Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 52: Gideona Noho ty Namane 300

Tantara 52: Gideona Noho ty Namane 300

HITANAO va raha miseho eto io? Miaramilan’​Israely roze iaby reo. Minon-drano lahilahy miondrike eo reo. Gideona lahilahy mitsanga marìny an-droze eo io, mpitsara ie. Manenty ty fomba finòma lahilahy reo rano Gideona.

Henteo soa moa fa samby mana ty fomba finòman-droze rano iaby lahilahy reo. Ty sasane mihohoke amy rano io eo. Ty hafa mangalake rano ami’​ty tanane, zay vo mino, soa ho afake hahita ty raha miseho manodidy aze. Io ty raha tokone hatao, satria nivòla tamin’​i Gideona Jehovah mba hifìly ze miaramila mahay miamby soa, ndre minon-drano aza. Ty sasane hoy Andranahare, le tokone halefa moly amin-droze ane. Ndao hianarantsika tantara io.

Tratsi’​ty fahasahiràna ndraike ty Israelita, satria tsy nanorike ty safàn’​i Jehovah. Nahery ty vahoake Midiana, ka nampijaly an-droze. Nangatake fanampia tamin’​i Jehovah ty Israelita, ka nijànjy ty fitaraìnan-droze Jehovah.

Nivòla tamin’​i Gideona Jehovah mba hangalake tafike. Nangòro miaramila matanjake 32 000 Gideona. Maro biby ty miaramila fahavalon’​Israelita, hanafike an-droze. Nisy 135 000 fahavalo reo. Ka hoy Jehovah tamin’​i Gideona: ‘Mbo maro maré ty miaramilanao.’ Ino ty antone nivolànan’​i Jehovah raha zay?

Satria laha maharesy amy aly io Israelita reo, le mety hieritseritse, fa mahery roze ka naharesy. Mety hieritseritse kea roze fa tsy nila ty fanampian’​i Jehovah mba ho mpandresy. Ka hoy ty asan’​i Jehovah tamin’​i Gideona hoe: ‘Volàno iaby lahilahy mavàka reo, mba holy an-tranone ane.’ Notanterahin’​i Gideona raha zay, ka lahilahy 22 000 ro noly. Mpanafike 10 000 avao ro sisa tavela, hialy amy miaramila 135 000 reny.

Gibeona mampanao fitsapà namane reo

Fe janjìno soa tseky moa safàn’​i Jehovah toy: ‘Mbo maro avao namanao reo.’ Nivòla tamin’​i Gideona Jehovah mba hampìno rano lahilahy reny tamy rano mandeha zay teo. Ka ze olo nampihohoke ty tarehine tamy rano io teo, le nalefa noly iaby. Bakeo, nampitamà an’​i Gideona Jehovah hoe: ‘Hataoko maharesy iha miarake amy miaramilanao 300 reo. Mahay miamby soa roze ndre minon-drano aza.’

Avy henany zao ty fotoa hialìa. Nozaràn’​i Gideona telo miaramilane 300 reny. Nameane anjomara kiraidraike iaby lahilahy reny, bakeo nameane siny misy jiro kea tanatine tao. Laha fa nanomboke hisasake ty haly, le nivory manodidy toera misy ty fahavalon-droze reny teo ty miaramilan’​i Gideona. Bakeo le niarake nitsòky ty anjomarane noho samby namaky ty sinine roze iaby, ka nikaikaike maré hoe: ‘Sabatsin’​i Jehovah noho Gideona!’ Taitse tampoke miaramila fahavalo reny. Nitserike roze sady navàka biby. Nanomboke nilay roze, ka naharesy ty Israelita.

Mpitsara toko faha-6 zisiky amy toko faha-8.



Fanontanea

  • Ino ty fahasahiràna bevata nahazo Israelita reo? Ino ty antone?
  • Nanino Jehovah ro nivòla tamin’​i Gideona hoe maro maré miaramilane reo?
  • Firy ty lahilahy tavela, laha fa nampolìn’​i Gideona iaby lahilahy navàka reny?
  • Hazavao baka amy sary io, ty fomba nampihenan’​i Jehovah miaramilan’​i Gideona reny ho 300 avao.
  • Nanao akore ty fomba nandaminan’​i Gideona lahilahy 300 namane reo, noho ty fomba nahazoan-droze fandresea?

Fanontanea Fanampine

  • Vakio Mpitsara 6:​36-40.

    Ino ty raha nataon’​i Gideona mba hahaìzane soa ty sitrapò-Ndranahare?

    Manao akore ty fomba ahaìzantsika amy andro henany zao ty sitrapò-Ndranahare? (Ohab. 2:​3-6; Matio 7:​7-11; 2 Tim. 3:​16, 17)

  • Vakio Mpitsara 7:​1-25.

    Ino ty fianara azontsika baka amy lahilahy 300 nahay niamby soa, fa tsy nanahake ty hafa tsy nidary reny? (Mpits. 7:​3, 6; Rom. 13:​11, 12; Efes. 5:​15-17)

    Manahake lahilahy 300 nanenty soa an’​i Gideona reny, ino koa ty raha ianarantsika laha fa manenty an’​i Jesosy Kristy, aze Gideona Be iny tsika? (Mpits. 7:17; Matio 11:​29, 30; 28:​19, 20; 1 Pet. 2:​21)

    Manampy antsika ho faly avao ami’​ze fanompoa andefasan’​i Jehovah antsika ndre aìa ndre aìa amy fandaminan’​i Jehovah eo, ty Mpitsara 7:21. Ino ty antone? (1 Kor. 4:​2; 12:​14-18; Jak. 4:​10)

  • Vakio Mpitsara 8:​1-3.

    Laha fa tsy mifankahazo amintsika ty rahalahy na anabavy raike; ino ty fianara azontsika tamy fomba nandaminan’​i Gideona ty alin-droze amy Efraimita reo? (Ohab. 15:​1; Matio 5:​23, 24; Lioka 9:​48)