Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 57: Nifìly An’​i Davida Andranahare

Tantara 57: Nifìly An’​i Davida Andranahare
Davida manavotse anak’aondry

HITANAO va raha miseho etoa io? Nanavotse anak’​aondry kelikele io tsy hohanin’​orsa ajà lahilahy io. Niavy orsa iny nangalake anak’​aondry io, ka ho nihina aze. Fe nanorike an-droze baka afara ato, ajà lahilahy io, ka nanavotse anak’​aondry io tam-bavan’​orsa io teny. Laha fa nitsanga orsa iny, le nosamborin’​ajà lahilahy io, ka novonòne! Fa nanavotse anak’​aondry tsy hohani’​ty liona kea ie, ndraike andro. Tsy hitanao hoe matanjake va ajà lahilahy io? Hainao va hoe ia io?

Davida io. Nipetrake ta-Betlehema tany ie. Obeda ty anara’​ty razane lahilahy. Anake lahin’​i Rota noho Boaza, Obeda zao. Tiaronao va roze? Jese ty anara baban’​i Davida. Nazoto nikarakara ty aondri’​ty babane Davida. Folo tao tafara’​ty nifilianan’​i Jehovah an’​i Saoly ho mpanjaka, vo naterake Davida.

Avy ty fotoa niresahan’​i Jehovah tamin’​i Samoela hoe: ‘Mangalà menake miavake iha, ka ndahàna ho an-tranon’​i Jese a-Betlehema ane. Nifìly ty anake lahine raike aho mba ho mpanjaka.’ Ka, laha fa nahita an’​i Eliaba, talanolon’​i Jese Samoela, le nivòla hoe: ‘Inoako fa toy aze nofilìn’​i Jehovah zao.’ Fe nivòla tamine Jehovah hoe: ‘Ka manenty ty halavane ndra ty hasoa tarehine, fa tsy nifìly aze ho mpanjaka aho.’

Nikaike ty anake lahine hafa atao hoe Abinadaba zay Jese, ka nandesine tamin’​i Samoela teo. Fe nivòla Samoela hoe: ‘Aha, tsy nifìly aze kea Jehovah.’ Nandesin’​i Jese teo kea Sama. ‘Tsy nifìly aze Jehovah’, hoy ty asan’​i Samoela. Nandesin’​i Jese tamin’​i Samoela teo iaby ty anake lahine fito, fe tsy nifìly ndra ty raike tamin-droze Jehovah. Nanontany Samoela hoe: ‘Fa reo iaby va ty anake lahinao?’

Mbo misy raike faralahy zay ty ane’, hoy Jese. ‘Fe tsy eo ie, fa ­nandeha niarake aondry.’ Laha fa nandesy teo kea Davida, le hitan’​i Samoela fa tovolahy soa. ‘Io ro ie’, hoy Jehovah. ‘Ailìno amine eo menake io.’ Nataon’​i Samoela raha zay. Ho avy ty fotoa haha-mpanjaka an’​i Davida amin’​Israely eo.

1 Samoela 17:​34, 35; 16:​1-13.



Fanontanea

  • Ia ty anaran’​ajà lahilahy amy sary io? Ino koa ro ahaìzantsika fa mahery fo ie?
  • Nipetrake taìa Davida io? Ia va ty anara’​ty baban’​i Davida noho ty razane lahilahy?
  • Nanino Samoela ro niràhin’​i Jehovah ho an-tranon’​i Jese, a-Betlehema ane?
  • Ino ty raha niseho laha fa nandesin’​i Jese tamin’​i Samoela teo iaby anane fito lahy reny?
  • Ino ty raha novolànin’​i Jehovah an’​i Samoela, laha fa nandesy tamine teo Davida?

Fanontanea Fanampine

  • Vakio 1 Samoela 17:​34, 35.

    Hazavao baka amy raha niseho reto, fa be herim-po Davida sady natoky an’​i Jehovah avao. (1 Sam. 17:​37)

  • Vakio 1 Samoela 16:​1-14.

    Manampy antsika tsy hanavakavake volon’​olo noho tsy hitsaratsara olo fahatane ty 1 Samoela 16:​7. Hazavao. (Asa. 10:​34, 35; 1 Tim. 2:​4)

    Manahake ty raha nahazo an’​i Saoly; ino ro ahaìzantsika fa mety hisy fanahy raty na fanirìa hanao raha raty, hilitse an-tsain’​olo raike ao, laha fa alàn’​i Jehovah amine ty fanahine? (1 Sam. 16:14; Matio 12:​43-45; Gal. 5:​16)