Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 70: Jona Noho Fia Bevata Bibike Zay

Tantara 70: Jona Noho Fia Bevata Bibike Zay

MBA henteo moa lahilahy anaty rano ao io. Sahìra biby ie eo io, sa tsy zay? Hately fia io ie! Hainao va hoe, ia lahilahy io? Jona ty anarane. Ino va ty antone mahasahìra aze manahake an’​io? Ndao ho henteantsika ty antone.

Mpaminanin’​i Jehovah Jona. Laha vo nimaty Elisa mpaminany, le nivòla tamin’​i Jona Jehovah hoe: ‘Ndahàna mandeha a-Ninive ane iha. Volàno olo mipetrake ao reo fa maro maré ty fomba raty ataon-droze ao.’

Jona noho fia bevata bibike

Fe tsy nety nandeha ta-Ninive tany Jona, ka niondra laka ie, handeha an-tany hafa ane. Neloke biby Jehovah laha fa nahita an’​i Jona nilay. Nandefa tsioke mahery Jehovah. Nitsioke maré andro iny, ka ho nilentike laka iny. Navàka bibike mpanday laka reny, ka nikaike ty andranaharine, soa hanavotse an-droze.

Tamy farane, le hoy ty asan’​i Jona tamin-droze: ‘Mivavake amin’​i Jehovah aho, aze Andranahare nanamboatse ty lanitse noho ty tany iny. Nandà raha nampanaòvine ahy zay aho, ka nilay.’ Hoy ty asa mpanday laka reny: ‘Ka ino lahy ty raha tokone hataonay aminao, soa hampijàno tsioke io?’

Namaly Jona hoe: ‘Atoràhonareo anaty riake ao aho, soa tsy hihetsike sasy rano io.’ Tsy ta-hanao raha zay mpanday laka reny, fe laha fa nihananjeky ty fahery tsioke iny, le natoran-droze tanaty rano ane avao Jona. Avy le nijàno tsioke iny, sady tsy nihetsike sasy ty riake.

Nately fia bevata biby io Jona laha fa nilentike tanaty riake tao. Fe tsy nimaty ie. Tan-tròky fia be io tao avao ie, tanaty telo andro noho telo halike. Naneny bibike Jona tamy tsy nanorìhane ty safàn’​i Jehovah noho ty tsy nandehànane ta-Ninive tany. Hainao va hoe ino ty raha nataone?

Nivavake tamin’​i Jehovah, Jona soa hampiane. Nataon’​i Jehovah ze handoava fia iny an’​i Jona tan-tety eny. Laha fa bakeo, le nandeha ta-Ninive tany ami’​zay Jona. Hitantsika amy tantaran’​i Jona io, fa tokone hataontsika iaby ze raha ampanaòvin’​i Jehovah antsika.

Bokin’​i Jona amy Baiboly ao.



Fanontanea

  • Ia va Jona zao? Ino ty raha nampanaòvin’​i Jehovah aze?
  • Ino ty raha nataon’​i Jona laha fa tsy nandeha tamy tany nampandehanan’​i Jehovah aze ane ie?
  • Ino ty raha nampanaòvin’​i Jona mpanday sambo reo mba hampijanòna tsioke iny?
  • Arake ty hitanao amy sary eo, ino ty raha niseho laha fa nalatsake tanaty rano tao Jona?
  • Firy andro ty nijanònan’​i Jona tanaty fia bevata biby iny tao, voho ino ty raha nataone tao?
  • Nandeha nanaìa Jona laha fa tafaboake baka anaty fia bevata biby iny tao? Ino koa ty fianara azontsika baka amy raha zay?

Fanontanea Fanampine

  • Vakio Jona 1:1​-17.

    Nanao akore ty fihetsikin’​i Jona laha fa nirahy ho a-Ninive ane ie? (Jona 1:​2, 3; Ohab. 3:​7; Mpit. 8:​12)

  • Vakio Jona 2:​1, 2, 10.

    Laha mieritseritse ty raha niseho tamy fiaìnan’​i Jona tsika, le afake matoky koa fa hamaly ty vavake ataontsika Jehovah. Ino ty antone? (Sal. 22:24; 34:​6; 1 Jaona 5:​14)

  • Vakio Jona 3:​1-10.

    Mbo nampiasa an’​i Jona avao Jehovah ndra tsy nety nirahine aza ie tamy voalohane. Manino ty fahaìza raha zay ro manatanjake antsika? (Sal. 103:14; 1 Pet. 5:​10)

    Tsy tokone hitsaratsara fahatane ty olo amy faritanintsika ao tsika, laha tantara mikasike an’​i Jona noho Ninivita reo ro hentea. Fa ino ty antone? (Jona 3:​6-9; Mpit. 11:​6; Asa. 13:​48)