Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 38: Mpisafo Tany 12

Tantara 38: Mpisafo Tany 12
Mpisafo tany Israelita mitarazo voankazo

MBA henteo moa voankazo andesy lahilaly retoa io. Bevata biby tahom-boaloboke io. Lahilahy roe vo mahaleo aze amy hazo. Henteo kea moa aviavy noho ampongambendanitsy io. Baka aìa voankazo soa reo? Baka amy tany Kanana ane. Tiaròvo fa ta-Kanana tany ro nipetrahan’​i Abrahama, Isaka noho Jakoba. Fe laha fa nisy keré ty tany, le nandeha nifindra ta-Ejipta ane Jakoba noho ty fianakaviane. Mbo mitarike Israelita reo ho amy tany Kanana ane avao Mosesy, ndre fa 216 tao afara atoy aza. Ka henany zao roze, le niavy amy tany efitsy atao hoe Kadesy zay.

Raty fanahy biby ty olo nipetrake ta-Kanana tao. Ka nandefa lahilahy 12 Mosesy mba hanenty ty mikasikasike tanà io, le hoy ty asane tamin-droze hoe: ‘Ndahàna nareo, ka henteo hoe firy ty olo mipetrake ao, no sady manao akore ty herin-droze. Henteo laha soa tany io, ka azo ambolea. Ka halìno kea ty manday vokatse baka ane, laha fa mimpòly nareo.’

Laha fa nimpòly ta-Kadesy tany mpisafo tany reo, le nivòla tamin’​i Mosesy hoe: ‘Soa vatane tanà io.’ Mba hanaporofòa raha zay, le nanday voankazo bakany roze, ka natorone an’​i Mosesy. Fe nivòla ty folo tamy mpisafo tany reo hoe: ‘Mahery sady bevata bibike olo mipetrake amy tanà io ao. Mety hovonòan-droze tsika laha manàndra mikasikasike tanin-droze io.’

Natahotse Israelita reo laha fa naharé raha zay. Ka nivòla roze hoe: ‘Aleonay zahay nimaty ta-Ejipta ane, na amy tany efitsy toy eto, satria laha mialy amy Kananita reo tsika le ho maty, ka hanjary andevo ty valinay noho ty ananay. Ndao tsika hifìly mpitarike vaovao ho antsika hasolo an’​i Mosesy, ka handay antsika himpòly a-Ejipta ane ndraike!’

Fe nisy roe tamy mpisafo tany reo natoky an’​i Jehovah. Josoa noho Kaleba ty anaran-droze. Nataon-droze ze tsy hampatahotse maré Israelita reo. Hoy ty asan-droze: ‘Ka mavàka nareo. Jehovah ro miarake amintsika. Tsy ho sarotse amintsika ty hangalake tany io.’ Fe tsy nijànjy an’​i Josoa noho Kaleba ty olo, fa naniry hamono aze.

Nampeloke an’​i Jehovah raha zay, ka hoy ty asane tamin’​i Mosesy: ‘Ty olo 20 tao noho miakatse le tsy mahazo militse amy tany Kanana ao. Mbo tsy mino ahy avao roze, ndre fa nahita fahagagà maro nataoko ta-Ejipta noho tan’​efitsy tany reny aza. Ka, ze olo tsy mino ahy le hengà hiriorio an’​efitsy ane anaty 40 tao zisiky hahafaty aze, fa Josoa noho Kaleba avao ro hilitse amy tany Kanana ao.’

Nomery 13:​1-33; 14:​1-38.



Fanontanea

  • Manao akore ty fahitanao voaloboke amy sary eo io? Baka aìa raha io?
  • Ino ty antone nandefasa Mosesy mpisafo tany 12 ho a-Kanana ane?
  • Ino ty raha novolàny mpisafo tany folo reny, laha fa nimpòly tamin’​i Mosesy teo roze?
  • Tamy fomba manao akore ro nampisehoa’​ty mpisafo tany roe fa natoky an’​i Jehovah roze? Ia iaby anaran-droze?
  • Ino ty antone nampeloke an’​i Jehovah? Ka ino ty safà novolànine tamin’​i Mosesy?

Fanontanea Fanampine

  • Vakio Nomery 13:​1-33.

    Ia ro voafìly hanara-maso ty raha mikasikasike tany io? Ino ty antone azo ivolàna fa nahavoa roze? (Nom. 13:​2, 3, 18-20)

    Nanino Josoa noho Kaleba ro tsy nitovy hevitse tamy mpisafo tany hafa reny? Ino koa ty fianara azontsika baka amy raha zay? (Nom. 13:​28-30; Matio 17:20; 2 Kor. 5:​7)

  • Vakio Nomery 14:​1-38.

    Ino ty raha nahazo olo nimenimeny tamy solontenan’​i Jehovah tan-tany etoy reny? Mananatse antsika mba tsy hanao ino koa raha zay? (Nom. 14:​2, 3, 27; Matio 25:​40, 45; 1 Kor. 10:​10)

    Resahi’​ty Nomery 14:24 fa mikarakara soa ty mpanompone kiraidraike Jehovah. Hazavao. (1 Mpanj. 19:18; Ohab. 15:​3)