Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 61: Natao Mpanjaka Davida

Tantara 61: Natao Mpanjaka Davida

NANANDRA nisambotse an’​i Davida ndraike Saoly. Nifìly miaramila 3 000 matanjake soa tamy miaramilane ie mba hila an’​i Davida. Laha fa nihain’​i Davida raha zay, le nandefa mpitsikilo ie, mba hanenty ty toera hiroroan’​i Saoly noho ty miaramilane, laha fa haly. Bakeo nanontany ty roe tamy namane Davida hoe: ‘Ia ze ta hiarake amiko amy tany misy an’​i Saoly ane?’

Davida mikaike an’i Saoly Mpanjaka

Zaho’, hoy ty asan’​i Abisay. Anak’​anabavin’​i Davida atao hoe Zeroia zay, Abisay io. Laha fa niroro soa Saoly noho ty namane, le nitingatinga ho amy toeran-droze teo Davida noho Abisay. Nalàn-droze lefon’​i Saoly noho raha fasiane rano nipetrake tanila lohan’​i Saoly teo iny. Tsy nisy nahita na naharé roze, satria niroro biby olo reny.

Henteo Davida noho Abisay henany zao. Fa lavitse roze ka tsy natahotse sasy laha fa niavy tamy vohitse kelikele zay teo. Nokaìhin’​i Davida maré filoha tafik’​Israely iny: ‘Abnera a! Nanino tsy narovanao mpanjaka filohanao io? Henteo soa fa tsy eo ty lefone noho raha fasiane rano iny! Nanaìa?’

Taitse Saoly. Haine soa ty feon’​i Davida, ka nanontany ie hoe: ‘Tsy iha va io Davida?’ Hitanao va Saoly noho Abnera amy sary ambany eto io?

Eka, mpanjaka’, hoy ty asan’​i Davida tamin’​i Saoly. Bakeo nanontany Davida hoe: ‘Ino va ty antone anambòranao ahy io? Ino ty raha raty nataoko? Toy lahy lefonao iny, mpanjaka. Ampandehàno bakao ty raike amy mpanomponao reo hangalake aze.’

Saoly Mpanjaka noho Abnera

‘Diso aho’, hoy Saoly. ‘Tsy nieritseritse aho, fa nanaon-tao avao.’ Nandeha Davida laha fa bakeo, fa Saoly nimpòly tan-tranone tany. Fe nivòla raike Davida hoe: ‘Mbo ho vonòn’​i Saoly avao aho ndraike andro ane. Tokone hilay amy tany Filistina ane aho.’ Ka le zay vatane ty raha nataone. Afake namitake ty Filistina Davida ka nanao ze hinoan-droze fa mbo naman-droze ie.

Tafarafara raha niseho rezay, le niakatse ty Filistina mba hialy amin’​Israelita reo. Samby nimaty tamy aly io tao iaby Saoly noho Jonatana. Nalahelo biby Davida, ka nanoratse hira manao hoe: ‘Malahelo anao lahy aho Jonatana rahalahiko. Nahafaly ahy biby ty finamantsika!’

Tafara atoy, le nimpòly ta-Israely tamy tany Hebrona tao Davida. Nisy aly ty tao, satria nisy vahoake nifìly an’​i Isboseta, anake lahin’​i Saoly ho mpanjaka. Ty hafa kea nifìly an’​i Davida ho mpanjaka. Fe naharesy aze nifìly an’​i Davida reny tamy farane. Vo 30 tao Davida tamy ie natao mpanjaka io. Nanjaka ta-Hebrona tao tanaty fito tao noho tampane ie. Nanan’​anake telo lahy ie tao: Amnona, Absaloma, noho Adonia.

Avy henany zao, ty fotoa hangalàn’​i Davida noho ty mpanompone tanà soasoa atao hoe Jerosalema zay. Joaba, anake lahin’​i Zeroia, anabavin’​i Davida ro nitarike fanafìha io. Namaly ty raha soa nataon’​i Joaba Davida, ka nataone filoha’​ty tafik’​Israely Joaba. Hanomboke hanjaka a-Jerosalema ao Davida henany zao.

1 Samoela 26:​1-25; 27:​1-7; 31:​1-6; 2 Samoela 1:26; 3:​1-21; 5:​1-10; 1 Tantara 11:​1-9.



Fanontanea

  • Ino ty raha nataon’​i Davida noho Abisay, laha mbo niroro soa tamy toera nisy aze teo Saoly?
  • Ino ty fanontanea napetran’​i Davida tamin’​i Saoly?
  • Nandeha taìa Davida, laha fa nilay an’​i Saoly?
  • Ino ty raha nampalahelo maré an’​i Davida, ka nanoratane hira soasoa bibike io?
  • Firy tao Davida tamin’​ie natao mpanjakan’​i Hebrona? Volàno iaby ty anara anake lahine sasane ze hainao.
  • Taìa ro nanjakan’​i Davida, laha fa tafara atoy?

Fanontanea Fanampine

  • Vakio 1 Samoela 26:​1-25.

    Arake ty hita amy 1 Samoela 26:​11, nanao akore ty fiheveran’​i Davida, ty fahefà napetran’​i Jehovah? (Sal. 37:​7; Rom. 13:​2)

    Manampy antsika hanahake ty toe-tsain’​i Jehovah ty safàn’​i Davida amy 1 Samoela 26:23 ao. Amy fomba manao akore ro anatanterahantsika raha zay, laha fa misy olo tsy tea ty raha ataontsika, ndre fa miezake ho soa fanahy noho ho tea aze aza tsika? (1 Mpanj. 8:32; Sal. 18:​20)

  • Vakio 2 Samoela 1:​26.

    Ino ty hanampy ty Kristiana amy fotoa henany zao ‘hifankatea biby’ manahake an’​i Davida noho Jonatana? (1 Pet. 4:​8; Kol. 3:14; 1 Jaona 4:​12)

  • Vakio 2 Samoela 5:​1-10.

    Firy tao ro naha-mpanjaka an’​i Davida. Nanao akore ty fizarazaràne? (2 Sam. 5:​4, 5)

    Ia ty nanome an’​i Davida toerany anabo io? Ino ty raha tiarontsika amy raha zay? (2 Sam. 5:10; 1 Sam. 16:13; 1 Kor. 1:31; Fil. 4:​13)