Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 55: Anak’​ajà Kelikele Manompo An’​Andranahare

Tantara 55: Anak’​ajà Kelikele Manompo An’​Andranahare

TSY soasoa va ty fanenteanao anak’​ajà lahilahy kelikele io? Samoela ty anarane. Ely, aze lahilahy mametrake ty tanane amy lohan’​i Samoela eo io, mpisoronabe tamy Israely teo ie. Elkana noho Hana rae amin-drenin’​i Samoela aze manday an’​i Samoela amin’​i Ely eo reo.

Samoela mifankahita amin’i Ely mpisoronabe

Vo efatse na limy tao eo ho eo Samoela. Fe hipetrake amy tabernakelin’​i Jehovah ao miarake amin’​i Ely noho ty mpisoro hafa kea ie. Ino ty antone nanomezan’​i Elkana noho Hana anak’​ajà kelikele manahake an’​i Samoela, mba hanompo an’​i Jehovah tamy tabernakely tao io? Ndao ho henteantsika.

Nalahelo bibike Hana tao maromaro talohan’​io. Nalahelo ie, satria te hanan’​anake, fe tsy afake niterake. Ka ndraike andro laha fa nandeha tamy tabernakelin’​i Jehovah tao Hana le nivavake hoe: ‘Ka halinonao lahy aho Jehovah! Mampitamà anao aho, fa laha ameanao anake lahy, le hengàko hanompo anao anati’​ty fiaìnane manontolo, ie.

Namaly ty vavake nataon’​i Hana Jehovah, ka laha fa vola maromaro tafara atoy, le niterake an’​i Samoela ie. Tean’​i Hana anake lahine io. Mbo kelikele Samoela le fa niresahane raha mikasike an’​i Jehovah. Nivòla tamy valiny iny ie hoe: ‘Laha vo bebe ajà toy, ka fa tsy minono amiko sasy, le handesiko amy tabernakely ane ie soa hanompo an’​i Jehovah ao.’

Ka, nanatanterake raha zay vatane Hana noho Elkana amy sary eo io. Fa nampianari’​ty rae amin-drenine soa Samoela, ka nahafaly aze ty hanompo tamy tranolain’​i Jehovah ao. Isan-tao Hana roze amin’​i Elkana ro mandeha manompo an’​i Jehovah amy tranolay io ao, sady mitsidike anake lahin-droze iny. Voho amy fotoa io kea ro andaìsan-droze akanjo kelikele, namboarine ho an’​i Samoela.

Tao maro ro fa lasa, fe mbo mazoto manompo an’​i Jehovah tamy tabernakelin’​i Jehovah tao avao Samoela. Tean’​i Jehovah noho tean’​olo ie. Fe raty fanahy ty anake lahin’​i Ely mpisoronabe, Hofinia noho Finehasa ty anaran-droze. Nanao raha raty maro biby roze, sady nitao ty olo hafa tsy hanorike ty safàn’​i Jehovah. Tokone ho nalàn’​i Ely tsy ho mpisoro sasy anane reo, fe tsy zay ty nataone.

Tsy nengàn’​i Samoela hampijàno ty fanompoane tamy tabernakely tao raha raty maro niseho tao reo. Fe, fa ela ty tsy niresahan’​i Jehovah tamin’​olombelo sasy, satria vitsy ty olo nitea aze vatane. Laha fa nihabe Samoela le ho’​zao ty raha niseho:

Nisy feo nanaitse an’​i Samoela laha fa niroro tamy tabernakely tao ie. Namaly ie hoe: ‘Toy aho.’ Nifoha ie, bakeo nilay tamin’​i Ely tany malaky, ka nanao hoe: ‘Nokaìhinao aho, ka niavy.’

Fe namaly Ely hoe: ‘Tsy nikaike anao aho; ndahàna iha mimpòly miroro.’ Nandeha niroro ndraike Samoela.

Mbo nisy feo nikaike fanindroe ndraike laha fa bakeo: ‘Samoela!’ Nifoha ndraike Samoela sady nilay tamin’​i Ely teo ka nanao hoe: ‘Nikaike iha, ka niavy aho’, hoy ty asane. Fe namaly Ely hoe: ‘Tsy nikaike anao aho. Ndahàna ndraike miroro.’ Ka, nimpòly tan-kitreline tany ndraike Samoela.

