Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 65: Nozarà Roe ty Fanjakà

Tantara 65: Nozarà Roe ty Fanjakà

HAINAO va hoe ino ty antone andriàta lahilahy io ty akanjone? Jehovah ro nivòla aze hanao raha zay. Ahia ty anara lahilahy io. Mpaminani-Ndranahare ie. Hainao va ty dika mpaminany zao? Olo fivolàna-Ndranahare ty raha hiseho amy hoavy mpaminany zao.

Ahia noho Jeroboama

Miresake amin’​i Jeroboama Ahia eto. Lahilahy nampikarakaràn’​i Solomona ty fanamboara ty tranone Jeroboama io. Laha fa nahita an’​i Jeroboama tan-dala teny Ahia, le nanao raha hafahafa. Nalàne akanjo vaovao tamine teny iny, ka notatatatahine 12. Hoy ty asane tamin’​i Jeroboama: ‘Andeso ho anao tapane folo reto.’ Hainao va ty antone nanomezan’​i Ahia tapa-tsiky folo reo an’​i Jeroboama?

Nanazava Ahia fa halàn’​i Jehovah tsy ho amin’​i Solomona sasy fanjakà io. Nivòla kea ie fa hamean’​i Jehovah an’​i Jeroboama ty foko folo. Midika raha zay fa foko roe avao ro ho sisa tavela. Ka Rehoboama, anake lahin’​i Solomona ro ho mpanjaka amy foko roe reo.

Laha fa naharé raha novolànin’​i Ahia zay Solomona, le neloke biby. Nanandra namono an’​i Jeroboama ie. Fe nilay ta-Ejipta ane Jeroboama. Laha fa tafarafara atoy, le nimaty Solomona. Nanjaka tanaty 40 tao ie. Natao mpanjaka hisolo aze, Rehoboama, anake lahine. Laha fa nirén’​i Jeroboama fa maty Solomona, le nimpòly ta-Israely tany ie.

Mpanjaka raty Rehoboama. Mbo nasiake biby mihoatse an’​i Solomona ie. Ndraike andro, le nandeha namonjy an’​i Rehoboama, Jeroboama noho ty manam-pahefà sasane mba hangatake amy mpanjaka io ho soa fanahy ami’​ty vahoake. Fe tsy nijànjy an-droze Rehoboama. Nanjeky biby aza ie, ka nasiake maré mandilatse ty taloha. Ka le nifìly an’​i Jeroboama mba ho mpanjaka, ty foko folo. Fa ty fokon’​i Benjamina noho Joda avao ro nitanjake an’​i Rehoboama mba ho mpanjakan-droze.

Tsy tean’​i Jeroboama handeha a-Jerosalema ane mba hivavake amy tempolin’​i Jehovah ao ty vahoakine. Ka nanamboatse aombilahy volamena kelikely zay ie. Nitao foko folo reo mba hivavake amy raha namboarine io Jeroboama. Tsy ela, le nifeno aly noho vonoan’​olo tanà iny.

Nana ty raha nampanahìra aze kea ty fanjakà tamy foko roe reo tany. Vo limy tao latsake henany zao ty naha mpanjaka an’​i Rehoboama, fe fa niavy hialy amin’​i Jerosalema ty mpanjakan’​i Ejipta. Nalàne iaby ty rakitsy tamy tempolin’​i Jehovah tao. Ka tsy nanahake tamin’​ie vo nivita iny sasy ty tempoly henany zao.

1 Mpanjaka 11:​26-43; 12:​1-33; 14:​21-31.



Fanontanea

  • Ia iaby ty anara lahilahy roe amy sary eo io? Ia olo reo?
  • Nataon’​i Ahia ino akanjo lava nanisiane iny? Ino ty dika raha zay?
  • Fa nanandra hanao ino an’​i Jeroboama Solomona?
  • Ino ty antone nifiliana’​ty vahoake an’​i Jeroboama mba ho mpanjaka’​ty foko folo?
  • Nanino Jeroboama ro nanamboatse aombilahy kelikele volamena roe? Nanao akore ty tany laha fa tafaran’​io?
  • Ino ty raha niseho tamy fanjakà’​ty foko roe noho tamy tempolin’​i Jehovah ta-Jerosalema tany iny?

Fanontanea Fanampine

  • Vakio 1 Mpanjaka 11:​26-43.

    Karazan’​olo nanao akore moa Jeroboama? Ino ty raha nampitamànin’​i Jehovah aze laha nanorike ty lalàne ie? (1 Mpanj. 11:​28, 38)

  • Vakio 1 Mpanjaka 12:​1-33.

    Nanampatse ty fahefà nananane Rehoboama, ka nanome ohatse raty. Ino ty fianara azo’​ty rae amin-dreny noho ty anti-panahy baka amy raha zay? (1 Mpanj. 12:13; Mpit. 7:​7; 1 Pet. 5:​2, 3)

    Amin’​ia ro tokone hilà’​ty zatovo tari-dala azo iantehéra, laha fa manao fanapahan-kevitse bevata? (1 Mpanj. 12:​6, 7; Ohab. 1:​8, 9; 2 Tim. 3:​16, 17; Heb. 13:​7)

    Ino ty antone nanamboaran’​i Jeroboama toera roe hivavàha tamy anak’​aomby kelikele? Hita tamy raha nataone zay, fa tsy nino an’​i Jehovah ie. Hazavao ty antone. (1 Mpanj. 11:37; 12:​26-28)

    Ia ty nitarike vahoake tamy fanjakà’​ty foko folo tao hanohitse ty fivavàha marina io? (1 Mpanj. 12:​32, 33)