Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 82: Mordekay Noho Estera

Tantara 82: Mordekay Noho Estera

NDAO tsika himpòly tao vitsivitsy manafara, taloha’​ty nandehanan’​i Ezra ta-Jerosalema ane. Mordekay noho Estera ro Israelita farane ze nalaza tamy fanjakàn’​i Persia tao. Estera ro Mpanjakavavy. Anake’​ty rahalahin’​i Mordekay Estera. Fe nana fahefà faharoe nanarakarake ty mpanjaka Mordekay. Ino ty antone? Ndao hianarantsika ty nahavy raha zay.

Nimaty ty rae ami-ndrenin’​i Estera tamin’​ie mbo nikelikele, ka Mordekay ro nikarakara noho nahabe aze. Nana lapa ta-Sosana tao Ahasoerosy, mpanjakan’​i Persia. Vasty ty anara valy mpanjaka io. Niasa tamin-droze tao Mordekay. Fe ndraike andro le tsy nety nanorike ty safàn’​i Ahasoerosy, Vasty. Ka neloke biby mpanjaka iny. Nifìly ampela hafa ho valine ie laha fa bakeo. Hainao va ampela nofilìn’​i Ahasoerosy io? Ampela soa, atao hoe Estera zay ty anarane.

Hamana meloke an’i Mordekay

Hitanao va lahilahy miavonavo iankohofan’​olo amy sary io? Hamana io. Lahilahy nalaza ta-Persia tany ie. Nirìn’​i Hamana hiankohoke tamine teo kea Mordekay, aze lahilahy mipetrake amy sary eo io. Fe tsy nanao raha zay Mordekay. Tsy mety ami’​ty saine ty hiankohoke amin’​olo raty fanahy manahake an’​io. Nampeloke an’​i Hamana maré raha zay. Ka ho’​zao ty raha nataone.

Namòro vandy mikasike Israelita reo tamin’​i Ahasoerosy mpanjaka tany Hamana, ka hoy ty asane: ‘Olo raty fanahy, sady tsy manorike ty lalànao olo reo, ka tokone ho vonòa iaby roze.’ Tsy nihain’​i Ahasoerosy hoe Israelita kea Estera, valine io. Nijànjy ty safàn’​i Hamana ie, ka nanome lalàna, fa hifìly andro raike hamonòa ty Israelita iabiaby.

Laha fa nirén’​i Mordekay lalàna io, le niasa biby ty lohane, ka nandefa hafatse tamin’​i Estera ane ie hoe: ‘Tokone hiresake amy mpanjaka io iha, ka volàno ie mba hanavotse antsika.’ Tsy neké’​ty lalàna ta-Persia tao, ty handehàna amy mpanjaka ane, laha tsy hoe fa nampiavỳ mpanjaka ho amine ane vasa ty olo raike. Fe, nandeha avao Estera ndra tsy nampiavỳ tany aza. Notondrò mpanjaka iny tami’​ty tehine volamena Estera; midika raha zay fa tsy ho vonòa Estera. Ka ndraike andro Estera le nanao fety, ka novolànine mba ho avy amy fety io tao Ahasoerosy noho Hamana. Nanontanian’​i Ahasoerosy Mpanjaka an’​i Estera ze raha tean’​i Estera ho azo baka amy mpanjaka. Namaly Estera, fa hovolànine amy mpanjaka raha teane ho azo zao, laha ohatse ka ho avy amy fety hatao hamarain’​io ndraike ty mpanjaka, noho Hamana.

Laha fa tamy fety io tao, le nivòla tamy mpanjaka iny Estera hoe: ‘Ho vonòa miarake amiko iaby ty Israelita namako.’ Nimeloke bibike, mpanjaka iny, ka hoy ty asane: ‘Ia olo mahasaky manao raha ho’​zao io?’

‘Hamana, lahilahy raty fanahy, aze fahavalontsika tia io!’, hoy Estera.

Mpanjakavavy Estera manisý an’i Hamana

Neloky biby mpanjaka iny, ka nampamonòane Hamana. Tafara raha niseho iaby rezay, le namea mpanjaka iny an’​i Mordekay ty toera faharoe manarake aze tamy fahefane. Laha fa nahazo fahefà io Mordekay, le nanao lalàna vaovao, soa ho afake hiaro Israelita reo mba ho velo ami’​ty andro tokone hamonòa an-droze. Maro ty olo nanampy Israelita reo tsy ho tafìhi’​ty fahavalon-droze, laha fa nana fahefà Mordekay. Avotse tami’​ty fahavalone roze henany zao.

Bokin’​i Estera amy Baiboly ao.



Fanontanea

  • Ia va Mordekay noho Estera io?
  • Ino ty antone nifilianan’​i Ahasoerosy Mpanjaka valy hafa? Ia ty ampela nofilìne?
  • Ia va Hamana zao? Ino ty antone nampeloke aze maré io?
  • Ino ty lalàna natao, voho ino ty raha nataon’​i Estera laha fa niazone hafatse baka amin’​i Mordekay iny?
  • Ino ty raha nahazo an’​i Hamana? Natao akore koa Mordekay?
  • Ino ty fomba natao mba hanavòta Israelita reo tami’​ty fahavalon-droze?

Fanontanea Fanampine

  • Vakio Estera 2:​12-18.

    Tamy fomba manao akore ro nampisehoan’​i Estera fa raha ilà vatane ty mana “toetsy tsy taitaitse noho tsy masiake”? (Est. 2:15; 1 Pet. 3:​1-5)

  • Vakio Estera 4:​1-17.

    Nisy raha nataon’​i Estera mba hampandeha soa ty fivavàha marina. Ino kea ty tokone hataontsika mba hampisehoantsika fa tea noho tsy mivalike amin’​i Jehovah tsika? (Est. 4:​13, 14; Matio 5:​14-16; 24:​14)

  • Vakio Estera 7:​1-6.

    Maro ami’​ty vahoaki-Ndranahare ro nahasaky nanao raha manahake an’​i Estera ndre fa haine aza fa ho halan’​olo noho hampijalìn’​olo ie laha fa manao raha zay. Hazavao. (Est. 7:4; Matio 10:​16-22; 1 Pet. 2:​12)