‘Samoela!’, hoy ndraike feo iny fanintelone. Nilay tamin’​i Ely tany ndraike Samoela, ka nanao hoe: ‘Niavy aminao atoy ndraike aho, satria haiko fa iha nikaike ahy io.’ Hain’​i Ely ami’​zay fa Jehovah ro nikaike aze. Ka hoy ty asan’​i Ely tamin’​i Samoela: ‘Ndahàna iha miroro ndraike, ka laha mbo mikaike anao ie, le volàno hoe: “Mivolàna Jehovah fa mijànjy anao soa mpanomponao toy.” ’

Zay vatane ty raha novolànin’​i Samoela laha fa nikaike aze ndraike Jehovah. Nivòla tamine Jehovah fa hanome sazy an’​i Ely noho anake lahine reo. Tafara atoy, laha fa nialy tamy Filistina reo Hofinia noho Finehasa, le nimaty iaby. Nitonta tamy tany Ely, laha fa naharé raha zay, ka nitampake ty vozone, bakeo nimaty kea ie. Tanterake safàn’​i Jehovah iny.

Nanjary mpitsara farane tamin’​Israely teo Samoela laha fa nihabe. Fe laha fa niantitse ie, le nangatake tamine ty vahoake hoe: ‘Mifiliàna mpanjaka raike mba hitarike anay.’ Tsy nirìn’​i Samoela ty hanao raha zay, satria Jehovah ro mpanjakan-droze, laha ty marina. Fe nivòla tamin’​i Samoela Jehovah, mba hijànjy ty safà vahoake reo.

1 Samoela 1:​1-28; 2:​11-36; 4:​16-18; 8:​4-9.



Fanontanea

  • Ia va ty anaran’​ajà kelikele amy sary io? Ia kea olo miarake amine reo?
  • Ino ty vavake nataon’​i Hana tamin’​i Jehovah, laha fa nandeha tamy tabernakely tany ie ndraike andro? Nanao akore ty fomba namalian’​i Jehovah vavake io?
  • Firy tao Samoela tamin’​ie nandesy hanompo amy tranolain’​i Jehovah ao? Ino ty raha namboari’​ty renine ho aze isan-tao?
  • Ia ty anara anake lahin’​i Ely reny? Olo nanao akore roze reo?
  • Tamy fomba manao akore ty nikaìhan’​i Jehovah an’​i Samoela? Ino ty raha novolànin’​i Jehovah tamine?
  • Nanjary ino Samoela laha fa nihabe? Ino ty raha niseho laha fa antitse ie?

Fanontanea Fanampine

  • Vakio 1 Samoela 1:​1-28.

    Nitarike ty fianakaviane mba hanarake ty fivavàha marina Elkana. Ino ty ohatse soa nengàne ho ahi’​ty lahilahy loham-pianakavia? (1 Sam. 1:​3, 21; Matio 6:33; Fil. 1:​10)

    Laha fa misy fahasahiràna bevata mahazo antsika; ino ty fomba azontsika anahàfa an’​i Hana? (1 Sam. 1:​10, 11; Sal. 55:22; Rom. 12:​12)

  • Vakio 1 Samoela 2:​11-36.

    Tamy fomba manao akore ro nanomezan’​i Ely voninahitse anane reo mihoatse an’​i Jehovah? Ino ty fananàra azontsika baka amy raha zay? (1 Sam. 2:​22-24, 27, 29; Deot. 21:​18-21; Matio 10:​36, 37)

  • Vakio 1 Samoela 4:​16-18.

    Ino iaby vaovao raty efatse baka an’​aly ane reny? Nanao akore Ely laha fa naharé raha rezay?

  • Vakio 1 Samoela 8:​4-9.

    Ino ty antone nampeloke maré an’​i Jehovah tamin’​Israelita reo? Ino kea ty hanampy antsika tsy hivalike amy Fanjakàn’​i Jehovah? (1 Sam. 8:​5, 7; Jaona 17:16; Jak. 4:​4)