Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 71: Mampitamà Paradisa Andranahare

Tantara 71: Mampitamà Paradisa Andranahare

METY manahake sary eto toy, ty paradisa natoro-Ndranahare an’​i Isaia mpaminany iny. Isaia le olo niay fotoa kelikele tafaran’​i Jona.

Olo amin’ny Paradisa ao

“Zariday” na “saha” ty dika paradisa zao. Tsy ahatiarovanao raha fa nianarantsika tamy boky toy ato va raha zay? Tsy manahake zariday soasoa nametrahan’​i Jehovah an’​i Adama noho Eva iny va ty fanenteanao aze? Mbo ho paradisa avao va ty tany manontolo ndraike andro ane?

Nivòla tamin’​i Isaia Jehovah mba hanoratse ty raha mikasikasike paradisa vaovao hoavy, ho ahi’​ty mpanompone. Hoy ty asane: ‘Hiada sady hiarake hipetrake ty amboadia noho ty anak’​aondry. Hiarake hihina ty anak’​aomby noho ty liona tanora. Anak’​ajà ro hiarake an-droze. Ndra ty anak’​ajà kelikele aza, le tsy handràtsy, laha mihìsa anila’​ty bibilava misy poìzy.’

Maro ty hivòla hoe: ‘Tsy hisy mihitsy raha reo. Bakany bakany zay, le fahasahiràna avao ro hita an-tany etoy sady mbo hitohy avao.’ Fe eritsereto tseky fanontanea toy: Toera manao akore moa ro nametraha-Ndranahare an’​i Adama noho Eva iny?

Napetra-Ndranahare tamy paradisa tao Adama noho Eva. Ka nafoin-droze paradisa soasoa io, laha fa tsy nanorike ty safà-Ndranahare sasy roze. Nihaantitse kea roze, ka nimaty. Fe nampitamà Andranahare, fa hameane paradisa narian’​i Adama noho Eva iny, ze olo tea aze.

Laha fa avy paradisa vaovao io, le tsy hisy raha ho simba na ho rava sasy. Fiadàna ro hanjaka an-tany etoy. Ho faly sady ho salama soa iaby ty olo, ka hanahake ty nitiava-Ndranahare aze tamy voalohane tany iny. Fe hianarantsika laha fa afara ao ty fomba hanaòva-Ndranahare raha reo.

Isaia 11:​6-9; Apokalypsy 21:​3, 4.



Fanontanea

  • Ia va Isaia, tamy fotoa manao akore ro niaìnane? Ino koa ty raha natoron’​i Jehovah aze?
  • Ino va ty dika safà hoe “paradisa” zao, voho ino ty raha tiaronao laha fa mahita soratse io iha?
  • Ino ty raha nampanoratin’​i Jehovah an’​i Isaia mikasike Paradisa vaovao io?
  • Nafoin’​i Adama noho Eva paradisa soasoa nipetrahan-droze iny. Ino ty antone?
  • Ino ty raha ampitamànin’​i Jehovah fa hameane ze olo tea aze?

Fanontanea Fanampine

  • Vakio Isaia 11:​6-9.

    Hiarake hipetrake ty olo noho ty biby laha fa amy paradisa ao. Manao akore ty fomba ivolàna’​ty Baiboly raha zay? (Sal. 148:​10, 13; Isaia 65:25; Ezek. 34:​25)

    Fa tanterake amy hevine ara-panahy amy vahoakin’​i Jehovah amy andro henany zao ty faminanian’​i Isaia. Hazavao. (Rom. 12:​2; Efes. 4:​23, 24)

    Ia ro tokone hoderàntsika, laha fa mahita ty fiovà’​ty toetsin’​olo amy andro henany zao noho amy tontolo vaovao ao tsika? (Isaia 48:​17, 18; Gal. 5:​22, 23; Fil. 4:​7)

  • Vakio Apokalypsy 21:​3, 4.

    Porofò amy Baiboly ao fa tsy ara-bakiteny ty hoe miarake mipetrake amin’​olombelo Andranahare. (Lev. 26:​11, 12; 2 Tant. 6:18; Isaia 66:​1; Apok. 21:​2, 3, 22-24)

    Ino iaby ty karazan-dranomaso noho raha mahararirary hofoàna? (Lioka 8:​49-52; Rom. 8:​21, 22; Apok. 21:​4)