Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 66: Jezebela, Mpanjakavavy Raty Fanahy

Tantara 66: Jezebela, Mpanjakavavy Raty Fanahy

LAHA fa nimaty Jeroboama Mpanjaka, le niraty fanahy iaby ze mpanjaka’​ty fokon’​Israely folo nandimby aze, tavaratse tany. Ahaba Mpanjaka ro niraty fanahy maré tamin-droze iaby reo. Hainao va hoe ino ty antone? Raty fanahy biby Jezebela Mpanjakavavy valine.

Tsy Israelita Jezebela. Anak’​ampela’​ty mpanjakan’​i Sidona ie. Nivavake tami-ndranahare diso atao hoe Bala zay ie, ka nitao an’​i Ahaba noho ty Israelita maro, mba hanompo an’​i Bala koa. Tsy tea an’​i Jehovah, Jezebela, sady maro kea ty mpaminani-Ndranahare fa novonòne. Ty sasane tamy mpaminany reo, nivòny tanaty lava-bato ane soa tsy ho maty. Laha fa misy raha ilàn’​i Jezebela, le sakine ty mamono olo laha zay ro haine fa hahazòa raha ilàne io.

Nalahelo bibike Ahaba ndraike andro. Nanontany aze Jezebela hoe: ‘Ino va raha mampalahelo anao io?’ ‘Raha novolànin’​i Nabota tamiko zay mahakamo ahy io’, hoy ty asan’​i Ahaba. ‘Ta-hikalo tanim-boalobokine io aho, fe tsy haviline amiko zao raha io.’

Raha novolànin’​i Nabota tamiko zay mahakamo ahy io’, hoy ty asan’​i Ahaba. ‘Ta-hikalo tanim-boalobokine io aho, fe tsy haviline amiko zao raha io.’

‘Ka taitse iha, fa hataoko ze hahazoanao raha io’, hoy ty asan’​i Jezebela.

Nanoratse taratasy tamy sefo maromaro tamy tanà nisy an’​i Nabota tany Jezebela. Novolànine roze hoe: ‘Milà olo raty fanahy nareo, hitantara amin’​olo fa nitìmbo an’​Andranahare noho ty mpanjaka Nabota. Bakeo andeso miboake lavitse tanà io ie, ka toràho vato soa ho maty.’

Laha vo nirén’​i Jezebela fa nimaty Nabota, le hoy ty asane tamin’​i Ahaba: ‘Ndahàna ami’​zay alao tanim-boaloboke io.’ Tsy tokone hamea sazy va Jezebela tamy raha farane ze raty nataone io?

Jezebela Mpanjakavavy

Ka laha fa tafarafara atoy, le nanirake lahilahy atao hoe Jeho zay, Jehovah, mba hanasazy an’​i Jezebela. Laha fa nirén’​i Jezebela fa niavy Jeho, le nilokoane ty masone ka nataone ze haha ampela soa aze. Fe, laha fa niavy Jeho le nahita an’​i Jezebela tan-dafonety teny ie, nikaike lahilahy tamy trano-mpanjaka tao ie, ka hoy ty asane tamin-droze: ‘Atoseho maré ambany atoy ie!’ Natosy lahilahy reny Jezebela, ka maty, arake ty hitanao amy sary io eo. Zay ty niafaràn’​i Jezebela, Mpanjakavavy raty fanahy iny.

1 Mpanjaka 16:​29-33; 18:​1-4; 21:​1-16; 2 Mpanjaka 9:​30-37.



Fanontanea

  • Ia moa Jezebela io?
  • Ino ty antone nampalahelo an’​i Ahaba Mpanjaka, ndraike andro?
  • Ino ty raha nataon’​i Jezebela mba hahazoane tanim-boalobokin’​i Nabota iny, ho an’​i Ahaba valine?
  • Ia ty nirahin’​i Jehovah mba hanasazy an’​i Jezebela?
  • Arake ty hita amy sary io, ino ty raha niseho, laha fa niavy tamy lapan’​i Jezebela teo Jeho?

Fanontanea Fanampine

  • Vakio 1 Mpanjaka 16:​29-33 noho 18:​3, 4.

    Nanao akore ty haraty toe-piaìna tamin’​Israely teo tamy andron’​i Ahaba Mpanjaka? (1 Mpanj. 14:​9)

  • Vakio 1 Mpanjaka 21:​1-16.

    Manao akore ty fomba nampisehoan’​i Nabota herim-po noho tsy fivaliha tamin’​i Jehovah? (1 Mpanj. 21:​1-3; Lev. 25:​23-28)

    Ino ty raha nataon’​i Ahaba laha fa tsy arake ty nieritseretane aze ty raha niseho? Ino koa ty fianara azontsika ami’​zay? (1 Mpanj. 21:​4; Rom. 5:​3-5)

  • Vakio 2 Mpanjaka 9:​30-37.

    Nazoto nanatanterake ty sitrapòn’​i Jehovah Jeho. Ino ty fianara azontsika ami’​zay? (2 Mpanj. 9:​4-10; 2 Kor. 9:​1, 2; 2 Tim. 4:​2)