Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 76: Noravà Jerosalema

Tantara 76: Noravà Jerosalema

FA HO folo tao mahery henany zao ty nandaìsan’​i Nebokadnezara ty Israelita mahay raha ho a-Babylona ane. Henteo ty raha miseho henany zao! Noròa Jerosalema, ka ze Israelita tsy nimaty tao, le handesy ho andevo a-Babylona ane iaby.

Tiaròvo fa nivòla mpaminani-Ndranahare reny hoe, hisy loza hoavy a-Jerosalema ao, laha tsy miala amy fomban-droze raty Israelita reo. Fe tsy nijànjy mpaminani-Ndranahare reny ty Israelita, fa nivavake tami-ndranahare diso, ka tsy nanompo an’​i Jehovah sasy. Maeva an-droze soa laha sazỳ roze henany zao. Fa notantarà mpaminany Ezekiela tamintsika iaby ty raha raty maro fa nataon’​Israelita reo, ka zay ro ahaìzantsika raha iaby rezao.

Hainao va hoe ia Ezekiela zao? Raike tamin’​ajà lahilahy nandesin’​i Nebokadnezara Mpanjaka, ta-Babylona tany ie folo tao mahery taloha’​ty nandravà an’​i Jerosalema. Manahake zay kea Daniela noho ty namane telo lahy, Sadraka, Mesaka voho Abednego samby nandesy ta-Babylona tany iaby roze tamy fotoa io.

Laha mbo ta-Babylona tany Ezekiela, le natoron’​i Jehovah aze ty raha raty niseho tamy tempoly, ta-Jerosalema tao. Tamy fahagagà ro nanaòvan’​i Jehovah raha zay. Mbo ta-Babylona tany Ezekiela tamy fotoa io, fe nataon’​i Jehovah ze hahitàne ty raha iaby niseho tamy tempoly tao. Nahakamo bibike ty raha nihitan’​i Ezekiela!

‘Mba henteo moa raha mampangaroharo ataon’​olo amy tempoly eto io’, hoy ty asan’​i Jehovah tamin’​i Ezekiela. ‘Henteo rindry reo fa feno sary bibilava, noho sarim-biby hafa. Mba henteo kea, fa manompo raha reo ty Israelita!’ Afake nahita raha reo Ezekiela, ka nosoratane iaby ze raha niseho tao.

Andevo miala baka Jerosalema ao

Nanontany an’​i Ezekiela Jehovah hoe: ‘Hitanao va raha atao’​ty lahilahy mpitarike Israelita, mivòny ambalike ao reo?’ Nihitan’​i Ezekiela kea raha zay. Nisy lahilahy 70 nivavake tami-ndranahare diso ty tao. Hoy ty asan-droze hoe: ‘Tsy mahita antsika Jehovah, fa niala tamy tanintsika toy.’

Natoron’​i Jehovah an’​i Ezekiela kea laha fa bakeo, ty ampela sasane tam-bavahady avaratse tamy tempoly teo. Nipetrake teo roze, sady nivavake tami-ndranahare diso atao hoe Tamoza zay. Henteo kea lahilahy amy filìra amy tempoly eo reo! Nisy 25 teo ho eo roze. Hitan’​i Ezekiela roze mandohalike man’​antinàna ane sady mivavake amy masoandro!  

‘Tsy manaja ahy sasy olo reo’, hoy Jehovah. ‘Tsy hoe manao raha raty avao roze, fa amy tempoliko ao mihitsy ro anaòvan-droze raha raty reo!’ Nampitamà Jehovah laha fa bakeo hoe: ‘Ho hitan-droze soa androany hoe manao akore aho toy laha fa meloke. Sady tsy hoferinesako mihitsy roze laha fa ho rava tanà toy.’

Telo tao, tafara’​ty nampisehoan’​i Jehovah raha reo an’​i Ezekiela, vo nanohitse an’​i Nebokadnezara Israelita reo, ka nialy tamin-droze Nebokadnezara. Afake tao raike noho tampane, le noravà’​ty Babyloniana ty rindrin’​i Jerosalema sady noròan-droze iaby tanà io. Maro biby ty olo nimaty, voho ty hafa nandesy ho andevo ta-Babylona tany.

Nanino ro nengàn’​i Jehovah horavà manahake zay tanàn’​Israelita reo? Satria, tsy nijànjy an’​i Jehovah roze, no sady tsy nanorike ty safàne kea. Hitantsika baka amy tantara io fa ilà ty manorike ty raha volàni-Ndranahare.

Nisy olo vitsivitsy nengà hijàno tamy tanin’​Israely tao, tamy voalohane. Nisy Jiosy raike atao hoe Gedalia zay, nataon’​i Nebokadnezara ho mpitarike olo reo tao. Fe nisy Israelita sasane namono an’​i Gedalia. Navàka ty Israelita tsy no ho avy ao ty Babyloniana handripake an-droze. Ka nataon-droze forosé Jeremia soa hilay miarake amin-droze ho a-Ejipta ane.

Nanjary tsy nisy olo sasy tamy tany Israely tao, tanaty 70 tao. Tsy nisy ndre ino ndre ino sasy ty tao. Fe nampitamà Jehovah fa handay vahoakine reo himpòly amy tanin-droze ane ndraike, laha fa afake 70 tao. Fe zisiky hiavia fotoa zay, ino ty raha hiseho amy vahoake-Ndranahare mipetrake a-Babylona ane reny? Ndao ho henteantsika ty mikasike raha zay.

2 Mpanjaka 25:​1-26; Jeremia 29:10; Ezekiela 1:​1-3; 8:​1-18.



Fanontanea

  • Ino ty raha nahazo an’​i Jerosalema noho Israelita amy sary eo reo?
  • Ia va Ezekiela? Ino va raha mampangaroharo natoron’​i Jehovah aze zao?
  • Ino ty raha novolànin’​i Jehovah fa hataone amin’​Israelita reo, laha fa tsy nanaja aze?
  • Ino ty raha nataon’​i Nebokadnezara Mpanjaka laha fa nanohitse aze Israelita reo?
  • Nengàn’​i Jehovah horavà tanàn’​Israelita reo. Ino ty antone nanaòvane raha zay?
  • Nanino tanin’​Israely reo ro tsy nisy olo sasy, voho naharitse firy tao raha zay?

Fanontanea Fanampine

  • Vakio 2 Mpanjaka 25:​1-26.

    Ia va Zedekia, voho ino ty raha nahazo aze? Faminania manao akore amy Baiboly ao mikasike raha zay ro tanterake? (2 Mpanj. 25:​5-7; Ezek. 12:​13-15)

    Ia ro namean’​i Jehovah tsiny laha fa tsy nanarake ty sitrapòne sasy ty Israelita? (2 Mpanj. 25:​9, 11, 12, 18, 19; 2 Tant. 36:​14, 17)

  • Vakio Ezekiela 8:​1-18.

    Ino ty nampitovy Kristianisma Anara reo tamin’​Israelita mpivali-pinoa nivavake tamy masoandro reny? (Ezek. 8:16; Isaia 5:​20, 21; Jaona 3:​19-21; 2 Tim. 4:​3)