Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 67: Natoky An’​i Jehovah Josafata

Tantara 67: Natoky An’​i Jehovah Josafata

HAINAO va hoe ia lahilahy reo io? Ino raha ataon-droze io? Handeha hialy roze, ka lahilahy alohan-droze reo mihira. Fe mety hanontany iha hoe: ‘Manino mpihira reo tsy manday lefo noho sabatsy hialìa io?’ Ndao ho henteantsika.

Israelita handeha hialy

Josafata ro mpanjaka’​ty foko roe tamin’​Israely teo. Velo niarake tamin’​i Ahaba noho Jezebela, mpanjaka’​ty foko folo tavaratse tany, Josafata. Fe mpanjaka soa Josafata. Mpanjaka soa fanahy biby ty babane, Asa ty anarane. Ka tanaty tao maromaro, le faly ty vahoake nipetrake tamy fanjakà’​ty foko roe tantìmo atoy, satria niada sady nana fiaìna soa roze.

Fe hisy raha hiseho, hampatahotse ty olo. Nisy hafatse niavy tamin’​i Josafata tao: ‘Ho avy hanafike anareo ty mpanjaka’​ty tany Moaba noho Amona voho ty Vohitse Seira.’ Maro ty Israelita nivory ta-Jerosalema tao, mba hila ty fanampian’​i Jehovah. Nandeha tamy tempoly tao roze, ka nivavake Josafata hoe: ‘Jehovah Andranaharenay! Tsy hainay lahy ty raha hataonay. Tsy misy afake manavotse anay amy fanafìha tafike mahery reo, ka mba mangatake fanampia baka aminao lahy zahay.’

Nojanjìnin’​i Jehovah vavake zay, ka nanirake ty raike tamy mpanompone ie mba hivòla ty vahoake hoe: ‘Tsy ahinareo aly io, fa an’​Andranahare. Tsy hialy nareo. Manentea avao, le ho hitanareo ty fomba hamonjean’​i Jehovah anareo.’

Ka laha fa niavy ty hamaray maraindray, le hoy ty asan’​i Josafata tamy vahoakine: ‘Matokìsa an’​i Jehovah nareo!’ Bakeo nasian’​i Josafata mpihira nitari-dala taloha miaramilane reo teo. Ka nandeha roze sady nihira hira manome voninahitse an’​Andranahare. Hainao va hoe ino ty raha niseho laha fa narinike toera hialìa iny roze? Nataon’​i Jehovah ze hifamonòa miaramila fahavalo reny. Laha fa niavy ty Israelita, le nihitan-droze niampatsampatsy teo iaby, ty faty fahavalon-droze reny!

Tsy hitanao hoe hendry va Josafata laha fa natoky an’​i Jehovah? Ho hendry kea tsika laha matoky Aze.

1 Mpanjaka 22:​41-53; 2 Tantara 20:​1-30.


Fanontanea

  • Ia va Josafata zao, voho ia iaby ty olo niarake velo tamine?
  • Ino va ty antone nampatahotse ty Israelita, ka ino ty raha natao’​ty maro tamin-droze?
  • Nanao akore ty fomba namalian’​i Jehovah ty vavake nataon’​i Josafata?
  • Ino ty raha nataon’​i Jehovah taloha’​ty niavia Israelita reo tamy aly io tany?
  • Ino ty fianara azontsika baka amin’​i Josafata?

Fanontanea Fanampine

  • Vakio 2 Tantara 20:​1-30.

    Ino ty tokone hatao’​ty mpanompo-Ndranahare laha fa misy raha mampatahotse mahazo aze, manahake ty raha niseho tamin’​i Josafata? (2 Tant. 20:12; Sal. 25:15; 62:​1)

    Nampiasa olo avao Jehovah bakany bakany zay laha fa nifampikasoke tami’​ty vahoakine. Ia koa ty ampiasàne henany zao? (2 Tant. 20:​14, 15; Matio 24:​45-47; Jaona 15:​15)

    Hisy raha sarotse manahake ty nahazo an’​i Josafata kea hahazo antsika laha fa hanomboke “ali’​ty andro bevata-Ndranahare, aze mana Hery Farane Anabo iny.” Hazavao. (2 Tant. 20:​15, 17; 32:​8; Apok. 16:​14, 16)

    Ino ty antone ivolàna fa mitovy amy Levita ty mpisava lala, noho ty misionera laha fa manao asa fitoria amy tany manontolo ane? (2 Tant. 20:19; Rom. 10:​13-15; 2 Tim. 4:​2)