Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 86: Lahilahy Notarihi’​ty Kinta Raike

Tantara 86: Lahilahy Notarihi’​ty Kinta Raike
Mpandinike kinta

HITANAO va kinta tondro’ty raike amy lahilahy reo io? Niseho tamy lanitse teny kinta io laha fa niala ta-Jerosalema tao roze. Mpandinike kinta lahilahy reo, baka amy faritse antinàna ane ty misy an-droze. Mino roze, fa hitarike an-droze amin’olo malaza raike kinta io.

Laha fa niavy ta-Jerosalema tao lahilahy reo, le nanontany hoe: ‘Aìa va ajà ho mpanjaka’ty Jiosy zao?’ Anara hafa ikaìha Israelita reo kea “Jiosy” zao. ‘Nihitanay baka antinàna ane ty kintan’ajà io, ka avy zahay henany zao mba hiankohoke amine.’

Laha fa nirén’i Heroda, mpanjaka ta-Jerosalema tao vaovao zay, le navàka biby ie. Tsy teane hisy mpanjaka hafa hangalake ty pilasine. Nokaìhin’i Heroda iaby ty sefo’ty mpisoro, ka nanontaniane hoe: ‘Haterake aìa va mpanjaka nampitamàne zao?’ Namaly mpisoro reo hoe: ‘A-Betlehema ane, hoy ty Baiboly.’

Nokaìhin’i Heroda lahilahy baka antinàna ane reny ka novolànine hoe: ‘Ndahàna ilao ane ty misy anak’ajà zao. Ka laha fa hitanareo ie, le atorò ahy ty misy aze. Ta-hiankohoke amine ane kea aho.’ Fe tsy zay ro tan-dohan’i Heroda tao, fa ty hamono ajà io!

Nandeha mpandinike kinta reny. Nitarike an-droze zisiky a-Betlehema ane kinta iny, ka tamy farane kinta iny le nijàno tanabo trano nisy anak’ajà iny teo. Laha fa nilitse tan-trano tao lahilahy reny, le nahita an’i Maria noho Jesosy. Nanday fanomeza roze, ka nanome raha reo an’i Jesosy. Fe laha fa tafara atoy, le nanarin’i Jehovah tamy nofy lahilahy reo mba tsy himpòly ami’i Heroda ane sasy. Ka nivìo lala hafa roze, laha fa nandeha noly tamy tany misy an-droze ane.

Laha fa nihain’i Heroda fa nandeha noly an-tanin-droze ane lahilahy mpandinike kinta reny, le nimeloke bibike ie. Ka, nanome didy Heroda mba hovonòa ty anak’ajà lahilahy iaby feno roe tao noho mijòtso ta-Betlehema ao. Fa natoron’i ­Jehovah an’i Josefa tamy nofy tao ty raha tean’i Heroda hatao, ka nandeha nilay ta-Ejipta ane ­niarake tami’ty fianakaviane Josefa. Laha fa nihain’i Josefa fa maty Heroda tafara atoy, le ­nandesine nimpòly ta-Nazareta ane ndraike Maria noho Jesosy. Tamy tanà io tao ro nahabe an’i Jesosy.

Hainao va hoe ia ty nampamirapiratse kinta iny io? Tiaròvo soa fa tan-dala ho a-Jerosalema ane lahilahy mpandinike kinta reo vo nahita kinta iny. Tean’i Satana Devoly hovonòa Ana-Ndranahare io, sady haine kea fa ta-hamono an’i Jesosy Heroda. Ka laha fa dinihy, le Satana ro nampamirapiratse kinta io.

Matio 2:1-23; Mika 5:2.



Fanontanea

  • Ia va lahilahy amy sary eo reo? Manino ty raike amin-droze ro manondro kinta mazava io?
  • Ino ty antone nampavàka an’​i Heroda, voho ino ty raha nataone?
  • Notarihy kinta mazava iny taìa lahilahy reo? Fe nanino roze ro nivìo lala hafa laha fa nandeha noly amin-droze ane?
  • Ino ty didy namean’​i Heroda, noho ino ty antone?
  • Ino ty raha nampanaòvin’​i Jehovah an’​i Josefa?
  • Ia ty nampamirapiratse kinta vaovao iny io, voho ino ty antone?

Fanontanea Fanampine

  • Vakio Matio 2:​1-23.

    Firy tao Jesosy tamy mpandinike kinta reo nisafo aze, voho taìa ie ro nipetrake? (Matio 2:​1, 11, 16)