Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 62: Fahasahiràna Tan-tranon’​i Davida Tao

Tantara 62: Fahasahiràna Tan-tranon’​i Davida Tao

LAHA vo nanomboke nanjaka ta-Jerosalema tao Davida, le namean’​i Jehovah fandresea maro avao ty tafine tami’​ty aly nataon-droze. Nampitamà Jehovah fa hanome tany Kanana io ho an’​Israelita reo. Ka henany zao, noho’​ty fanampian’​i Jehovah, le niazon-droze iaby tany nampitamàny an-droze reny.

Mpanjaka soa fanahy Davida. Tea an’​i Jehovah ie. Ka, laha vo niazon’​i Davida Jerosalema, le nandesine tao fiara’​ty fanekean’​i Jehovah iny. Io ty raha voalohane nataone tao. Naniry hanamboatse tempoly kea ie mba hametràha raha io.

Laha fa nihaantitse Davida, le nisy raha tsy nety nataone. Fa haine soa fa tsy mety ty mangalake raha anahin’​olo hafa. Fe, ndraike hariva ie, le niakatse tamy tafon-tranone teny, le nahita ampela soa bibike zay. Batseba ty anarane. Vali’​ty raike amy miaramilan’​i Davida, atao hoe Oria zay, ampela io.

Tea an’​i Batseba maré Davida, ka nandesine tan-tranone tany ampela io. Tsy teo valin’​i Batseba iny tami’​zay, fa nandeha nialy. Nilàn’​i Davida ampela io, ka le niarake roze. Laha fa tafarafara atoy, le nihain’​i Batseba fa bevòka ie. Tsy hitan’​i Davida ty hataone, ka nandefa olo ho amin’​i Joaba mpitarike miaramilane ie. Novolànine Joaba mba hametrake an’​i Oria amy lahàra voalohane eo laha fa mialy, soa ho maty Oria. Laha fa nimaty Oria, le nalàn’​i Davida ho valine Batseba.

Neloke maré tamin’​i Davida, Jehovah. Nalefane ho amin’​i Davida ane, Natana mba hivòla amine ty raha raty nataone. Hitanao amy sary etoa Natana, miresake amin’​i Davida. Naneny ty raha raty nataone Davida ka tsy novonòn’​i Jehovah. Fe, nivòla tamine Jehovah hoe: ‘Hahita fahasahiràna maro an-tranonao ao iha, satria, nanao raha raty.’ Nimaro vatane ty fahasahiràna nahazo an’​i Davida!

Natana mananatse an’i Davida

Nimaty tseky anake lahin’​i Batseba iny. Bakeo nanao forosé an’​i Tamara anabavine, handry miarake amine ty anake lahin’​i Davida voalohane atao hoe Amnona zay. Neloke biby Absaloma, anake lahin’​i Davida raike zay, ka novonòne Amnona. Nitean’​olo maro Absaloma laha fa tafara atoy, ka ie avao ro nanolotse ty vatane ho mpanjaka. Tamy farane, le nialy ty miaramilan’​i Davida noho ty miaramilan’​i Absaloma. Naharesy Davida, fa Absaloma nimaty. Nimaro vatane ty fahasahiràna nahazo an’​i Davida.

Tanivonivo raha iaby niseho rezay, le niterake anake lahy tamin’​i Davida Batseba. Solomona ty anaran’​ajà io. Laha fa antitse noho narary Davida, le nanandra nanao ty vatane ho mpanjaka ty anake lahine raike atao hoe Adonia zay. Fe nivòla tamin’​i Zadoka, mpisoro Davida, mba hanìly menake manitse tan-dohan’​i Solomona teo, soa ho hitan’​olo iaby fa Solomona ro ho mpanjaka hisolo an’​i Davida. Tafara atoy, le nimaty Davida laha fa nifeno 70 tao. Nanjaka tanaty 40 tao ie, fe Solomona ndraike henany zao ro ho mpanjakan’​Israely.

2 Samoela 11:​1-27; 12:​1-18; 1 Mpanjaka 1:​1-48.



Fanontanea

  • Nanao akore tany Kanana iny laha fa nahazo ty fanampian’​i Jehovah?
  • Ino ty raha niseho ndraike hariva, laha fa tamy tafon-tranone teny Davida?
  • Nanino Jehovah ro neloke maré an’​i Davida?
  • Arake ty hita amy sary io, ia ty nirahin’​i Jehovah hiresake amin’​i Davida mikasike ty fahotà nataone? Ino ty raha novolànin’​olo io fa hahazo an’​i Davida?
  • Ino iaby ty fahasahiràna nahazo an’​i Davida?
  • Ia ty mpanjakan’​Israely vaovao hisolo an’​i Davida?

Fanontanea Fanampine

  • Vakio 2 Samoela 11:​1-27.

    Voaaro tsika, laha fa mazoto manompo an’​i Jehovah. Ino ty antone?

    Ino ty nahavy an’​i Davida hanota? Tokone hiamby soa amin’​ino kea ty mpanompon’​i Jehovah amy fotoa henany zao? (2 Sam. 11:​2; Matio 5:​27-29; 1 Kor. 10:12; Jak. 1:​14, 15)

  • Vakio 2 Samoela 12:​1-18.

    Ino ty fianara azo’​ty anti-panahy noho ty rae amin-dreny ianara baka amy fomba nanomezan’​i Natana torohevitse an’​i Davida? (2 Sam. 12:​1-4; Ohab. 12:18; Matio 13:​34)

    Nanino Jehovah ro namela heloka an’​i Davida? (2 Sam. 12:13; Sal. 32:​5; 2 Kor. 7:​9, 10)