Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 72: Nanampy An’​i Hezekia Mpanjaka Andranahare

Tantara 72: Nanampy An’​i Hezekia Mpanjaka Andranahare

HAINAO va ty antone ivavàha lahilahy io amin’​i Jehovah io? Manino taratasy reo ro velàrine anila alitara eo? Hezekia lahilahy io. Mpanjaka’​ty foko roe amin’​Israely ao ie. Sahìra biby ie eo io. Ino ty antone?

Hezekia Mpanjaka mivavake

Satria fa noravà’​ty miaramila asyriana, ty foko folo baka avaratse ao. Nengàn’​i Jehovah hiseho raha zay, satria raty fanahy maré ty olo nipetrake tao. Avy ty tafike asyriana henany zao mba hialy amy fanjakà’​ty foko roe antìmo atoy.

Vo baka nandefa taratasy ho an’​i Hezekia Mpanjaka, ty mpanjakan’​i Asyria. Natoron’​i Hezekia an’​Andranahare taratasy reo. Ino ty raha nosorata mpanjakan’​i Asyria io tao? Mikizake an’​i Jehovah ie, sady mivòla amin’​i Hezekia mba hitolo-bata soa ho resy ty Israely. Ka zay ty antone nivavàhan’​i Hezekia tami-Ndranahare hoe: ‘Mba avòto tsy ho resi’​ty mpanjakan’​i Asyria lahy zahay Jehovah. Ami’​zay le ho hai’​ty tany manontolo fa iha raike avao ro Andranahare.’ Hijànjy ty vavakin’​i Hezekia va Jehovah?

Mpanjaka soa fanahy Hezekia. Tsy nitovy tamy mpanjaka’​ty foko folo raty fanahy tamy fanjakàn’​Israely teo ie. Tsy nanahake an’​i Ahaba Mpanjaka raty fanahy kea ie. Nanorike soa ty lalàn’​i Jehovah Hezekia. Ka laha fa vita ty vavake nataone, le nandefasan’​i Isaia mpaminany hafatse, baka amin’​i Jehovah ie hoe: ‘Tsy ho avy a Jerosalema ao ty mpanjakan’​i Asyria. Ndra ty raike amy miaramilan-droze reo aza, le tsy ho avy marìny an’​i Jerosalema. Sady tsy handefa ndra lefo raike amy tanà io eo roze.’

Mba henteo moa sary io. Hainao va hoe miaramilan’​ia maty reo? Miaramila’​ty Asyriana reo. Nanirake ty anjeline raike Jehovah mba hamono miaramila asyrianina 185 000, ndraike haly avao. Naneke ho resy ty mpanjakan’​i Asyria, laha fa nahita faty miaramilane reo, ka nimpòly malaky tamy tanine tany.

Miaramila asyriana maty

Avotse fanjakà’​ty foko roe tamin’​Israely teo, ka mba niada tseky ty vahoake. Fe laha fa nimaty Hezekia, le nisolo aze ho mpanjaka, ty anake lahine atao hoe Manase zay. Manase noho ty anake lahine atao hoe Amona ro mpanjaka nanarakarake an’​i Hezekia, samby niraty fanahy roze mianake reo. Ka nanjary feno vonoan’​olo noho aly tanà iny. Laha fa novonò’​ty mpanompone Amona, le Josia, anake lahine, ro natao mpanjaka hisolo aze.

2 Mpanjaka 18:​1-36; 19:​1-37; 21:​1-25.



Fanontanea

  • Ia va lahilahy amy sary io, voho ino ty raha manahìran-tsay aze?
  • Ino va taratasy natoron’​i Hezekia an’​Andranahare reo, voho ino koa ty vavake nataone?
  • Mpanjaka nanao akore Hezekia, voho ino ty hafatse baka amin’​i Jehovah novolànin’​i Isaia tamine?
  • Nataon’​anjelin’​i Jehovah reny akore ty miaramila asyriana, arake ty hita amy sary eo?
  • Niada tanaty fotoa kelikele ty fanjakà’​ty foko roe. Fe ino ty raha niseho laha fa nimaty Hezekia?

Fanontanea Fanampine

  • Vakio 2 Mpanjaka 18:​1-36.

    Ino ty raha nataon’​i Rabsake, mpanday hafatsin’​i Asyriana reny, mba hampihenà ty finoan’​Israelita reo? (2 Mpanj. 18:​19, 21; Eks. 5:​2; Sal. 64:​3)

    Amy fomba manao akore ro hanahafa’​ty Vavolombelon’​i Jehovah an’​i Hezekia laha misy manohitse an-droze? (2 Mpanj. 18:36; Sal. 39:​1; Ohab. 26:​4; 2 Tim. 2:​24)

  • Vakio 2 Mpanjaka 19:​1-37.

    Amy fomba manao akore ro hanahafa’​ty vahoaki-Ndranahare an’​i Hezekia laha fa misy raha sarotse na mampanahìra mahazo an-droze? (2 Mpanj. 19:​1, 2; Ohab. 3:​5, 6; Heb. 10:​24, 25; Jak. 5:​14, 15)

    Ino iaby ty raha telo nahazo an’​i Sankeriba Mpanjaka? Ia koa ty mifanandrify amine amy faminania ao? (2 Mpanj. 19:​32, 35, 37; Apok. 20:​2, 3)

  • Vakio 2 Mpanjaka 21:​1-6, 16.

    Ino ty antone ivolàna fa tafilitse anatine mpanjaka farane ze raty fanahy biby ta-Jerosalema tao reny Manase? (2 Tant. 33:​4-6, 9)