antsika mba hazoto hianatse Baiboly ty fahaìzan’​i Jesosy nampiasa Safà-Ndranahare io. Ino ty antone? (Matio 4:​5-7; 2 Pet. 3:​17, 18; 1 Jaona 4:​1)

  • Vakio Jaona 1:​29-51.

    Nampanorihin’​i Jaona an’​ia mpianatsine reny? Ino ty azontsika anahàfa aze henany zao? (Jaona 1:​29, 35, 36; 3:30; Matio 23:​10)

  • Vakio Jaona 2:​1-12.

    Hita tamy fahagagà nataon’​i Jesosy voalohane iny, fa manome ze raha soa ho ahi’​ty mpanompone Jehovah. Hazavao. (Jaona 2:​9, 10; Sal. 84:11; Jak. 1:​17)