Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 69: Ajà Ampela Nanampy Lahilahy Matanjake Raike

Tantara 69: Ajà Ampela Nanampy Lahilahy Matanjake Raike

HAINAO va raha volànin’​ajà ampela io? Mitantara amin’​ampela io mikasike an’​i Elisa mpaminanin’​i Jehovah ie, sady miresake amine kea ty fomba nanampian’​i Jehovah an’​i Elisa hanao fahagagà. Tsy Israelita ampela io, ka tsy mahay raha mikasike an’​i Jehovah. Ndao ho henteantika hoe ino ty antone niavian’​ajà io ho an-tranon’​ampela io ao.

Syriana ampela io. Namàna ty anara’​ty valine. Mpitari-tafike syriana Namàna io. Niazo’​ty Syriana ajà ampela israelita io, ka nanjary andevon-droze. Nandesin-droze tamy valin’​i Namàna tao ie, ka nataone mpiasa.

Valin’i Namana noho ajà ampela mpiasany iny

Nana arete raty Namàna: boka ie. Miendake ty nofotsin’​olo laha fa tratsin’​arete io. Ka hoy ty asan’​ajà ampela iny tamy valin’​i Namàna io hoe: ‘Iriko handeha a-Israely ane, mba hamonjy mpaminanin’​i Jehovah iny lahy ty tompoko. Hahafake ty habokàne mpaminany io.’ Nivòla valine iny ampela io, laha fa tafara atoy.

Ta ho afake amin’​aretine io Namàna, ka nanapa-kevitse handeha a-Israely ane. Laha fa niavy tany ie, le nandeha tan-tranon’​i Elisa tao. Nirahin’​i Elisa ty mpanompone hivòla amin’​i Namàna mba hisasa impito tamy Ranon’​i Jordana tao. Nampeloke an’​i Namàna biby raha zay, ka hoy ty asane: ‘Mbo soa mandilatse ty renirano amin’​Israely eto, ty renirano an-tanànay ane!’ Nandeha nimpòly Namàna, laha fa baka nivòla safà io.

Fe hoy ty asa mpanompon’​i Namàna raike zay hoe: ‘Tompoko, tsy ho nataonao avao va ty raha novolànin’​i Elisa taminao, ndre sarotse manao akore aza! Ka ino lahy ty antone tsy anorìhanao ty safà mpaminany io hoe tokone handro amy rano io ao iha?’ Nijànjy soa ty resake natao mpanompone io Namàna, ka nandeha nijòbo impito tamy Ranon’​i Jordana tao. Nalio sady salama soa ty nofotsin’​i Namàna, laha fa nanao raha zay!

Faly bibike Namàna. Nimpòly tamin’​i Elisa tany ie, ka nivòla hoe: ‘Mino vatane aho henany zao fa ty Andranaharen’​Israely ro Andranahare marina amy tany manontolo. Ka, mba rambeso lahy fanomeza baka amiko reto.’ Fe namaly aze Elisa hoe: ‘Aha, tsy afake handramby an’​io aho.’ Hain’​i Elisa fa tsy mety laha mandramby fanomeza io ho aze ie, satria Jehovah ro nahafake ty aretin’​i Namàna fa tsy ie. Fe tean’​i Gehazy, mpanompon’​i Elisa ho aze fanomeza reo.

Ka, ho’​zao ty raha nataon’​i Gehazy. Laha fa nandeha Namàna, le nanìa aze baka afara ato Gehazy. Hoy ty asan’​i Gehazy tamin’​i Namàna hoe: ‘Nanirake ahy ho aminao atoy Elisa. Nampangalàne ahy fanomeza baka aminao atoy reny. Hisy namane rezay hoavy hisafo aze, ka hameane an-droze zao raha reo.’ Vandy biby raha novolànin’​i Gehazy io. Fe tsy hain’​i Namàna hoe navandy tamine Gehazy, ka le nameane aze fanomeza reny.

Laha fa nimpòly tan-trano tany Gehazy, le fa nihain’​i Elisa ty raha nataone. Nambaran’​i Jehovah an’​i Elisa raha zay. Ka hoy ty asan’​i Elisa tamin’​i Gehazy hoe: ‘Nanao raha raty iha, ka hahazo anao habokàn’​i Namàna iny.’ Ka le zay vatane ty raha niseho!

Ino ty fianara azontsika baka amy tantara io? Voalohane, tokone hanahake anak’​ajà ampela iny tsika ka tsy havàka fa hiresake amin’​olo hafa ty raha mikasike an’​i Jehovah. Ho maro ty fitahia azontsika ami’​zay. Faharoe, tsy tokone hiavonavo manahake an’​i Namàna tamy voalohane iny tsika, fa hanorike avao ty safà’​ty mpanompo-Ndranahare. Fahatelo, tsy tokone havandy manahake an’​i Gehazy tsika. Tsy hitanao hoe maro va ty raha haintsika laha fa mazoto mamaky Baiboly tsika?

2 Mpanjaka 5:​1-27.



Fanontanea

  • Ino va raha volànin’​ajà ampela io amin’​ampela raike amy sary eo io?
  • Ia va ampela amy sary io, voho ino ty raha ataon’​ajà ampela io an-tranone ao?
  • Ino ty safà nampivolànin’​i Elisa mpanompone iny an’​i Namàna, voho ino ty antone nampeloke an’​i Namàna?
  • Nanao akore Namàna laha fa nijànjy ty safà’​ty mpanompone?
  • Ino ty antone tsy naneken’​i Elisa fanomeza baka amin’​i Namàna, fe ino ty raha nataon’​i Gehazy?
  • Ino ty raha nahazo an’​i Gehazy, voho ino ty fianara azontsika baka amy tantara io?

Fanontanea Fanampine

  • Vakio 2 Mpanjaka 5:​1-27.

    Ino ty antone ivolàna fa manatanjake ty tanora henany zao ty ohatse soa nengàn’​ajà ampela israelita io? (2 Mpanj. 5:​3; Sal. 8:​2; 148:​12, 13)

    Manino tsika ro tokone hahatiaro ty ohatsin’​i Namàna laha fa amea torohevitse baka amy Baiboly ao? (2 Mpanj. 5:15; Heb. 12:​5, 6; Jak. 4:​6)

    Ino ty fianara azontsika baka amy ohatse samby hafa namean’​i Elisa noho Gehazy io? (2 Mpanj. 5:​9, 10, 14-16, 20; Matio 10:​8; Asa. 5:​1-5; 2 Kor. 2:​17)