Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 48: Gibeonita Hendry

Tantara 48: Gibeonita Hendry

FA PARÉ hialy amin’​Israelita reo henany zao ty ankamaroa’​ty tanà ta-Kanana tao. Nieritseritse roze reo fa haharesy. Fe ty olo tamy tanà marinike teo, ta-Gibeona tao, le tsy nieritseritse manahake zay. Nino roze fa niaro ty Israelita Andranahare ka tsy naniry hialy tami-Ndranahare roze. Hainao va hoe ino ty raha natao Gibeonita reo?

Nataon-droze ze hieritsereta fa olo mipetrake baka an-tany lavitse ane roze. Ka, nanisy siky driatse noho kapa fa raty ty lahilahy sasane. Nampandesin-droze kitapo fa tatake ty ampondrane, sady nanday mofo maike mahery reny roze. Nandeha tamin’​i Josoa tany roze bakeo, nivòla hoe: ‘Baka an-tany lavitse bibike ane zahay, satria fa renay ty mikasike an’​i Jehovah, Andranaharenareo. Fa renay iaby ty raha nataone taminareo ta-Ejipta tany. Ka nivòla taminay ty mpitarike anay mba handeha lavitse atoy hangalake hany, sady hivòla aminao hoe: “Mpanomponao zahay. Manaòva fifanekea aminay, fa tsy hialy aminay nareo.” Azonao hentea, fa driatse ty sikinay noho’​ty lia lavitse nataonay, sady fa simba noho maike bibike ty mofonay.’

Natokìsan’​i Josoa noho ty mpitarike hafa, Gibeonita reo. Ka nampitamà aze roze fa tsy hialy amin-droze mihitsy. Fe laha fa telo andro tafara atoy, le nihain-droze fa olo nipetrake marìny teo avao Gibeonita reny.

Nanontany an-droze Josoa hoe: ‘Ino ty antone nivolànanareo taminay hoe baka an-tany lavitse nareo?’

Namaly Gibeonita reo hoe: ‘Nivòla raha zay zahay, satria nirenay fa hanome tany Kanana toy ho anareo Jehovah Andranaharenareo. Ka natahotse zahay tsy no hovonònareo avao.’ Fe nitanjake ty safà nampitamànine ty Israelita, ka tsy namono, fa nataon-droze mpiasa avao Gibeonita reo.

Neloke biby ty mpanjakan’​i Jerosalema, laha fa naharé hoe nifanarake soa ty Gibeonita noho ty Israelita. Ka nivòla ho zao tamy mpanjaka efatse hafa ie hoe: ‘Miavia atoy, ka ndao hanampy ahy hialy amy Gibeonita reo.’ Zay vatane ty raha natao’​ty mpanjaka limy. Ty filongoa’​ty Gibeonita tamin’​Israelita ro nahavy mpanjaka limy reo hialy amin-droze. Nampiseho fahendrea va ty fifanaràha Gibeonita reo tamin’​Israelita? Hianarantsika amy tantara manarake ao raha zay.

Josoa 9:​1-27; 10:​1-5.

Josoa noho Gibeonita reo


Fanontanea

  • Ino ty tsy nampitovy Gibeonita reo tami’​ty Kananita nipetrake tamy tanà manodidy teo?
  • Ino ty raha natao Gibeonita reo arake ty hita amy sary io, ino ty antone?
  • Nampitamà ino tamy Gibeonita reo Josoa noho ty mpitarike israelita? Fe ino ty nihain-droze laha fa afake telo andro tafara atoy?
  • Ino ty raha niseho laha fa nihai’​ty mpanjaka tamy tanà hafa tany fa nifanarake soa tamin’​Israely ty Gibeonita?

Fanontanea Fanampine

  • Vakio Josoa 9:​1-27.

    Narovan’​i Jehovah avao ty Gibeonita ndra fa nanome didy Israelita reo mba “handripake ty olo iaby an-tany etoy” aza ie. Ino iaby ty toetsin’​i Jehovah hita amy raha zay? (Josoa 9:​22, 24; Matio 9:13; Asa. 10:​34, 35; 2 Pet. 3:​9)

    Tsy nivalike tamy fifanekea nataone tamy Gibeonita reo Josoa. Ino koa ty fianara soa azo’​ty Kristiana alà tahake baka amy raha zay henany zao? (Josoa 9:​18, 19; Matio 5:37; Efes. 4:​25)

  • Vakio Josoa 10:​1-5.

    Afake manahake Gibeonita reo ty vahoake be, amy fomba manao akore? Hahazo ino roze laha manao raha zay? (Josoa 10:​4; Zak. 8:23; Matio 25:​35-40; Apok. 12:​17)