Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 63: Solomona Mpanjaka Hendry

Tantara 63: Solomona Mpanjaka Hendry

MBO pamaraky maré Solomona tamy fotoa nanaòva aze ho mpanjaka. Tea an’​i Jehovah ie, sady nanorike ty torohevitse namean’​i Davida, babane aze. Nitea an’​i Solomona koa Jehovah, ka hoy ty asane tamine ndraike haly zay, tamy nofy hoe: ‘Ino ty raha teanao hameako anao Solomona?

Namaly Solomona hoe: ‘Jehovah Andranahariko, mbo ajà maré aho, ka tsy mahay manday vahoakinao reto. Ka, mba omeo fahendrea lahy aho, soa hahaìzako mitarike an-droze, amy lala mahity.’

Nahafaly an’​i Jehovah raha nangatahin’​i Solomona zay. Hoy ty asane: ‘Tsy hanàna na havelòma maharitse ro nangatahinao amiko, fa fahendrea, le hameako anao raha zay. Ka tsy hisy mihitsy olo hana fahendrea manahake ty anao. Fe ndre tsy nangatake hanàna noho voninahitse tamiko aza iha, le hameako anao avao raha reo.’

Tsy ela tafara raha zay, le niavy tamin’​i Solomona teo ty ampela roe nana fahasahiràna bevata. Hoy ty raike tamin’​ampela reo: ‘Miarake mipetrake amy trano raike zahay amin’​ampela tia. Niterake anake lahy aho. Roe andro tafara atoy, le niterake anake lahy kea ie. Ndraike haly, le nimaty ty anane. Ka laha fa hitane aho fa niroro, le napetrane tanilako teo anane maty iny, bakeo nalàne ho azy ty ahy. Laha fa nifoha aho, le nanenty ajà maty iny, ka nihaiko fa tsy anako iny io.’

Nivòla kea ampela raike iny hoe: ‘Aha! Anahy ajà velo io, fa aze maty io ty anao.’ Namaly kea ampela raike iny hoe: ‘Aha! Aze maty iny ty anao, fa anako aze mbo velo io.’ Zay avao ty safà nampolimpolin-droze roe teo. Ino ty raha hataon’​i Solomona?

Nampangalake sabatsy Solomona, ka hoy ty asane hoe: ‘Zarao roe ajà io, ka samby ameo tampane iaby ampela roe reo.’

‘Aha!’ hoy ty asan’​ampela, renin’​ajà iny, nikiakiake. ‘Ka vonòa lahy ajà io azafady, fa ameo aze avao tsy manahy!’ Fe tsy nety ampela raike iny fa hoy ty asane hoe: ‘Ka amea ty raike aminay zao ajà io, fa tampàho roe, soa samby hana.’

Solomona Mpanjaka nandamy fahasahiràna bevata

Tamy farane le hoy ty asan’​i Solomona: ‘Ka vonòa ajà io! Fa ameo ampela voalohane io. Ie ro reny niterake aze.’ Hain’​i Solomona raha zay, satria tea ajà io maré renine io. Tsy nahoane ino ndre namea ampela raike iny ajà io, satria tsy nirìne ty hahafaty aze. Laha fa naharé ty fomba nandaminan’​i Solomona aly anake io ty vahoake, le faly biby nana mpanjaka hendry manahake an’​i Solomona.

Nitahy ty vahoakine Andranahare tanaty fotoa nanjakan’​i Solomona. Nataone nahavokatse varimbazaha, vary hordea, voaloboke, aviavy noho karazan-kany maro ty tany. Nipetrake tamy trano soa no sady nisìky soa iaby ty olo. Samby nana raha soa maro mihoatse ty tokone hanànane ty olo kiraidraike.

1 Mpanjaka 3:​3-28; 5:​9-14.



Fanontanea

  • Ino ty fanontanea napetran’​i Jehovah tamin’​i Solomona?
  • Satria tean’​i Jehovah ty raha nangatahan’​i Solomona tamine, ino koa ty raha hafa nampitamànin’​i Jehovah fa hameane an’​i Solomona?
  • Ino ty raha nanahìra nandesin’​ampela roe reo tamin’​i Solomona teo io?
  • Nanao akore ty fomba nandaminan’​i Solomona fahasahiràna io, arake ty hita amy sary eo?
  • Nanao akore ty fiaìna tamy andro naha-mpanjaka an’​i Solomona? Ino ty antone?

Fanontanea Fanampine

  • Vakio 1 Mpanjaka 3:​3-28.

    Ino ty fianara tokone hotahàfi’​ty rahalahy manan’​asa atao amy fiangona ao, laha ty safà marina nataon’​i Solomona amy 1 Mpanjaka 3:​7 ao ro hentea? (Sal. 119:105; Ohab. 3:​5, 6)

    Ino iaby ty raha azo angatàha amy vavake matetike, arake ty nataon’​i Solomona? (1 Mpanj. 3:​9, 11; Ohab. 30:​8, 9; 1 Jaona 5:​14)

    Nahay nandamy ty fahasahiràna nisy tamin’​ampela roe reny Solomona. Ino kea ty raha atokisantsika fa hataon’​i Jesosy Kristy, aze Solomona Be iny laha fa ie ro mitarike antsika? (1 Mpanj. 3:28; Isaia 9:6, 7; 11:​2-4)

  • Vakio 1 Mpanjaka 4:2​9-34.

    Ino ty raha namean’​i Jehovah an’​i Solomona, laha fa nangatake fo soa tamin’​i Jehovah ie? (1 Mpanj. 5:​9)

    Nisy olo niezake mba hanarake ty fahendrean’​i Solomona. Manao akore kea ty tokone hiheverantsika ty fianara ty Safà-Ndranahare? (1 Mpanj. 5:​9, 14; Jaona 17:​3; 2 Tim. 3:​16)