Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 78: Sora-tana Tamy Rindry

Tantara 78: Sora-tana Tamy Rindry
Tana manoratse amy rindry

INO ty raha miseho eto? Manao fety be ty olo. Nikaike vahiny malaza fa ho an’​arivone ty mpanjakan’​i Babylona hiarake hifalifale amine. Nampiasa kôpy volamena noho kôpy volafoty, voho enta hafa baka amy tempolin’​i Jehovah ta-Jerosalema tao, roze. Fe tampotampoke teo le nisy tanan’​olo, nanoratse tamy rindry teo. Navàka biby ty olo iaby.

Belsazara noho ty vahininy

Belsazara, zafin’​i Nebokadnezara iny, ro mpanjaka tamy fotoa io. Nokaìhine ho avy tamine tao malaky ty lahilahy filàne torohevitse. Hoy ty asan’​i Belsazara hoe: ‘Ze olo mahay mamaky soratse io, ka mivòla amiko ty dikane, le hamea raha maro, sady hatao mpitarike fahatelo amy fanjakà toy.’ Fe, tsy nisy ndre raike tamy lahilahy filà mpanjaka torohevitse reo, ro afake namaky noho nivòla tamine ty dika soratse io.

Laha fa naharé tabataba io ty reny mpanjaka io, le nandeha tamy trano fihinàna tao. ‘Ka mavàka maré nareo’, hoy ty asane tamy mpanjaka. ‘Misy lahilahy raike zay amy fanjakanao atoa, mahay ty mikasike andranahare masy reny. Tamin’​i Nebokadnezara razanao mbo ni-mpanjaka, le nataone sefo’​ty lahilahy filàne torohevitse lahilahy io. Daniela ty anarane. Mba kaìho moa ie, fa hovolànine aminao ty dika soratse iaby reo.’

Tsy ela, le nandesy tamy mpanjaka teo Daniela. Tsy naneky hamea fanomeza Daniela. Nohazavàne laha fa bakeo ty antone nanalàn’​i Jehovah an’​i Nebokadnezara razan’​i Belsazara tsy ho mpanjaka sasy. Hoy ty asan’​i Daniela hoe: ‘Niavonavo maré Nebokadnezara, ka le nosazìn’​i Jehovah.’

‘Fa hainao iaby ty raha nahazo an’​i Nebokadnezara, fe mbo niavonavo manahake aze avao iha. Nalànao tamy tempolin’​i Jehovah tao iaby kôpy miarake amy enta maro hafa tao reny, ka nampiasànao. Bakeo mbo nivavake tami-ndranahare namboary tamy hazo noho vato iha, fa tsy nanompo aze Mpamoro antsika iny. Ka raha iaby rezao ty antone nandefasa-Ndranahare tana io, hanoratse amy rindry eo.’

‘Ho’​zao ty voasoratse eo’, hoy Daniela: ‘MENE, MENE, TEKELA, OPARESINA.’

‘MENE, io midika fa, fa nisàhi-Ndranahare ty andro hanjakanao, ka fa notampérine andro io. Ty TEKELA, le midika hoe, fa nolanjà-Ndranahare tamy balansy iha, ka nihitane fa maìva. OPARESINA io kea midika fa hamea ty Mediana noho Persiana, ty fanjakànao.’

Laha mbo nivòla Daniela, le niavy hanafike an’​i Babylona ty Mediana noho Persiana. Niazon-droze Babylona ka, novonòne Belsazara. Tanterake tamy haly io avao sora-tana tamy rindry teo iny! Fe ino ty raha hiseho amin’​Israelita reo? Ho hitantsika laha fa afarafara ao ty mikasike raha zay, fa ndao ho henteantsika tseky ty raha niseho tamin’​i Daniela.

Daniela 5:1-3​1.



Fanontanea

  • Ino ty raha niseho tamy fotoa nanaovan’​i mpanjakan’​i Babylona fety be ka nampiasàne kôpy noho enta hafa baka amy tempolin’​i Jehovah ta-Jerosalema tao?
  • Ino ty raha novolànin’​i Belsazara tamy lahilahy filàne torohevitse reo, fe tsy afake nanao ino roze?
  • Ino ty raha nampanaòvy reny mpanjaka io aze?
  • Ino ty antone nandefasa-Ndranahare tana io hanoratse amy rindry eo, arake ty fanazavà namean’​i Daniela mpanjaka iny?
  • Nanao akore ty fomba nanazavan’​i Daniela ty dika soratse tamy rindry teo iny?
  • Ino ty raha niseho laha mbo nivòla avao Daniela?

Fanontanea Fanampine

  • Vakio Daniela 5:1-3​1.

    Ino ty tsy mampitovy ty tahotse an’​Andranahare noho ty tahotsin’​i Belsazara, laha fa nahita soratse tamy rindry teo iny ie? (Dan. 5:​6, 7; Sal. 19:​9; Rom. 8:​35-39)

    Nampiseho herim-po Daniela laha fa niresake tamin’​i Belsazara noho olo mpanome torohevitse aze reny. Hazavao. (Dan. 5:​17, 18, 22, 26-28; Asa. 4:​29)

    Resahy mazava soa amy Daniela toko faha-5 ao, fa Jehovah raike avao ro mana fahefà hanapake ty raha iaby. Hazavao. (Dan. 4:​17, 25; 5:​21)