Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 40: Nipaiky Vatolampy Mosesy

Tantara 40: Nipaiky Vatolampy Mosesy

NANDEHA avao ty tao, 10 tao, 20 tao, 30 tao, 39 tao! Mbo tan’​efitsy ane avao ty Israelita, fe nikarakara ty vahoakine soa Jehovah, tamy fotoa reo. Nofahanane mana roze. Nitarike an-droze ie ka nampiasa raho laha fa mazava ty andro, noho afo laha fa halike. Tanaty tao maro reo, le tsy nisimba ty akanjon’​Israelita reo sady tsy narare ty tombon-droze.

Fa ho 40 tao amy vola raike kitsahin-droze toy ty fa nialàn’​Israelita reo ta-Ejipta tao. A-Kadesy ao roze henany zao. Teo avao kea ro fa nisy an-droze tamy fotoa naniràha mpisafo tany 12 reny, mba hanenty ty raha niseho ta-Kanana tany, fa ho 40 tao lasa zay. Nimaty ta-Kadesy tao kea Miriama, anabavin’​i Mosesy. Hisy fahasahiràna manahake taloha reny kea eto.

Tsy nahita rano ty olo. Nimenimeny tamin’​i Mosesy roze hoe: ‘Aleonay zahay maty. Ino ty antone nanandesanao anay hiboake baka Ejipta ane io, ka handeha amy tany maike tsy misy raha toy? Tsy misy hany eto, tsy misy aviavy, tsy misy voaloboke, tsy misy ampongabendanitsy. Sady ndra ty rano hinomy aza tsy misy iaby.’

Mosesy mipaiky vatolampy

Laha fa nandeha nivavake tamy tabernakely tany Mosesy noho Arona, le nivòla tamin-droze Jehovah hoe: ‘Avorio iaby ty olo. Bakeo miakara amy vatolampy eny iha hiresake amin-droze, ka paìho vatolampy io soa hisy rano hiboake hinomi’​ty olo noho ty biby iaby.’

Navorin’​i Mosesy iaby olo reny, laha fa bakeo, le nivòla ie hoe: ‘Tsy mino an’​Andranahare vatane nareo! Hampiboake rano ho anareo baka amy vatolampy toy va zahay amin’​i Arona?’ Nopaìhin’​i Mosesy in-droe vatolampy iny, ka nisy rano maro niboake bakao. Ampy hinomi’​ty olo noho ty biby rano io.

Fe neloke tamin’​i Mosesy noho Arona Jehovah. Hainao va hoe ino ty antone? Satria nivòla Mosesy noho Arona fa roze ro nampiboake rano baka amy vatolampy io. Fe laha ty marina, Jehovah ro nanao raha zay. Navandy Mosesy noho Arona, ka le nosazìn’​i Jehovah. ‘Tsy mahazo mitarike ty olo hilitse amy tany Kanana ao nareo’, hoy ty asan’​i Jehovah tamin-droze.

Tsy ela ty Israelita le niala ta-Kadesy tao. Niavy tamy Vohitse Hora tao roze laha fa tafara atoy. Tamin-droze niakatse vohitse io, ro nahafaty an’​i Arona. Feno 123 tao Arona vo nimaty. Nalahelo an’​i Arona biby ty Israelita, ka nitàny tanaty 30 andro. Nanjary mpisoronabe nisolo aze tamin’​Israely teo, Eleazara, anake lahin’​i Arona.

Nomery 20:​1-13, 22-29; Deoteronomia 29:​4.



Fanontanea

  • Tamy fomba manao akore ro nikarakaràn’​i Jehovah Israelita reo, tamin-droze tan’​efitsy tany?
  • Ino ty raha nampimenimeny Israelita reo tamin-droze ta-Kadesy tao?
  • Tamy fomba manao akore ro nanomezan’​i Jehovah rano hinomi’​ty olo noho ty biby?
  • Ia va olo manondro ty vatane amy sary eo io, noho ino ty antone nanaòvane raha manahake zay?
  • Nanino Jehovah ro neloke tamin’​i Mosesy noho Arona? Ino ty sazy namea an-droze?
  • Ino ty raha niseho laha fa tamy Vohitse Hora teo? Ia koa ro nanjary mpisoronaben’​Israely nanomboke teo?

Fanontanea Fanampine

  • Vakio Nomery 20:​1-13, 22-29 noho Deoteronomia 29:​4.

    Ino ty fianara azontsika laha fa mandinike ty fomba nikarakaràn’​i Jehovah Israelita reo tan’​efitsy tany tsika? (Deot. 29:​5; Matio 6:31; Heb. 13:​5; Jak. 1:​17)

    Tsy nohamasìnin’​i Mosesy noho Arona tamin’​Israelita reo teo ty anaran’​i Jehovah. Nanao akore ty fahitàn’​i Jehovah fihetsikin-droze zay? (Nom. 20:12; 1 Kor. 10:12; Apok. 4:​11)

    Nanao akore ty fihetsikin’​i Mosesy laha fa nosazìn’​i Jehovah ie? Ino koa ty fianara azontsika baka amy tantara zay? (Nom. 12:​3; 20:​12, 27, 28; Deot. 32:​4; Heb. 12:​7-11)