Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 77: Tsy Nety Nandohalike Roze

Tantara 77: Tsy Nety Nandohalike Roze

TIARONAO va ty mikasike ajà lahilahy telo reo? Eka, reo naman’​i Daniela telo lahy reny. Roze aze tsy nety nihina hany soa baka amy mpanjaka iny. Sadraka, Mesaka, noho Abednego, ro nikaìha’​ty Babyloniana an-droze. Fe henteo roze henany io. Manino va roze tsy mety mandohalike amy sary bevata io, manahake olo sasane reo? Ndao ho henteantsika.

Tiaronao va lalàna nosoratan’​i Jehovah ka nokaìhy hoe Didy Folo iny? Ty voalohane amy lalàna io ao, le hoe: ‘Ka mivavake ami-ndranahare hafa laha tsy amiko avao.’ Nanorike lalàna io ajà lahilahy amy sary eto reto, ndra sarotse tamin-droze aza ty nanao raha zay.

Navorin’​i Nebokadnezara, mpanjakan’​i Babylona iaby ty olo malaza, soa hanome voninahitse sary namboarine io. Ka, laha fa vory teo iaby ty olo, le hoy ty asan’​i Nebokadnezara hoe: ‘Laha fa renareo ty feo’​ty anjomara, noho harpa voho ty karaza-moziky hafa, le tokone handohalike nareo ka hivavake amy sary volamena io. Ka ze olo tsy mety mandohalike noho tsy mivavake eo, le avy le hatorake amy lafôro misy afo mirehitse io ao.’

Laha fa nirén’​i Nebokadnezara fa tsy nety nandohalike Sadraka, Mesaka noho Abednego, le neloke biby ie. Nandesy tamine teo roze. Nataon’​i Nebokadnezara forosé mba handohalike ndraike roze. Fe niantehitse tamin’​i Jehovah lahilahy reo ka hoy ty asan-droze tamin’​i Nebokadnezara: ‘Afake manavotse anay Andranahare aze tompònay iny. Ka ndra tsy avòtane aza zahay, le tsy handohalike amy sary volamenanao io.’

Sadraka, Mesaka, noho Abednego

Laha fa naharé safà reo Nebokadnezara, le neloke maré. Nisy lafôro zay marìny teo. Ka hoy ty asane tami’​ty mpanompone hoe: ‘Afanào impito mihoatse ty hafanàne taloha lafôro io!’ Bakeo novolànine ze lahilahy matanjake tami’​ty miaramilane mba hamehy an’​i Sadraka, Mesaka, noho Abednego, ka hanorake an-droze anaty lafôro ao. Nafana biby lafôro iny, ka nimay lelan’​afo iny lahilahy matanjake reny, ka le nimaty iaby. Fe nanao akore ajà lahilahy telo natorake tao reny?

Namonjy marinike lafôro iny teo Nebokadnezara, ka nanomboke natahotse ie. Nanontany ie hoe: ‘Tsy telo va lahilahy nafehy ka natorantsika tanaty lafôro toy ato?’

‘Eka’, hoy ty asa mpanompone reny namaly aze.

‘Fe mahita lahilahy efatse mandehandeha anaty afo io ao aho’, hoy Nebokadnezara. ‘Tsy mifehy roze, sady tsy mandoro an-droze iaby afo io. Bakeo aze fahaefatse miarake amin-droze ao io, le atao ho andranahare.’ Namonjy marinike varavara lafôro iny ty mpanjaka, ka nikaikaike hoe: ‘Sadraka! Mesaka! Abednego! Mpanompo-Ndranahare Farane Anabo, miboàha bakao nareo!’

Nihitan’​olo iaby fa tsy nanino mihitsy roze telo lahy, laha fa niboake bakao. Hoy ty asan’​i Nebokadnezara mpanjaka: ‘Hankalazà ty Andranaharen’​i Sadraka, Mesaka, noho Abednego! Nandefa ty anjeline Andranahare, ka nanavotse ty mpanompone, satria tsy nety nandohalike tami-ndranahare hafa roze laha tsy tamine raike avao.’

Ohatse soa ho antsika tantara io, ka tokone hatoky an’​i Jehovah avao tsika.

Eksodosy 20:​3; Daniela 3:​1-30.



Fanontanea

  • Ino ty didy naboakin’​i Nebokadnezara, mpanjakan’​i Babylona?
  • Nanino naman’​i Daniela telo lahy reo ro tsy nety nandohalike?
  • Mbo nataon’​i Nebokadnezara forosé mba handohalike ndraike Hebreo telo lahy reo, fe tamy fomba manao akore ro nampisehoan-droze fa natoky an’​i Jehovah roze?
  • Novolànin’​i Nebokadnezara mba hanao ino an’​i Sadraka, Mesaka, noho Abednego mpanompone reny?
  • Ino ty raha nihitan’​i Nebokadnezara laha fa nanenty tanaty lafôro iny tao ie?
  • Ino ty antone nankalazàn’​i Nebokadnezara ty Andranaharin’​i Sadraka, Mesaka, voho Abednego? Ino koa ty fianara azontsika tami’​ty raha nataon-droze?

Fanontanea Fanampine

  • Vakio Daniela 3:​1-30.

    Ino iaby ty fihetsike soa natao Hebreo telo lahy reny, ka tokone hotahafi’​ty mpanompo-Ndranahare laha fa tsapà ty tsy fivalihan-droze amin’​i Jehovah? (Dan. 3:​17, 18; Matio 10:28; Rom. 14:​7, 8)

    Ino ty fianara bevata namean’​i Jehovah Andranahare an’​i Nebokadnezara? (Dan. 3:​28, 29; 4:​34, 35)