Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 74: Lahilahy Tsy Navàka

Tantara 74: Lahilahy Tsy Navàka

MBA henteo moa olo mikizake lahilahy raike io. Hainao va hoe ia lahilahy kizàhin-droze io? Jeremia ty anarane. Mpaminani-Ndranahare ie.

Olo mikizake an’i Jeremia

Tsy ela tafara’​ty nanombohan’​i Josia mpanjaka nandrava ty sampy nisy tamy tany io teo, ro nivolànan’​i Jehovah tamin’​i Jeremia, fa ho mpaminanine ie. Fe nieritseritse Jeremia fa mbo kelikele maré ie ka tsy mbo tokone ho mpaminany. Fe nivòla tamine Jehovah fa hanampy aze.

Nivòla tamin’​Israelita reo Jeremia mba tsy hanaòvan-droze fomba raty sasy. Hoy ty asane hoe: ‘Mivavake ami-ndranahare diso iaby ty olo amy tany toy.’ Fe maro tamin’​Israelita reo ro nanompo sampy fa tsy nivavake tamin’​i Jehovah, Andranahare marina iny. Niheheza vahoake reny Jeremia laha fa nivòla tamin-droze fa, hanasazy an-droze amy raha raty ataon-droze io Andranahare.

Nandeha ty tao, ka maty Josia. Joiakima, anake lahine ro mpanjaka nisolo aze laha fa afake telo vola tafaran’​io. Mbo nivòla tamy vahoake reny avao Jeremia hoe: ‘Laha tsy miala amy fombanareo raty io nareo, le horavà Jerosalema.’ Nitanjake an’​i Jeremia ty mpisoro ka nikiakiake hoe: ‘Tokone hovonòa iha, satria, mahasaky mivòla raha ho’​zao.’ Nivòla mpitarike Israelita reo ty mpisoro laha fa bakeo hoe: ‘Tokone hovonòa Jeremia satria nivòla raha raty mikasike tanintsika toy.’

Ino ty raha hataon’​i Jeremia henany zao? Tsy navàka ie! Nivòla tamin’​olo iaby teo ie hoe: ‘Jehovah ro nanirake ahy hivòla raha rezao aminareo io. Laha mbo tsy ovànareo avao fombanareo raty io, le horavàn’​i Jehovah, Jerosalema. Laha mamono ahy nareo, le hamono lahilahy tsy manan-tsiny, satria tsy misy raha raty nataoko.’

Nengà mpitarike Israelita reo ho velo avao Jeremia, fa tsy nety niala tamy fomban-droze raty roze. Laha fa tafarafara atoy, le niavy Nebokadnezara, mpanjakan’​i Babylona, hialy tamin’​i Jerosalema. Nanjary mpanompon’​i Nebokadnezara Israelita reo tamy farane, ka nanday olo an’​arivone ta-Babylona tany ie ho andevo. Mba dinìho moa ty fijalea mety hahazo anao, laha andesin’​olo tsy hainao ho amy tany mbo tsy nandehananao ane mihitsy iha!

Jeremia 1:​1-8; 10:​1-5; 26:​1-16; 2 Mpanjaka 24:​1-17.



Fanontanea

  • Ia va lahilahy amy sary eo io?
  • Ino ty raha noeritseretin’​i Jeremia laha fa nofilìn’​i Jehovah ho mpaminany ie? Fe ino ty raha novolàn’​i Jehovah tamine?
  • Ino avao hafatse nampolimpolin’​i Jeremia tamy vahoake reo?
  • Ino ty raha natao mpisoro reo mba hanakàna an’​i Jeremia tsy haminany sasy? Fe tamy fomba manao akore ro nampisehoane fa tsy navàka mihitsy ie?
  • Ino ty raha niseho laha fa tsy niala tamy fomban-droze raty Israelita reo?

Fanontanea Fanampine

  • Vakio Jeremia 1:​1-8.

    Ino ty hanampy ty olo raike mba ho ampy fahaìza hanompoa an’​i Jehovah, manahake ty raha hita tamin’​i Jeremia? (2 Kor. 3:​5, 6)

    Mamporisike ty zatovo kristiana mba hanao ino ty modely soa namean’​i Jeremia? (Mpit. 12:​1; 1 Tim. 4:​12)

  • Vakio Jeremia 10:​1-5.

    Ino ty ohatse nampiasan’​i Jeremia mba hampisehoa fa tsy misy dikane ty fivavàha amy sampy? (Jer. 10:​5; Isa. 46:​7; Hab. 2:​19)

  • Vakio Jeremia 26:​1-16.

    Nodidin’​i Jehovah Jeremia mba ‘tsy hamòny ndre safà raike’ fa hanambara aze iaby amin’​Israelita reo. Manao akore koa ty fomba anaraha’​ty sisa voahosotse didy baka amin’​i Jehovah io, laha fa manambara hafatse fananàra roze amy andro henany io? (Jer. 26:​2; Deot. 4:​2; Asa. 20:​27)

    Laha fa manambara ty hafatse fananàra baka amin’​i Jehovah ho amy firenena manontolo ty Vavolombelon’​i Jehovah henany zao, le tokone hanahake ty ohatse soa nengàn’​i Jeremia. Ino ty antone? (Jer. 26:​8, 12, 14, 15; 2 Tim. 4:​1-5)

  • Vakio 2 Mpanjaka 24:​1-17.

    Ino ty raha nahazo olo nipetrake ta-Joda tao reny, laha fa nivalike tamin’​i Jehovah? (2 Mpanj. 24:​2-4, 14)