Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 43: Nanjary Mpitarike Josoa

Tantara 43: Nanjary Mpitarike Josoa

NANIRY handeha ta-Kanana ane niarake tamin’​Israelita reo Mosesy. Ka nanontany ie hoe: ‘Mba engào hiampita amy Ranon’​i Jordana, noho hahita tany soa io aho Jehovah.’ Fe nivòla Jehovah hoe: ‘Fa ampy zay! Ka ampoly sasy!’ Hainao va hoe ino ty antone nivolànan’​i Jehovah raha zay?

Io ty raha niseho laha fa nopaìhin’​i Mosesy vatolampy iny. Tiaròvo fa tsy nanome voninahitse an’​i Jehovah roze amin’​i Arona. Tsy nivòla tamy vahoake reo roze hoe, Jehovah ro nanome an-droze rano niboake tamy vato iny. Ka zay ty antone tsy nanengàn’​i Jehovah an’​i Mosesy noho Arona handeha ho a-Kanana ane io.

Nivòla tamin’​i Mosesy Jehovah, vola vitsivitsy tafara’​ty nahafatesan’​i Arona hoe: ‘Alao Josoa, ka ampitsangàno anatrehan’​i Eleazara mpisoro, noho ty vahoake eo ie. Ka ambarao an-droze iaby fa Josoa ro ho mpitarike vaovao.’ Nanorike ty raha iaby novolànin’​i Jehovah tamine Mosesy, arake ty hitanao amy sary eo.

Mosesy manambara fa Josoa ro mpitarike

Novolànin’​i Jehovah Josoa bakeo hoe: ‘Ka kivy iha, sady ka mavàka, fa hiarake aminao aho. Iha ro nofilìko hitarike Israelita reo ho amy tany Kanana nampitamàniko an-droze iny ane.’

Laha fa tafara atoy Jehovah le nivòla tamin’​i Mosesy mba hanganike tamy vohitse atao hoe Nebo, tamy tany Moaba tao zay. Laha fa niavy tamy farane anabo teny Mosesy le afake nitsinjo ty raha tampita Ranon’​i Jordana io teo noho nahita ty hasoa’​ty tany Kanana. Hoy Jehovah: ‘Io tany nampitamàniko ho ahi’​ty taranakin’​i Abrahama, Isaka, noho Jakoba iny. Nengàko hanenty raha io iha, fe tsy mahazo militse ao.’

Nimaty tamy Vohitse Nebo teo Mosesy. Fa 120 tao ie tami’​zay. Mbo natanjake noho mbo nahita soa ty masone. Nitàny an’​i Mosesy tanaty andro maromaro ty vahoake. Fe nifaly avao kea roze, satria Josoa ro mpitarike an-droze vaovao.

Nomery 27:​12-23; Deoteronomia 3:​23-29; 31:​1-8, 14-23; 32:​45-52; 34:​1-12.



Fanontanea

  • Ia lahilahy roe miarake amy Mosesy amy sary eo reo?
  • Ino ty raha novolànin’​i Jehovah tamin’​i Josoa?
  • Nanino Mosesy ro nanganike tamy farane anabo amy Vohitse Nebo eny? Ino ty raha novolànin’​i Jehovah tamine?
  • Firy tao Mosesy vo nimaty?
  • Nanino ty olo ro nalahelo, fe ino kea ty antone nahafaly an-droze?

Fanontanea Fanampine

  • Vakio Nomery 27:​12-23.

    Ino ty asa nampanaòvin’​i Jehovah an’​i Josoa, voho ino koa ro ahità fa mikarakara soa ty vahoakine Jehovah henany zao? (Nom. 27:​15-19; Asa. 20:28; Heb. 13:​7)

  • Vakio Deoteronomia 3:​23-29.

    Nanino va Mosesy noho Arona ro tsy nengàn’​i Jehovah hilitse tamy tany nampitamàne tao io? Ino koa ty fianara azontsika baka amy raha zay? (Deot. 3:​25-27; Nom. 20:​12, 13)

  • Vakio Deoteronomia 31:​1-8, 14-23.

    Porofò fa nanambany ty vatane Mosesy, ka naneke ty sazy nataon’​i Jehovah tamine arake ty resake nataone farane? (Deot. 31:​6-8, 23)

  • Vakio Deoteronomia 32:​45-52.

    Tokone hanao akore amy fiaìnantsika ty heri’​ty Safà-Ndranahare? (Deot. 32:47; Lev. 18:​5; Heb. 4:​12)

  • Vakio Deoteronomia 34:​1-12.

    Mbo tsy nihitan’​i Mosesy mihitsy Jehovah zao, fe nanao akore ty fomba nifampikasohane tamine arake ty resahy Deoteronomia 34:10? (Eks. 33:​11, 20; Nom. 12:​8)